Read ngando Ba-Ebele 4 Bible Online

Ba-Ebele 4 - ngando bible

Ba-Ebele 4

¹Lacin’eho, eneki esemba ena ntuaka ena lifomya linande ocikamaka, tokoli lacina toke losomo, lacina omoi’onino atongoyala yoka onunganya esemba eho.

²Lacin’oka isoamene nkoho tomolakama l’osimo bon’olotsi nko bosamb’onok’iy’olakamaka; koko yoi lina njoka litaatel’iyo nkita, lacin’oka liho litasanganyama l’imeedyo eneyal’iyo banokaki.

³Lacin’iso banimedyaki totua ena lifomya liho; yoka bosamb’onoki nd’oilaka, ate, Yok’onoki’m’otehaka ena nkele enami, emite, Iyo bafayatua ena lifomya linami; kanga bikambwa bihitu bisilaki likambama ena limatsako lina loko.

⁴Lacin’oka amotenda yok’one en’ili’omoi ena likambo lina bina bona nsambo, ate, Ko Yakomba afomyaki ena bikambwa binande bihitu en’ina bona nsambo;

⁵ko lakina en’ili’one, ate, lyo bafayatua ena lifomya linami.

⁶Lacin’oka yoi liciki lacina bamoi batua ena lifomya liho, ko iy’analakamaki l’osimo bon’olotsi en’oso batatua lacin’ena lopoko,

⁷aut’okodya bina botutuma, nko Bon’in’one, enatend’ende l’onyua bona Dawidi, eneki elela oetaka, yok’onoki yoi otendamaka en’oso, ate, Bon’in’one yombo bongoka efodya enande, Botacilingitanyake betem’enino.

⁸Yombo Yoswa aafaki’ale lifomya, tumbe Ende atit’okodya bin’okina ena mbusa.

⁹Lacin’eho, sabata ena lifomya eciki eneyali bato bana Yakomba.

¹⁰Lacin’ende onotua ena lifomya linande amofomya ena bikambwa binande, yok’onoki Yakomba ofomyaka ena bikambwa binande.

¹¹Lacin’eho, akoli eneyal’iso tofone la locinji lacina totua ena lifomya liho, lacina boto’omoi atongoyokwa ena lopoko yok’onok’iy’okwak’ale.

¹²Lacina yoi lina Yakomba liyaike, ko liyakambe ekambwa, ko yofeta nko mpeta eneleki lokula lon’ita lon’etaketaka lona beselek’efe, ko yotua nk’ena mbambola en’otema l’olimo, ko l’ena biyongamelo la mpongo ina biuha, ko likoli lacina lifokole nkanyi ko la biango bin’otema.

¹³Efan’ekambwa enenunolama enefenya en’aiso’anande; bikambwa bihitu biyali nk’eyoka bolumbulumbu ko bienya fololo en’aiso’anande onoyali mene’eniso.

¹⁴Enat’iso nkanga en’iyome mene ena lokumo onotianyaki loola, nko Yesu Bon’ona Yakomba, tundamelake njimedya eniso.

¹⁵Lacin’oka tofaate nkanga en’iyome onofatokamel’iso isei ena tongitongi toniso; ohonde toyali la nkanga iyome onomekamaki en’aoyi bahatu yok’iso, koko atila yoi lin’owe tu.

¹⁶Lacin’eho, tolamake l’ieko in’isei efan’ofolu, lacina totambe isei, ko tosungya isei ineyatokambya en’esike enelingitan’iso.