Read ngando Ba-Ebele 13 Bible Online

Ba-Ebele 13 - ngando bible

Ba-Ebele 13

¹Boongya lilangana yoka bakune l’otoolo.

²Botaofelake nsangela ena befenda; lacina yok’oho bamoi basangelaki’ale bikima bina loola, batey’oka bayaaki bikima.

³Bokanedyaka iy’anatungi en’enyolo, nk’eyoka inoamene bosokotungama l’iyo; ko l’iy’ananyomama, lacin’oka inoamene boyali nk’ena yonge.

⁴Ekoli lacina liala likumyame l’ato bahatu, ko ntange eyalame nko soto; lacina Yakomba angokoiya banalikele la bana-lisamba likambo.

⁵Botayalamake balangi bana francs. Bokisak’ase la toma tonatoat’ino, lacin’oka endamene amila, ate, Mpakocikaki tu, ko mpakumbelaki tutu.

⁶Lacin’eho, iso tokolana yila la njimedya mene, is’ate, Yawe ayali bokambi’onami, mpaangaki tu: Boto asokonjilel’emi yoi lika nai?

⁷Bokanedyaka iy’anilamaki ena lifoka eneyal’ino, banakosumolak’ino yoi lina Yakomba; bokanelaka nsimbo en’ekendelo eniyo, ko bokilana l’okotua bon’imeedyo iniyo.

⁸Yesu Masiya ayali bokotua nk’omoko: bin’onoki loi, la bon’in’one, la bisike bihitu afacikitana tu.

⁹Botatolamake bili l’ili la balako ban’ekotua l’ekotua ko la balako banafey’ino; ekoli lacina botema bocidyame l’isei, efa la toma tona ndaka: toho totaatel’iy’anakanelaki toho nkita.

¹⁰Iso toyali la mesa ena mbeka, ko iy’anasaela botumb’oho bon’esenda bafan’etelo oyola toma ena mesa eho.

¹¹Lacina nyama iho inatola nkanga en’iyome bakila baniyo ena Etenyi en’oeka yoka mbeka lacin’ena baoyi’owe, beduo bena nyama iho beotumbama ena mbiolo en’esusanelo.

¹²Lacin’eho, Yesu nkoho aenaki bino ena mbiolo en’ofolo, lacina aekya bato en’oeka l’akila bananda mene.

¹³Lacin’eho, akoli eneyal’iso tofole l’ende ena mbiolo en’esusanelo, totole lotango lonande lon’owe.

¹⁴Lacin’iso tofan’onyanga bonongoyala locelamendo: toyafone boho bonongoya linga.

¹⁵Bolotsi tolekya mbeka l’ende, nko mbeka ena nkumya ena Yakomba bisike bihitu, nko bemamo bena nkefu inayimedya lina linande.

¹⁶Koko botofelake likamb’olotsi ko bokambyana; lacina Yakomba atanga inbeka ina bokotu’oho bolotsi.

¹⁷Bofik’iy’anilama ena lifoka eneyal’ino, ko baimedya la lifiko, lacin’iyo batombanya lacin’ena belimo’enino yoka bato banangolokola linga boloko’oniyo; lacina baile yoi liho l’enyanga, efa la lokeseli: bokotu’oho bofakoatel’ino nkita.

¹⁸Botoondel’iso; lacin’oka tokanel’is’ate botem’oniso bofatokoiya likambo, ko tolanga tokambe l’ekambelo ena cilili en’aoyi bahatu.

¹⁹Ko lakosomy’ino losomo la ndeka, bile yok’osamb’one lacin’eho emi mbutodyame eneyal’ino isasanga.

²⁰Koko Yakomba ena mwi, onucisaki lakina enek’anawaki Botombanyi’oho bona mpate bon’okolo, l’akila ban’eteelo ena lisangya ena bisike l’isike, nko Nkolo eniso Yesu;

²¹Endamene akoongy’ino nko mbonga ena bikambwa bihitu bin’olotsi, lacina bile eango enande, ko akambe eneyal’ino ekambwa enetangam’olotsi en’oso’onande, nko la Yesu Masiya; lokumo eneyal’ende bisike la bisike. Ndoho.

²²Koko lakoond’ino, bifili, biitedya yoi line lina lilako; lacin’oka mokotengel’ino baoyi banafan’ike.

²³Beyak’oka efili eniso, Timoteo, amotungwa, ko yombo afalingalinga liya, tongokeen’ino, emi l’ende.

²⁴Bees’iyatu banilama ena lifoka eneyal’ino, ko la ban’oeka bahatu. Iy’anayali baise Italia bakees’ino.

²⁵Isei iyalamake l’inatu. Ndoho.