Read ngando Yakobo 2 Bible Online

Yakobo 2 - ngando bible

Yakobo 2

¹Bifili binami, botaatake imeedyo ina Nkolo eniso Yesu Masiya, Nkolo en’okonde, la likai eneyali bato.

²Lacina yombo boto atua en’osolongano’onino la lofete lona wolo, ko ayalote bisenda bin’okoka, koko boto’omoi ona biinda onoyalote bisenda bina mbindo atua nkoho;

³ko ino bolend’ende onolotisi bisenda bin’okoka, ko bomosumola, Mbo e kisase mendo en’edye en’olotsi; koko bosumola boto’ona biinda, Mbo e emalaka meho, yombo, kisak’ase mendo en’ase’a limbolongo lin’akak’anami:

⁴yok’oho ino botayokambwa-nya nde la likai? ko bomoyalama nk’eyoka banakody’aoyi la nkanyi inay’owe.

⁵Bifili binami banalangama, bolofaka: Yakomba atasona nde iy’anayali biinda ena loko lone lacina bayalame batuki ban’imeedyo, ko bayalame basangoli bana lifoka linaliki’nd’osembedyaka iy’anok’ende nganji esemba?

⁶Oho-nde ino bomofima boto’ona biinda lokumo tutu. Banakeeny’ino bino, ko bakosum’ino en’oso bona toeko ton’etendelo en’akambo, efende batuki bana toma?

⁷Iyo bafasaiya nde lina liho linaliseki’olotsi linatangam’ino?

⁸Koko yomb’ino bomonya boeka bonalifoka, yoka bosamb’onoyali bitengelo bina Yakomba, ate, Oka onoli l’e nganji yoka bosamb’onayook’e eamene nganji, biila nk’olotsi.

⁹Ohonde yombo botamba boto la likai, bila bowe, lacin’oka basangya bakoakola nk’oka boyali bafulunganyi ban’eeka.

¹⁰Lacina boto l’oto onomonya basangya bahatu, ohonde aokwa ena yoi limoko, ende amokwa likambo lina basangya bahatu.

¹¹Lacin’oka ende onilaki, ate, Tatatake likele, ailaki, Tayakake boto, nk’osamb’oho. Kang’e ofatate likele, ohonde oyak’oto, yok’oho omoyalama bofulunganyi bon’asangya.

¹²Boongya litend’aoyi, ko bokamb’ikambwa, yoka bato banangoyela linga en’etendelo en’akambo enengokodyama la boeka bon’etungwelo.

¹³Lacin’oka, etendelo ena likambo linande onofokamel’ato isei efayalamaki l’isei; isei yakolana liyokumya’ena liko y’etendelo en’akambo.

¹⁴Bifili binami banalangama, yombo boto aila ate ayali l’imeedyo, koko fana bikambwa, nkita eka nai? Imeedyo iho ikyis’ende?

¹⁵Yombo efili emoi, kangampame kang’oyoto, ayali bolumbulumbu ko afaate nko le toma tona ndaka bina l’ina,

¹⁶ko omoi’onino amasumola, ate, Bocoak’oko’ako, botawake la lifia, boki ndaka liota; ohonde bofaf’iyo toma tonatokolana la baonge—nkita eka nai?

¹⁷Nk’osamb’oho imeedyo, yombo ifana bikambwa, iowa nko ihoamene.

¹⁸Nde, omoi angila, Mbo e oyali l’imeedyo, ko emi njali l’ikambwa; ontume imeedyo ine kum’efana bikambwa, ko nongokotuma imeedyo inami nko l’ikambwa binami.

¹⁹E oimedya ate Yakomba ayali nk’emoko; oila nk’olotsi: bademona baimedya yoi liho nkoho, ko bailima mbilima.

²⁰E, boto bon’ototoloto, ofalange yeya nd’oka imeedyo inifana bikambwa iyali nko bototoloto?

²¹Abalayama bafango’oniso’ale, atayengwa nde boyengo l’ikambwa, eneki’nd’olekyaka Isaka bon’onande ena mesa ena mbeka?

²²Oen’oka imeedyo yamba-naki l’ikambwa binande, ko imeedyo yongyamaki nko mbonga nko l’ikambwa.

²³Ko etengelo ena Yakomba eilamaki, ate, Ko Abalayama aimedyaki Yakomba, ko imeedyo iho iandamaki eneyali ende nk’eyoka mbongi; ko atangamaki efili ena Yakomba.

²⁴Yok’oho bomena, boto ayengwa boyengo l’ikambwa, efa l’imeedyo kei.

²⁵Nk’osamb’oho Laba, atayengwa nde boyengo l’ikambwa, eneki’nd’osangelak’ale bikima, ko amautodya la mboka ekina?

²⁶Yoka bosamb’onawa yongelinifana bolimo, imeedyo inifana bikambwa yowa nkoho.