Read ngando 2 Timoteo 1 Bible Online

2 Timoteo 1 - ngando bible

2 Timoteo 1

¹Paulo ekima ena Masiya Yesu l’eango ena Yakomba, yoka bosamb’onoyali esemba ena liiko loho loneloyali eneyali Masiya Yesu,

²eneyali Timoteo, bon’onami onalang’emi: Isei l’ongompolu la mwi eneyali Yakomba Bafango ko la Masiya Yesu, Nkolo eniso.

³Lakanga Yakomba lokango, ende onoki banky’anami ban’alale osaelaka ko l’emi nkoho lomosaela la lokanyi lon’otema lona soto, lacin’oka bina l’ina lakokanedy’e ena beondo benami, l’ane l’oco;

⁴ko eneyakanedy’emi mposoli ine, botem’onami boka mposa mene lacina nkeene, lacin’eho ekiko elole eneyal’emi.

⁵Lofwa nkoho imeedyo ina solosolo iniyali eneyal’e, iniyaaki’oso eneyali nkya ene en’oyoto eka Loi, ko l’eneyali boyango’one boka Eunike; ko mpaate ntango, emite iho iyali eneyal’e nkoho.

⁶Lacin’eho, lakoofodya lacina omanya nganji ena Yakomba eneyali ene yal’e la ntadya ena bakas’anami.

⁷Lacin’oka Yakomba atatofa bolimo bon’ofolu: amotofa bolimo bona mpamba, l’ona nganji, l’ona lokanyi lona bomwu.

⁸Lacin’eho, tokake bosimo bona Nkolo eniso nsoi, ko l’emi, tanjokak’emi, lisungu linande, nsoi; ohonde enelaka bosimo bon’olotsi bino, yoka bosamb’onoyali mpamba ena Yakomba.

⁹Ende atiikyaki, ko ateelelaki l’elelo en’oeka, efa bosamb’onoyali bikambwa biniso, ohonde bosamb’onoyali eango enandamene ko l’isei inande, inifamaki eneyal’iso la Masiya Yesu en’oso bona bisike bihitu,

¹⁰koko isanga iho imenya l’enyedyo ena Boiki’oniso Masiya Yesu, onokadyaki bewedi, ko onilaki ena fololo liiko ko la biinda bon’otuku nko l’osimo bon’olotsi.

¹¹Emi njilamaki bosumoli ko l’ekima ko l’olaki bon’osimo’oho.

¹²Ko ncina enen’emi bino bine eh’eho. Koko mpoke nsoi, lacin’oka emi ley’ende onoki’m’oimedyaka, ko limedy’oka ende ainya limonya boho bonoki’m’osukyaka yengoko bin’oho.

¹³Undamela eango en’aoyi banonga banak’otambaka eneyal’emi nko l’imeedyo ko la nganji eneyali eneyali Masiya Yesu.

¹⁴Yoi liho lina solosolo linalik’osukyamaka, ongya litombanya liho la Bolimo bon’olotsi onotonga litonga l’iso.

¹⁵Eamene omey’oka iyatu banayali ena Asia bamonjumbela; bafe’aniyo nko Fungelo la Elumonengo.

¹⁶Nkolo aokamele ecimo ena Onesifolo isei, lacin’oka ancicimodyaki ma-ma, ko atoka bonyolo’onami nsoi;

¹⁷ohonde eneki’nd’oyalaka ena Loma ankembaki la mposa mene ena locinji, ko ansungyaki.

¹⁸(Nkolo aofe lacina aukane l’isei eneyali Nkolo en’in’oho.) Ko eamene oeya fololo baoyi bike banaki’nd’onkambyaka ena Efeso.