Read ngando Ba-Ebele 11 Bible Online

Ba-Ebele 11 - ngando bible

Ba-Ebele 11

¹Imeedyo iyali nk’etambelo en’aoyi banalengedy’oto, nko enyedyo en’aoyi banafenya.

²Lacina bingambe baataki’ale lokumo lon’olotsi nko l’iho.

³L’imeedyo tonongany’oka loko lonunolamaki l’etendelo ena Yakomba, lacina iyema inayen’oto itanunolama eneyali toma tonatenya l’aiso.

⁴L’imeedyo Ebele alekedyaki Yakomba mbeka enelekaki eho ena Kaina bolotsi, ko aataki lokumo lone l’iho, ate ende ayali boto’ona mbongi, lacina Yakomba aimedyaki nganji inande la lokumo, ko l’imeedyo ende onowaki ayatende nk isanga.

⁵L’imeedyo Anoka aumolamaki ena loko lacina afene bewedi, ko atasungyama, lacin’oka Yakomba aotolaki; lacin’ende, kum’atatolama, aataki’ale lokumo lone, noka, aatelaki Yakomba enyanga.

⁶Koko yomb’afan’imeedyo, boto afinya yatel’ende enyanga; lacina yombo boto angoya eneyali Yakomba, tumbe aimedya, ate, Ende ayali, ko ayali bolukoli bon’ato banofon’Ende.

⁷L’imeedyo Noa, eneki’nd’olakamaka la Yakomba lacin’en’aoyi banatenya isanga, aangaki Yakomba, ko afakaki basua lacina aikya ecimo enande; ko la yoi liho akoyaki loko likambo, ko ayalamaki bosangoli bona mbongi en’imeedyo.

⁸L’imeedyo Abalayama, eneki’nd’oelelamaka lacin’eho aume en’ola ko acu en’edye enengi’nd’osangola lisango, aimedyaki, atafedya; ko afolaki kum’ateye bili bonoki’nd’ocoaka.

⁹L’imeedyo atongaki litonga en’onyanga bon’esemba, nk’eyoka en’onyanga bon’efenda, akisak’ase en’etumba bena bisenda, ende la Isaka la Yakoba, basangoli, iyo l’ende, bana esemba eh’emoko;

¹⁰lacina alengedyaki bonyanga bonoyali la biango bina njanga, njangi la mpaki en’onyang’oho nko Yakomba.

¹¹L’imeedyo Sala mene atambaki locili lacina atole yemi (kang’amolekanya esike ena mbota en’ana), lacina ailaki, ate ende onosembyaki esemba ayali nko solosolo.

¹²Ko lacin’eho, eneyali boto’omoko (nk’oto onolama l’ewedi) bato bike baotwaki, botuya bik’ike nk’eyoka tooto tona loola, ko yoka longewu loneloyali en’oselelia bona lose l’okwa lonelofeyana laali.

¹³Bato’ane bahatu bawaki en’imeedyo; batatamba bisemba, ohonde baenaki biho en’osana, ko basangelaki biho, ko baimedyaki’oka bayali nko befenda la bato banafan’ola ena loko.

¹⁴Bato banatenda baoyi yok’osamb’oho baenyany’oka bayafone bonyanga boniyoamene.

¹⁵Yombo bakanelaki bonyanga bonok’iy’oumaka, tumbe baataki etelo oyutwa meho.

¹⁶Ohonde isanga balanga bonyanga bonoleki’olotsi, nko bona loola. Lacin’eho, Yakomba afoke nsoi enatangam’ende Yakomba eniyo; lacin’oka amolakoedya bongili.

¹⁷L’imeedyo Abalayama, eneki’nd’omekamaka, alekyaki. Isaka mbeka: nk’ende onotambaki bisemba, alekyaki bon’onande bona likinda,

¹⁸nko bon’oho bonoki yoi oilamaka, Mbo ecimo ena ban’ane enga-ndama eneyali Isaka.

¹⁹Aimedyaki, ate Yakombaainya yetola boto eneka banawaki; ko aotambaki lakina eneyali baho nk’en’ekolanya.

