Read ngando Yakobo 1 Bible Online

Yakobo 1 - ngando bible

Yakobo 1

¹Yakobo, boombo bona Yakomba la Nkolo Yesu Masiya, eneyali beloi jo l’efe beneyali en’efafandelo: Lakees’ino l’enyanga.

²Bifili binami, enakosambanya mmeko ina bekotua l’ekotua, ekoli lacina botange yoi liho nk’ekiko;

³lacina bey’oka emekelo en’imeedyo inino eokoatel’ino locinji.

⁴Koko ekoli lacina locinji lokambe ekambwa enande ehatu, lacina ino boonge nko mbonga, ko bokoke, ko bafinde iyema.

⁵Yomb’omoi’onino ainda bomwu, aufole Yakomba, onof’ato bahatu la mpula, ko afafele lofeli, ko boho bongofama eneyal’ende.

⁶Ohonde aufolake nko l’imeedyo, efan’okandokando. Lacin’ende onokandakanda ayali nk’eyoka basi bana lose l’okwa banalidyama la lofongo ko batomama bili l’ili la loho.

⁷Boto’oho atakanelake ate angotamb’iyema eneyali Nkolo:

⁸boto’ona nkanyi ife akandakanda en’aoyi’anande bahatu.

⁹Ekoli lacina efili onofana lokumo anyangele bokotua boniledyam’ende;

¹⁰koko ntuki ena toma anyangelake enakitsam’ende, lacin’oka ende anguma nk’eyoka liyeya lina tolenge.

¹¹Lacina bina bokya ko bane bofula nko bik’ike, ko bonyeladya tolenge, ko liyeya lina toho yokwa, ko bokoka bon’okotua bona toho behyama: nk’osamb’oho ntuki ena toma angehyama ena bikambwa binande.

¹²Boto onitedya lomeko lonamekam’ende akik’ekiko, lacin’oka enengi’nd’olongyama, angotamba likuka lina liiko, linaliki Nkolo osembedyak’iy’anok’ende nganji esemba.

¹³Enamekam’oto lomeko, atilake, Mbo emi lamekama nde la Yakomba; lacina Yakomba afamekama la bowe, ko Endamene afameke boto tu.

¹⁴Ohonde boto l’oto aomekama nk’enasumam’ende la mposa enandamene eneleki, ko aongama longo l’eho.

¹⁵Nkwaho mposa enande eoyalama la yemi, ko eota yoi lin’owe; ko enatunda yoi lin’owe, liho yoot’ewedi.

¹⁶Bifili binami banalangama, botafotamake.

¹⁷Bifaelo bihitu bin’olotsi la nganji ihatu ineyonga nko mbonga yoya ena liko, ko yokita eneyali Bafango’ona fololo ehatu, onofacikitana tu, ko afana lilila linilama la njokengola.

¹⁸Atootaki la yoi lina solosolo, nko l’eango enandamene, lacina toyalame yoka bemamo ben’oso bena bikambwa biniki’nd’onunolaka.

¹⁹Bifili binami banalangama, ino beya yoi line. Akoli eneyali boto l’oto aoke yaya, koko atatendake yaya, ko atokake nkele yaya,

²⁰lacina mbongi ena Yakomba efilama la nkele en’oto.

²¹Lacin’eho, bumolaka baoyi bahatu bana nsefo ko l’esokwelo bik’ike ena bowe; ko botambaka la njofima yoi linalifusama eneyal’ino yoka boona, yoi lineyikyisa belimo’enino.

²²Koko boyalamaka bakambi bana yoi, efa baoki kei: yok’oho boyofot’inoamene.

²³Lacina yomb’oto ayali booki bona yoi ko afayali bokambi, ayali nk’eyoka boto onolenda elongi enandamene ena talatala;

²⁴lacin’ende ayolend’endamene, ko aocoa, ko isasanga aofela bokotua bonoki’nd’oyalaka.

²⁵Ohonde ende onosisola boeka bononga nko mbonga, nko boeka bon’etungwelo, ko aokusa lisisola boho, ko afayalame booki onoofela isanga, ohonde bokambi onokamb’ekambwa, boto’one angokik’ekiko en’ekambelo enande.

²⁶Yombo’oto’omoi ayotang’endamene bokumi bona Yakomba, koko afafekya lolemi lonande, ko aofota botem’onandamene, ekumedyo enakumya boto’oho Yakomba eyali nko bototoloto.

²⁷Ekumedyo ena solosolo l’ena soto en’oso bona Yakomba, Bafango’oniso, eh’ene: njengya ena biciki ko la bayato bana beweli ena bino biniyo, la njomonya enandamene efana lianda lin’aoyi bana loko tu.