Read ngando Ba-Ebele 9 Bible Online

Ba-Ebele 9 - ngando bible

Ba-Ebele 9

¹Koko eteelo ena lisangya eneki’oso eyaaki l’eeka bena ekumedyo ena Yakomba, ko l’edye en’oeka ena loko lone.

²Lacina botumba bon’esenda bofakamaki, ko etenyi en’oso eyaaki l’ilelo ena moinda, la mesa, ko la mampa en’oeka: etenyi eho eotangama Etenyien’oeka.

³Ko en’ili bon’esenda ena ndelo en’ife, etenyi emoi eyaaki enetangama Boeka bon’eeka.

⁴Etenyi eho eyaaki la mesa ena wolo ena ntumba ena toumba, ko la sanduka ena lisangya enekundamaki bili behetu la wolo, ko ekala ena wolo eneyaaki la mana eyaaki ena ntundulu ena sanduka eho, ko la bonganza bona Aluna bonomelaki njoiya, ko la mesa ina baufe ina eteelo ena lisangya;

⁵ko bakeluba ban’ekoka batalamaki ena liko lina sanduka eho, banakundaki nkici en’isei la lilila liniyo: koko ena likambo lina toma toho tofakolana lisakitola yoi la yoi litutuma isanga.

⁶Eneki toma toho okodyamaka yok’oho, nkanga batueela bisike bihitu en’etenyi en’oso, ko bakamba bikambelo bin’ekumedyo.

⁷Ohonde en’etenyi en’ife nkanga en’iyome kei atua mbula la mbula botua bomoko, ko afatua yengoko atol’akila banaleky’ende lacin’enandamene ko lacin’ena baunga ban’ato.

⁸Yok’oho Bolimo bon’olotsi aenyanya yoi line: noka, kuma botumba bon’esenda bon’oso bemali, mboka enepusola ena Etenyi en’oeka etakombwa.

⁹Botumb’oho boyali nk’ekolanya en’esike ene, enalekyama nganji la mbeka inifinya yatela bokumi mbongi enakolana ena likambo lina lokanyi lon’otema;

¹⁰beeka beho beyali bena yonge kei (la toma tona ndaka, la bimeelo, ko la biokelo bin’asi bimoi bike), beeka benekyamaki yengoko esike ena mbongya en’aoyi.

¹¹Koko Masiya amoya, nkanga en’iyome mene en’aoyi ban’olotsi banayayi, nko l’otumba bon’esenda bonoleki’okolo ko boleki la mbongi enakolana, bonotafakama l’akasa, lacina boho bofayali ban’enunwelo ene.

¹²Ende atuaki en’Etenyi en’oeka, efa l’akila bana nta ko l’akila bana ban’ana ngombo: atuaki botua bomoko bona locela nko l’akila banandamene, ko aataki etungwelo ena locela.

¹³Yombo bakila bana nta l’ana ngombo ina mpame ko l’etoko bena ngombo en’oyoto en’onome mpakisodya eneyali bato banehyama la mbindo bamaekya en’oeka ko bamasiedya nsefo ena yonge:

¹⁴bakila bana Masiya, onoyolekyak’endamene mbeka eneyali Yakomba, mbeka enefana lianda, nko la Bolimo bona bisike la bisike, bafaleki nde likula lokanyi lonino lon’otema ena bikambwa biniwaki lacin’eho bosaele Yakomba eneyike?

¹⁵Ko la ncina. ene ende ayali bolekya bona lisangya lina litoto, lacin’eho iy’anelelamaki batambe esemba ena lisango lina locela, la ncina eneki bewedi oilamaka mbiko lacin’ena baoyi’owe banilamaki en’esike ena lisangya liniki’oso.

¹⁶Lacina yombo liciki liyali, lifanongana yengoko bewedi ben’oto onocikaki liho beyali nkoho.

¹⁷Liciki yakikyama nk’eneki boto owaka: liho lifana ncina ntutuma kum’ende onocika liho ayali.

¹⁸Lacin’eho, nko le lisangya liniki’oso litatehama kum’efan’akila.

¹⁹Eneki Mose okadyaka lisumola bato beeka behetu bosamb’onoyali basangya, atambaki bakila bana ban’ana ngombo ko l’akila bana nta, ko la basi, ko la besa bena ngola, ko la hysope, ko afakisodyaki le bokanda mene le bato bahatu,

²⁰ko ailaki, ate, Bane nko bakila bana lisangya linaliki Yakomba okoteelak’ino.

²¹Koko afakisodyaki botumba bon’esenda ko la bikala bin’ekambelo bihitu nk’osamb’oho, nko l’akil’aho.

²²Ko en’ekambelo en’asangya, tosokokolana yila, is’ate baoyi bahatu bakulwa nko l’akila, ko nk’efana njutela en’akila, efan’etungwelo en’aoyi’owe.

²³Lacin’eho, ekoli lacina bikolanya bina baoyi bana yali ena loola bikulwa la toma tone; ohonde ekoli lacina baoyi mene bana loola bakulwa la mbeka inileki ine bolotsi.

²⁴Lacina Masiya atatua en’Etenyi en’oeka enilamaki l’akasa, nk’ekolanya en’etenyi eho ena solosolo: amotua nk’ena loola mene, lacin’eho aenya isanga en’oso bon’elongi ena Yakomba lacin’eniso.

²⁵Ko efa lacina ayoleky’endamene belekya bike, yoka bosamb’onatua nkanga en’iyome en’Etenyi en’oeka mbula la mbula l’akila banafayali banandamene:

²⁶yombo esokoyala yok’oho, tumbe aenaki bino beena bike nk’ena limatsako lina loko; ohonde isanga ena nsimbo ena bisike amenya benya bomoko kei lacina aumole baoyi’owe nko la njolekya enandamene yoka mbeka.

²⁷Ko yoka bosambo bonokodyama eneyali bato bawu bowa bomoko, ko en’ili bon’ewedi’eho nk’etendelo en’akambo,

²⁸nk’osamb’oho Masiya, eneki’nd’olekyamaka mbeka bolekya bomoko lacina atole baoyi’owe ban’ato bike, angenya benya bon’efe, njelana l’aoyi’owe, eneyal’iyo banolengedya, lacin’ena liiko.