²⁰L’imeedyo Isaka asakelaki Yakoba la Esau bosako lacin’ena baoyibanayayi.

²¹L’imeedyo Yakoba, eneki’nd’oolamaka l’ewedi, asakelaki ban’ana Yosefa bana mpame bah’afe bosako; ko akumyaki Yakomba nko nsurtama ena nsoli ena boinbele’onande.

²²L’imeedyo Yosefa, eneki’nd’oolamaka la nsimbo enande, akanelaki emwelo ena ban’ana Yisalaele, ko atomaki lotomo lacin’ena biuha binande.

²³L’imeedyo Mose, eneki’nd’ootwaka, afisamaki l’afango la nyango enande nsenza isaso, lacin’iyo baenaki’oka ayaaki bona bon’olotsi; ko bataanga lotomo lona Lifoka lina Roi.

²⁴L’imeedyo Mose, eneki’nd’otundaka boto, afedyaki litangama bon’ona bon’on’oyoto bona Falo;

²⁵asonaki ate aene bino la bato bana Yakomba, efa lacina aate ekiko en’aoyi’owe ilalela;

²⁶la lofeli lacin’ena Masiya, la lituka lina Ejipeto, atangaki ate lofeli loho loleki lituka liho l’enyanga; lacin’oka alengedyaki mpuci ena boluko.

²⁷L’imeedyo aumbelaki Ejipeto, ataanga nkele ena Lifoka lina Roi, lacin’oka acindelanaki locinji nk’eyoka boto onen’Ende onofenya.

²⁸L’imeedyo ailaki Elambedya ena Etelo ko la mpakisodya en’akila, lacin’iyo batongofomwa l’ende onoyaka ban’ana ngolo.

²⁹L’imeedyo batianyaki Lose lona Ngola nk’eyoka ena loko lona komukomu; koko baise Ejipeto, enek’iy’omekaka yila nk’osamb’oho, baehyamaki en’asi.

³⁰L’imeedyo bekako bena Yeliko bekwaki, eneki bato oetaka nsambanya beho bekolo nsambo.

³¹L’imeedyo Laba, boyoto’ona likele, atehyama ende l’iyo banapokaki lopoko, lacin’oka asangelaki bekiso l’olotsi.

³²Yoi limoi linalingi’m’otenda lika nai? Esike efakolana lacina ntende baoyi banaki Ngidona, la Balaka, la Samasona, la Yefeta, la Dawidi, la Samwele l’asumoli okambaka.

³³L’imeedyo bakoiyaki bafoka, bakambaki bikambwa bina mbongi, batambaki bisemba, bamumaki benyua bena nguli,

³⁴balimaki locili lona nkoi, balotaki njatala la lokula lon’ita; ena boolu boniyo bakikyamaki locili, bayalamaki la mpamba en’ita, batongolaki beloi bena soldats ina befenda.

³⁵Bayato batambaki bato’aniyo banawaki nko l’eetwelo en’ewedi; ko bamoi bawaki la mpomi mene, ko batimedya lacina batambe etungwelo eniyo, lacin’eho baate eetwelo eneleki’olotsi;

³⁶bamoi bamekamaki la besisedya ko la befoma la mpimbo, o nko mbunda en’enyolo l’en’ayaka.

³⁷bafuselamaki baufe, bakesamaki la tokwakwa, bamekamaki la mmeko, bayakamaki la lokula lon’ita; baselaselaki kuma bayalote bikoto bina mpate ko l’ikoto bina nta, baelingitanaki, baenaki bino, banyomamaki nko nyomama,

³⁸(loko lotakolan’ale l’iyo), baungaki ena sengelenge l’ena bangonji ban’atale, ena bekole ko l’en’afoku bana loko.

³⁹Ko bato’ane bahatu, kanga baataki lokumo lon’olotsi lacin’en’imeedyo iniyo, batatamba bisemba;

⁴⁰lacin’oka Yakomba akodyaki yoi limoi lacin’eniso linalileki bolotsi, lacin’iyo bafayelaki ena mbongi enakolana yengoko bayela nk’iso l’iyo.