Read ngando Tito 2 Bible Online

Tito 2 - ngando bible

Tito 2

¹Koko e, tendaka baoyi banakolana la lilako lineyonga.

²Sumola ngolosombo ina mpame bayalame la njosimba, bakolane la lokumo, bayalame la lokanyi lona bomwu, baonge en’imeedyo iniyo, l’ena nganji ena lolango, l’ena locinji.

³Ngolosombo ina bayato nkoho, bakendake l’ekendelo enakolana l’ato ban’oeka, batafotake bato bakambo bana mpoci, batayalamake baombo bana vina bike, ohonde bayalame balaki ban’aoyi ban’olotsi.

⁴Akoli eneyal’iyo balake bayato banatatunde bik’ike lacina baoke baome’aniyo nganji, ko baoke ban’aniyo nganji;

⁵bayalame la lokanyi loneloonga, bayomony’iyoamene nko soto, basale bolotsi en’ola, bayalame l’isei, ko bafike baome’aniyoamene, lacina yoi lina Yakomba litongosaiyama l’esao.

⁶Nk’osamb’oho laka befenga lacina bayalame la lokanyi loneloonga.

⁷Koko en’aoyi bahatu eamene yalaka ndembi ena lilako ena bikambwa bin’olotsi, kum’oyatume baoyi banafana mbeha, baoyi bana lokumo lon’olotsi,

⁸nk’etendelo enonga, enefana ncina ena lofeli; lacin’eho ende onata ntango aoke nsoi enefan’ende yoi lin’owe liningi’nd’ototang’iso la liho.

⁹Laka baombo lacina bafike banyangetuke baniyoamene, ko baoky’iyo ekiko en’aoyi bahatu; batutodyake baoyi,

¹⁰batiyake njiya, ohonde batum’iyo bina l’ina bokotua bon’olotsi, lacin’eho lilako lina Yakomba Boiki’oniso likumyame l’iyo en’aoyi bahatu.

¹¹Lacin’oka isei ina Yakomba imenya, yoyela bato bahatu liiko,

¹²ko yotolaka lacina tumbele baoyi banafakoli l’ekumedyo ena Yakomba, ko tumbele mposa ina loko, ko tokende en’isik’ine la lokanyi loneloonga, ko l’okotua bona mbongi, ko l’ekumedyo ena Yakomba;

¹³ko tolendedya lolendedyo lon’ekiko, nk’enyedyo ena bokoka bona Yakomba en’okolo la Boiki’oniso Yesu Masiya;

¹⁴ende onoyolekyak’endamene lacin’eniso lacin’eho atiikole en’owe bohotu la mbiko, ko lacina ayosongel’endamene bato lacina bayalame banandamene, banoka bikambwa bin’olotsi mposa mene.

¹⁵Tendaka baoyi’ane, ko somya bato la lilako, ko fel’ato lofeli la locili lonakolana. Timedyake boto akotembole.