Read ngando Ba-Ebele 6 Bible Online

Ba-Ebele 6 - ngando bible

Ba-Ebele 6

¹Lacin’eho, tocike yoi lina limatsako lina Masiya, ko tombocoa yengoko toyela ena baoyi banakolana nko nkolana; tofaange lakina eango ena njumbela ena bikambwa biniwaki, ko l’imeedyo eneyali Yakomba,

²ko la lilako lina njina ena basi, ko la ntadya ena bakasa, ko l’eetwelo ena banawaki, ko l’etendelo en’akambo en’ina bona nsimbo.

³Ko tongokusa likenda yok’oho yombo Yakomba aimedya.

⁴Ko ena likambo liniyo baneyaki’ale fololo, ko batambaki nganji ina loola, ko baambanaki ena Bolimo bon’olotsi,

⁵ko bamekaki yoi lin’olotsi lina Yakomba ko la mpamba en’esike eneyayi,

⁶koko bakwaki: njucisa en’ato’aho en’eyokanelo efaonge tu; lacin’oka lyoamene bayaka lakina Bon’ona Yakomba en’ekulusu ko baoky’ende nsoi eneyali bato.

⁷Lacina loko lonelomela mbula enalwa loho bisike bike, ko loota toma tonatokolana l’iy’anaki loko osalamaka, loho losakelama bosako eneyali Yakomba.

⁸Koko yombo loko loho loota beenge ko l’afengolankoi, lokilama, ko loolama l’omomo; esimbelo ena loho nk’etumbelo.

⁹In’analangama, kanga totenda yok’osamb’one, iso timedy’oka baoyi banaleki bane l’olotsi bayali enek’ino, ko l’aoyi banambana la liiko.

¹⁰Lacina Yakomba afinde mbongi lacina aofele ekambwa enino mbofela, ko la nganji enino ena lolango enek’in’oenyanyaka lacin’ena lina linande, enek’in’okambyaka ban’oeka, ko boyakamby’iyo nk’isanga.

¹¹Ko tolanga lacina boto l’oto aenyanya mposa eho ena locinji la mpula ena ndengedya yengoko nsimbo;

¹²lacina bofayalame la mponya, ohonde lacina bookole bokotu’oniyo banasangola bisemba lacin’en’imeedyo la nkikya en’otema.

¹³Lacina, eneki Yakomba osembedyaka Abalayama esemba, enetaat’ende okina onoleki ende lacina atehe l’ende, atehaki nko l’endamene;

¹⁴ate, Nko solosolo mene, enasak’emi bosako, nongokosakel’e bosako, ko enafudy’emi bana, nongokofuedy’e bana.

¹⁵Ko yok’oho, eneki’nd’olengedyaka la locinji, atambaki esemba eho.

¹⁶Lacina bato bateha seko nko l’on’omoi onoleki, ko enatan’iyo ntango, lisangya yakikya yoi limoi, ko ntango eokala nkwaho.

¹⁷Nk’osamb’oho, eneki Yakomba olangaka lacina atume basangoli ban’esemba nko ntuma mene eango enande enefacikitana tu, atehaki lisangya nkoho;

¹⁸lacin’eho, l’aoyi’afe banafacikitana tu, banafafotisa Yakomba mpoci tu, iso tokikyame nko locili mene, is’analotaki en’efisamelo lacin’eho tundamele lolendedyo loneloyali en’oso’oniso,

¹⁹lonat’iso nk’eyoka mboko en’olimo, lolendedyo lonelocila locili mene, ko lofalile tu, ko lotua meho en’ili bon’esenda ena ndelo;

²⁰bili bonoki Yesu onetaki en’oso otuaka lacin’eniso, eneki’nd’oyalamaka nkanga iyome mene ena locela, yoka bosamb’onoki lifoka lina Malekisedeke oyalaka.