Read ngando Ba-Ebele 7 Bible Online

Ba-Ebele 7 - ngando bible

Ba-Ebele 7

¹Boto’one Malekisedeke, lifoka lina Salema, nkanga ena Yakomba eneleki nko ndeka, ende onukanaki’ale l’Abalayama kum’ayute en’eyakelo ena bafoka, ko aosakelaki bosako;

²ende onoki Abalayama ofak’ale liondo limoko lina baondo jo-jo lina toma (Malekisedeke ayaaki en’oso nko Lifoka lina Mbongi—ncina ena lina linande nd’eho—koko lakina Lifoka lina Salema, nko Lifoka lina Mwi;

³afan’efango, afana nyango, afan’eandelo en’eotwelo, afan’ematsedyo ena bina ko afan’esimbelo ena liiko, ohonde amokolanyama yok’ekolanya ena Bon’ona Yakomba): ende amoyalama nkanga nko njalama.

⁴Koko bokanelaka lifoka lin’okolo lina boto’one onoki Abalayama nkya en’alale ofak’ale liondo limoko lin’aondo jo-jo lina toma tonatoleki’olotsi tonatoki’nd’oundaka.

⁵Ko solosolo ban’ana Lewi banata etelo en’osala bona nkanga bamofam’etelo lacina batambe liondo limoko lin’aondo jo-jo lina toma tona bato, yoka bosamb’onoyali basangya, batambe nk’eneyali bifili’iniyo, kanga bato baho baotwaki en’ecimo ena Abalayama.

⁶Ohonde boto’one onotaandama eotwelo eneyal’iyo atambaki liondo lina jo-jo eneyali Abalayama, ko asakelak’ende onoyaaki la bisemba bosako.

⁷Koko efana ntango, ende onise lifoka lin’isisali kei asakelama bosako l’ende onise lifoka lin’okolo.

⁸Ko mendo bato banawa batamba liondo limoko lina jo-jo; koko meho, omoi onoki temoins oilaka mbo ayike, atambaki.

⁹Koko, yombo tokolana yila yok’one, nko le Lewi onotamba liondo limoko lina jo-jo alekyaki liondo liho nko la Abalayama,

¹⁰lacin’oka ende ayaaki ena yonge lina nkya enande en’esike eneki Malekisedeke oukanaka l’ende.

¹¹Koko yombo bato baongaki’ale nko mbongi mene lacin’en’ekambelo ena nkanga ena Lewi (lacina bato batambaki’ale basangya nko l’ekambelo eho ena nkanga), ncina eka nai enek’iy’olelaka nkanga ekina aemale l’okotua bon’ekambelo ena nkanga ena Malekisedeke’ale, ko afaandame l’okotua bon’ekambelo ena nkanga ena Aluna?

¹²Lacin’oka yombo bokotu’oki-na bona nkanga bomokitanya, efana ntango bokotua bona beeka bongocikitana nkoho.

¹³Lacin’ende onok’iy’otendaka baoyi’ane lacin’enande ayali boto’ona boloi’okina, ko ena boloi’oho efaate nko le boto onokambaki ena mesa ena mbeka.

¹⁴Lacina yoi line liyali nko fololo: lika, Nkolo eniso aotwaki en’oloi bona Yuda; ko ena likambo lina nkanga, Mose atatend’ale nko le yoi limoko lacin’ena boloi’oho.

¹⁵Ko yoi line liyali fololo mene eneleki, lacin’oka nkanga emoi amemala l’okotua bon’ekambelo ena nkanga ena Malekisedeke’ale,

¹⁶ko atilama nkanga l’okotua bonoki lisangya lina lotomo lona yonge oyalaka: amilama nkanga yoka bosamb’onoyali mpamba ena liiko lonelofakale.

¹⁷Lacina yoi liyali lacin’enande, ate, E oyali nkanga ena locela, Yok’onoki lifoka lina Malekisedeke oyalaka.

¹⁸Bokotua bona lotomo lon’oso’ale bomoyakama lacin’ena boolu bona boho, ko lacin’oka boho biindaki nkita,

¹⁹(lacina basangya bataongy’ale yoi limoko mbonga), ko lolendedyo loneloleki’olotsi lomolata, ko iso toolama la Yakomba la loho.

²⁰Ko yoi line litilama kum’efana lisangya.

²¹(ban’amoi bailamaki ena lifoka lina nkanga, solosolo, efana lisangya; ohonde ende ailamaki la lisangya linande onilaki lacin’enande, ate, Yawe amoteha lisangya, ko afayokanyaki, ate E oyali nkanga ena locela),

²²nk’osamb’oho Yesu amoyalama bolekya bon’eteelo ena lisangya eneleki’olotsi.

²³Ko solosolo iyo bamilama nkanga bike mene; bafakolana liyalama njalama, lacin’oka bewedi beyali;

²⁴ohonde ende, lacin’oka ayali locela nko njalama, ayali la lifoka linande lina nkanga linalifan’oto okitany’ende.

²⁵Lacin’eho, ainya yikya iy’anolama la Yakomba mbikya mene l’ende, lacin’oka ende ayike locela oyaondel’iyo.

²⁶Bokotua bona nkanga iyome bonakolana l’iso bolotsi nd’oho, nko nkanga en’oeka, onofana longo, nko soto, onelana l’ato ban’owe njelana, ko oniledyama ena liko lina loola;

²⁷onofan’osala bona ndekya mbeka bina l’ina, yoka nkanga iho ina toome, en’oso lacin’ena baoyi’owe banandamene, ko ena mbusa lacin’ena baoyi’owe ban’ato; lacin’oka ailaki’oho boila bomoko bona locela, eneki’nd’oyolekyaka endamene mbeka.

²⁸Lacina basangya baila bato banayali la tongitongi nkanga ina toome; ohonde yoi lina eteho, eneyaki ena mbusa en’asangya, yila nko Bona onongyamaki nko mbonga locela.