Read ngando Ba-Ebele 8 Bible Online

Ba-Ebele 8 - ngando bible

Ba-Ebele 8

¹Ko en’aoyi banatend’iso, yoi lin’oso linalileki liho line: Toyali la nkanga iyome mene en’okotu’oho, onokisak’ase en’ili bona likasa y’ome bon’ieko ina Lifoka lina Mpamba ena loola,

²nko bokambi onokamba en’edye en’oeka, l’en’otumba bon’esenda bona solosolo bonoki Nkolo oemadyaka, ef’ato.

³Nkanga la nkanga en’iyome ailama lacin’eho alekya nganji ko la mbeka; koko ekoli lacina nkanga ene en’iyome mene nkoho aate mbeka enaleky’ende.

⁴Yombo asokoyala ena loko, tumbe atayala nkanga, lacin’oka iy’analekya nganji bosamb’onoyali basangya bayali,

⁵nk’iy’anasaela yoi liho linaliyali nko ndembi la lilila lin’aoyi bana loola, nko bosamb’onoki Mose olakamaka la Yakomba, eneki’nd’omatsak’ale lifaka botumba bon’esenda: ailaki, ate, Noka, ongya likamba bikambwa bihitu yoka bosamb’onoyali ndembi enek’otumamaka ena lingonji.

⁶Ohonde isanga amolata ekambelo eneleki’olotsi, lacin’oka ayali bolekya bon’eteelo ena lisangya eneleki’olotsi, enetehamaki la bisemba binileki’olotsi.

⁷Yombo eteelo ena lisangya eneki’oso etaat’ale ncina ena lofeli, tumbe eteelo ekina ena lisangya lina litoto etakembama.

⁸Lacin’oka afelak’iyo lofeli, ate, Yawe aila, ate, Lenda, bina bengoya Benengi’m’oteela boloi bona Yisalaele ko l’oloi bona Yuda lisangya lina litoto;

⁹Efa bosamb’onoyali lisangya linfki’m’oteelak’ale bafango’aniyo, En’ina bonoki’m’oundak’iyo la likasa lacin’eho njafodya en’onyanga bona Ejipeto; Lacin’iyo batacindelana ena lisangya linami, Ko emi ntakanel’iyo. Yawe aila yok’osamb’oho.

¹⁰Koko Yawe aila, ate, Lisangya liningi’m’oteela boloi bona Yisalaele, Ena mbusa ena bina beho, liho line: Nongila beeka benami ena nkanyi iniyo, Ko nongotenga beho en’etem’eniyo, Ko nongoyala Yakomba eniyo, Ko iyo bangoyala bato’anami.

¹¹Ko bafalakaki boto l’oto boto onoli l’ende, Ko boto l’oto efili enande, Mbo, eyaka Yawe; Lacin’iyatu bangonjeya, Nko l’ende onoleki isisali yengoko ende onoleki’okol o enek’iyo.

¹²Lacin’emi nongokamel’iyo baninda mbongi isei, Ko mpakanedyaki baoyi’owe’aniyo lakina tu.

¹³Enil’ende, ate, Lisangya lina litoto, amila liho liniki’oso nk’eyoka limoyalama lin’alale. Koko iyema iniyalembe ko yokinda yolama la njuma.