Read ngando Ba-Ebele 12 Bible Online

Ba-Ebele 12 - ngando bible

Ba-Ebele 12

¹Lacin’eho, enatosambanya boloi bona temoins bik’ike mene, iso tumolake belito behetu, ko la yoi lin’owe linalileki yambana l’iso mbambana, ko tocu la laango la locinji en’otema en’emekelo ena laango eneyali en’oso’oniso;

²totakamele Bomatsi bon’imeedyo iniso onongy’iho nko mbongya, nko Yesu, onenaki bino bin’ekulusu lacin’ena enyanga eneyaaki en’oso’onande, atembolaki nsoi, ko amokisase ena likasa y’ome lin’ieko ina Yakomba.

³Koko bokanelak’ende onenak’ino bina ntango bike mene iniki bato ban’owe oatsaka, tacina botongolembwa ko botongotenya ena nkanyi inino.

⁴Enokan’ino bita la baoyi’owe, botayele yoka ena njutsa ena bakila en’ita biho;

⁵ko bomolofela nsomya enakolak’ino nk’eyoka bana, ate, Bon’onami bona mpame, tatangake lilako lina nsisodya lina Yawe yoi lin’isisali, Ko tatenyake enakofel’ende lofeli;

⁶Lacina Yawe alaka la nsisodya boto onok’ende nganji, Ko afoma bona l’ona onatamb’ende mpomi.

⁷Enitedy’ino lilako lina nsisodya, Yakomba ayakambe l’ino nk’eyoka la bana; bona onofalakame l’afango’onande lilako lina nsisodya ayali meya?

⁸Kokoyomb’ino bofaate lilako lina nsisodya linalakama bato bahatu, yok’oho boyali nko ban’ana lisamba, ko bofayali bana mene.

⁹Koko lakina, toyaaki l’afango bana baonge’aniso, banatolakaki la nsisodya, ko tafikaki; nd’ate Bafango’ona belimo, tofaleki nde lifik’ende, ko tike?

¹⁰Iyo solosolo batolakaki la nsisodya binabenetaat’ike, yok’onok’iy’otangak’olotsi; ohonde ende lacin’ena nkita eniso, lacina tekyame l’ende en’oeka bonande.

¹¹Lilako lina nsisodya lihalitu yotangam’isanga nk’eyoka lifayali lin’ekiko, nko lina lokeseli; ohonde ena mbusa liho yatel’iy’anakikyamaki la liho bemamo bena mwi, nk’emamo bena mbongi.

¹²Lacin’eho, biledya bakasa banalengela ko la baongo banamunya;

¹³ko bokodya mboka ina cilili lacin’ena bakak’anino, lacin’ende onoyali l’etumbe atongokungyama mboka: akoli lacina aikyame.

¹⁴Bitanaka la mwi eneyali bato bahatu, ko la njekyama en’oeka, lacina, enefan’oto eho, afayene Nkolo.

¹⁵Boongya lilenda lacina boto’omoi atongo yunganya isei ina Yakomba; lacina boluo bomoi bon’ololo botongomela, ko bokotungy’ino, ko lacin’ena boho bato bike baehyama la nsefo;

¹⁶lacina boto’omoi atongoyala boto’ona lisamba, yombo boto oninda boeka, yoka Esau, onokafaki lifoka linande lina ngolo lacin’ena etate emoko ena toma tona ndaka.

¹⁷Lacin’ino bey’oka, eneki’nd’olangaka ena mbusa ate asangole bosako, atimedyama; lacin’oka atasungya etelo ena njokanya, kang’afonaki yoi liho la locinji ko la mposoli.

¹⁸Lacin’ino botaya ena lingonji linakolana lifomwa bakasa, ko yafeta la nkoi, ko botaya ena lilo lina ficifici, l’ena liucu, ko la lofongo lona lokolo,

¹⁹ko la lofoso lona kilolo, ko l’efodya en’aoyi bana ntenda; iy’anokaki efodya eho baondaki, yoi limoi litatendamake eneyal’iyo;

²⁰lacin’iyo batakolana yitedya boeka bonekyamaki, ate, Yombo lingonji yafomwa nko la nyama kei, eho engoyakama la mpusa ena baufe;

²¹ko enelo enenyaki eyaaki ena losomo loneloleki nko ndeka mene, ko Mose mene ailaki, ate, Laanga nko mbanga mene, ko lilima la losomo.

²²Ohonde bomoya ena lingonji lina Siona, ko l’en’onyanga bona Yakomba onoyike, nko Yelusalema ena loola, ko l’eneyali beloi bena bikima bina loola binifeyana laali,

²³ko l’eneyali esusanelo la Ekelesia ena bana-ngolo banatengama baina ena loola, ko l’eneyali Yakomba, Ntenji en’akambo en’ato bahatu, ko l’eneyali belimo ben’ato bana mbongi banakolanyama nko nkolana,

²⁴ko l’eneyali Yesu, Bolekya bon’eteelo ena lisangya lina litoto, ko l’eneyali bakila bana mpakisodya banatenda baoyi banaleki baho bana bakila bana Ebele bolotsi.

²⁵Boongya lilenda, botongofengol’ende onotenda mpengola. Yomb’iyo bataat’ale elotelo’ale enek’iy’ofengolak’ende onotendaki baoyi bana Yakomba ena loko, nd’ate iso banatumel’ende mbusa onotendana ena loola, tofalotisa tu.

²⁶En’esik’eho efodya enande elidyaki’ale loko; ohonde isanga amosembya esemba, ate, Nongolidya loko lakina, bolidya bomoko, ko efa loko kei: nongolidya le loola nkoho.

²⁷Koko yoi line, Lakina bolidya bomoko, yatosumola nko njumola ena bikambwa binilidyama, nk’eyoka bikambwa bininunolamaki, lacin’eho bikambwa binifalidyame bicikale.

²⁸Lacin’eho, enatamb’iso lifoka linifalidyamisa, toongya liyalama la lokango, lacina tokambela Yakomba la loho l’okotua bonatang’ende bolotsi, nko l’ekumedyo ena lokumo ko la mbanga.

²⁹Lacina Yakomba eniso ayali nko nkoi eneyafete la ndungola.