Read ngando 2 Timoteo 2 Bible Online

2 Timoteo 2 - ngando bible

2 Timoteo 2

¹Lacin’eho, e bon’onami, kikaka locili l’isei iniyali eneyali Masiya Yesu.

²Ko baoyi banak’ookaka eneyal’emi en’oso bona temoins bike, sukya bato bana solosolo baoyi’aho, nko bato banangolakisa bakin’ato nkoho.

³Enaka bino l’emi yoka bosamb’onoyali soldat en’olotsi ena Masiya Yesu.

⁴Boto onoyali en’osala bona soldat afayotungya la bikambwa bina loko lone: alang’oka atangame bolotsi l’ende oneelelaki en’osala bona soldat.

⁵Ko yombo boto aseela bembondo ena tokenya, afalotsama likuka lin’elonga yengoko kuma aoseela l’okotua bonakolana l’eeka.

⁶Akoli eneyal’ende onosala ena lisala linande atambe liondo lin’oso lina bemamo.

⁷Kanelaka baoyi banatend’emi, ko Nkolo angokofa nnonganya en’aoyi bahatu.

⁸Kanedyaka Yesu Masiya on’ecimo ena Dawidi, onetwaki en’ewedi, yoka bosamb’onoyali bosimo’onami bon’olotsi.

⁹Nko boho bonen’emi bino mene, nko ntungama l’enyolo, yoka bokambi bon’owe; ohonde yoi lina Yakomba lifatungame tu.

¹⁰Lacin’eho, emi litedya baoyi bahatu mbitedya lacin’eniyo banasonama, lacin’iyo nkoho baate liiko loneloyali eneyali Masiya Yesu l’okonde bona bisike l’isike.

¹¹Yoi line liyali nko solosolo: Yombo towaki l’ende, tongika l’ende nkoho;

¹²yombo tocindelana ena bino, tongambana l’ende ena lifoka linande; yombo tangan’ende, angotoangan’iso nkoho;

¹³kang’iso tiind’imeedyo, endeakusa liyala nko solosolo: afakolana yangan’endamene.

¹⁴Oaofodya baoyi’ane; ko oasomya losomo en’oso bona Nkolo, ate bataatanake ntango ina baoyi banayali nko bototoloto, banatatengya iy’anoka nko ntatengya.

¹⁵Kemba la mposa mene lacina oenya eneyali Yakomba yoka boto onotangama bolotsi, bosali onofana ncina ena nsoi, onolaki yoi lina solosolo l’okotua bona cilili.

¹⁶Lotaka betendatenda ben’owe benefakumyama Yakomba l’eho, lacin’oka baoyi’aho bangosokwa la mbunga ena Yakomba;

¹⁷ko yoi liniyo lingocima nk’eyoka etukelo ena mpota. Umenayo la Fileto bayali nk’en’oloi’oho;

¹⁸iyo bamotembwa ena solosolo eho, ko baila mbo eetwelo en’ewedi emosila lilekana, ko yok’oho baehya imeedyo ina bato’amoi.

¹⁹Ohonde eango ena Yakomba emali la locili, ko eyali la ndembi ene, noka, Nkolo ameya bato’anandamene, ko, Boto l’oto onanda lina lina Nkolo aumbelake baoyi baninda mbongi.

²⁰En’otumba bon’okolo efaate bikala bina wolo ko la argent kei: bimoi binisengama en’onganza biyali, ko la bimoi bina ilongo nkenga; koko bimoi biyali la lokumo, koko bimoi bifana lokumo.

²¹Ko yombo boto ayokula ena likambo lin’aoyi’ane, angoyala ekala ena lokumo, enekyama en’oeka, enakolana l’ekambwa ena Nkolo, enekodyama lacin’ena ekambwa l’ekambwa en’olotsi.

²²Koko lotaka mposa inay’owe ina befenga; koko itanaka la mbongi, l’imeedyo, la nganji, la mwi, l’e l’iy’anelela Nkolo en’oondo l’otema bona soto.

²³Talangake biufo bina tolemeleme bininda bomwu, lacina omey’oka baoyi’aho baatel’oto nko lisa.

²⁴Ko efaonge lacina bosali’ona Nkolo asa lisa: akoli eneyal’ende ayalame la bongompolu eneyali bato bahatu, ko aate bomwu ena lilako, ka afalembwa la baoyi ban’owe banokambela bato;

²⁵akoli lacina alake bato banata ntango nko la njofima: yombo Yakomba angaf’iyo njokanya en’otema ko bangeya solosolo eho,

²⁶lacina batungwa en’ilonga ina Satana inik’iy’otungamaka l’ende lacina bakambe eango enande.