Read ngando 2 Timoteo 4 Bible Online

2 Timoteo 4 - ngando bible

2 Timoteo 4

¹Lakosumola en’oso bona Yakomba, ko l’en’oso bona Masiya Yesu, onongotenda linga bakambo ban’ato banayike ko l’anawaki; ko lakosomya lacin’en’enyedyo enande ena lifoka linande:

²emite, sekodya yoi liho; ongya lilola la mposa en’esike en’olotsi l’en’esike enefan’olotsi; akol’ato baoyi, fel’ato lofeli, ond’ato mbonda, l’isei ihatu ina locinji ko la lilako.

³Lacina esike engoya enefalangak’iyo lilako linakolana lakina; ohonde enatoha batoi’aniyo betoho, bangosusanya eneyal’iyaomene balaki banangalaka nk’eyoka bosamb’onoyali mposa iniyoamene inileki;

⁴ko bangokengola batoi’aniyo ena solosolo, ko bangotembwa lacina bacu eneyali basai.

⁵Koko e yalaka la bomwu en’aoyi bahatu; imedya njena ena bino; kamb’ekambwa ena bosekoli bona bosimo’on’olotsi; ongya likokya ekambelo ene.

⁶Lacin’emi molekyama isanga en’ewedi, ko esike enami ena njuma emoyela.

⁷Molokan’ita bin’olotsi, mokadya bokit’onami, molundamela imeedyo iho.

⁸Koko isanga likuka lina mbongi limomonyama lacin’enami, ko Nkolo onoyali Ntenji en’akambo ena mbongi, angompa liho en’in’oho; ko afampaki nk’emi kei: angaf’iyatu banalengedyaki enyedyo enande.

⁹Meka la mposa mene lacina oye eneyal’emi isanga;

¹⁰lacin’oka Dema amonjumbela, eneki’nd’olangaka loko lone, ko amocoa ena Tesalonike; Kulesekene amocoa ena Ngalatia; Tito amocoa ena Dalumatia;

¹¹onociki l’emi nko Luka kei. Ukola Malako, ko yaka l’ende eneyal’emi, lacin’ende aonga bolotsi yoka bokambi’onami.

¹²Motoma Tukiko ena Efeso.

¹³Enengoy’e, yaka l’okoto bonoki’m’ocikaka ena Tuloa eneka Kalupo, ko l’ekanda, ko taungake onjela bekanda bena parchemin.

¹⁴Alesandulo, botuli bona beango, anjilelaki bewe bike mene: Nkolo angutodya eneyal’ende yoka bosamb’onoki bikambwa binande oyalaka;

¹⁵e nkoho ongya lilot’ende, lacin’oka amaata baoyi’aniso ntango bike ina locili mene.

¹⁶Eneki’m’olokolaka boloko bonami bon’oso mene, efana nko l’oto onemalaki l’emi—iyatu banjumbelaki: mpala-nge’oka baate likambo ena yoi line.

¹⁷Ohonde Nkolo aemalaki l’emi, ko ankikyaki, lacin’eho bosimo bon’olotsi bohotu bosumolame bato l’emi, ko Befenda behetu baoke boho. Ko emi ntungolamaki en’onyua bona longuli.

¹⁸Nkolo angontungola en’ekambwa l’ekambwa en’owe, ko angommonya yengoko anjedya ena lifoka linande lina loola. Lokumo eneyal’ende bisike l’isike. Ndoho.

¹⁹Esa Pulisekila la Akwila ko l’ecimo ena Onesifolo.

²⁰Elasito amocikala ena Kolinto, koko ncikaki Tulofimo ena Mileto, kuma ayawu nkangi.

²¹Meka la mposa mene lacina oye kum’esike ena lifia etayele. Eubulo la Pudento la Lino la Kulaudia la bifili bihitu bakeesa.

²²Nkolo ayalamake l’olimo’one. Isei iyalamake l’e.