Read ngando Ba-Ebele 1 Bible Online

Ba-Ebele 1 - ngando bible

Ba-Ebele 1

¹Yakomba onotendaki’ale i’afango’aniso’ale bitendelo bike ko la bekotua bike nko l’asumoli;

²amotenda l’iso ena nsimbo ena bina bene nko la Bona, onoki’nd’oilaka bosangoli bona bikambwa bihitu, ko anunolaki loko l’ende;

³ende onoyali kalikali en’okonde’onande, ko l’ekolanya mene en’okotua bona Yakomba, onundisi bikambwa bihitu la yoi linande lina locili lonande. Eneki’nd’okulaka bato en’aoyi’owe, akisaki’ase en’ili bona likasa y’ome bonande Ona-Mpamba ena liko,

⁴eneki’nd’oyalamaka yok’onoleki bikima bina loola nko ndeka mene, lacin’oka amosangola lina linalileki liniyo la lokumo.

⁵Ekima ena loola eka nai eneki’nd’oilaka esike emoi, Mbo E oyali bon’onami, Mokoot’e bon’in’one? ko lakina, Nongoyala Bafango’onande, Ko ende angoyala Bon’onami?

⁶Ko lakina, enem’end’oila bon’ona ngolo ena loko, ate, Bikima bina loola baokumyake nk’ende.

⁷Ko aila lacin’ena bikima bina loola, ate, Ende onila bikima binande mpongo, Ko bakambi’anande loombi lona nkoi.

⁸Koko lacin’ena Bona aila, ate, Ieko ine, Yakomba, iyali bisike l’isike, Nselo ena lifoka line eyali nko nselo ena mbongi.

⁹Omolanga mbongi, ko omokila bowe; Ko lacin’eho, Yawe Yakomba ene amokohiny’e L’auta ban’ekiko ena liko ya bifili bine.

¹⁰Koko, E, Nkolo, omang’eango ena loko ena limatsako’ale, Ko loola loyali nk’ekambwa en’akas’ane.

¹¹Baho bangeha, koko e oyali nko njalama, Baho bangolemba yok’esenda enekindaki,

¹²Ko ongofuta baho yok’esenda, ko bangohalingwabokotu’okina. Koko e oyali bokotu’omoko, ofan’ecikitanelo, Ko mbula ine ifasimbaki tu.

¹³Koko ekima ena loola eka nai eneki’nd’oilaka en’esike emoi, ate, E kisak’ase en’ili bona likasa linami y’ome, Yengoko enengi’m’oila baokyi’owe’ane limbolongo lin’akak’ane?

¹⁴Baho bahatu bafayali nde belimo ben’ekambelo, banatomama lacina bakamb’ekambwa lacin’eniyo banangosangol’olo liiko?