Read ngando Ba-Ebele 2 Bible Online

Ba-Ebele 2 - ngando bible

Ba-Ebele 2

¹Lacin’eho, ekoli lacina tokanedya baoyi banak’is’ookaka nko nkanedya mene, totongoyunga ena baho.

²Lacin’eho, yombo yoi linaliki bikima bina loola otendaka licidyamaki locili, ko bikwelo bihitu la bepokatoi behetu beataki boluko bona nsisodya bonakolana,

³yomb’iso tofakanele liiko loho lona lokolo, tongata elotelo bosamb’oya? Liiko loho losumolamaki la Nkolo ena limatsako ko lokikyamaki eneyal’iso nko l’iy’anokaki.

⁴Yakomba aambanaki l’iyo en’osimo’oho, la ndembi la bikambwa bina mpefa la bikambwa bina locili bin’ekotua l’ekotua, ko la nganji ina Bolimo bon’olotsi, bosamb’onoki eango enande oyalaka.

⁵Lacin’ende atila loko loho loneloyayi, lonand’iso, ena lifoka lina bikima bina loola.

⁶Koko boto’omoi amila en’edye emoi, ate, Boto and’oya, lacina okanel’ende? Yombo bon’on’oto, lacina omoyengya?

⁷Omil’ende en’ase’a bikima bina loola isalisali, Omololotsa likuka lin’okonde ko la lokumo, Ko omil’ende iyome ina bikambwa bin’akas’ane;

⁸Omila baoyi bahatu en’ase’a bakak’anande. Eneki’nd’oilaka baoyi bahatu ena lifoka linande, atacika yoi limoko linitilama ena lifoka linande. Koko isanga totene’oka baoyi bahatu bamilama ena lifoka linande;

⁹ohonde ten’ende onilamaki en’ase’a bikima isalisali, nko Yesu; lacin’ena bino bin’ewedi amolotsama likuka lin’okonde ko la lokumo, lacin’eho, l’isei ina Yakomba, aene bewedi lacin’ena boto l’oto.

¹⁰Lacina yoi limokolana l’ende (bikambwa bihitu biyali lacin’enande, ko biyali eneyal’ende), eneki’nd’olondaka bana bike en’okonde, aongya Bomatsi bona liiko loniyo nko mbonga mene la njena bino.

¹¹Lacin’oka, l’ende oneky’ato en’oeka l’iy’anekyama en’oeka bayali nk’eneyali omoko. Lacin’eho, ende afoke nsoi enatang’ende baho bifili,

¹²ate, Nongosumola bifili binami lina line, Ko ena ntoto en’osolongano nongemba lokumo lone.

¹³Ko lakina, Nongil’otem’onami eneyal’ende. Ko lakina, Lenda, emi l’ana banaki Yakomba ompaka.

¹⁴Lacin’eho bana basangi nko bonufo l’akila, endamene aambanaki l’iyo ena baho nk’osamb’oho, lacina l’ewedi aehy’ende onoyaaki la mpamba ena bewedi, nko Satana;

¹⁵ko atungole iyo banayaaki ena yombo nko l’eotwelo eniyo lacin’ena bofolu bon’ewedi.

¹⁶Lacin’ende, solosolo, afunde bikima bina loola oyakambya: banund’ende oyakambya nko ban’ana Abalayama.

¹⁷Lacin’eho, emokolana l’ende lacina akolane l’ifili’inande en’aoyi bahatu, lacina ayalame nkanga iyome en’isei l’ena solosolo en’aoyi banayali eneyali Yakomba; ko ayalame mbeka lacin’ena baoyi’owe ban’ato.

¹⁸Lacin’oka endamene amen’ino la lomeko loneloki’nd’omekamaka, ko lacin’eho ainya likambya bato banamekama la lomeko.