Read ngando Yakobo 3 Bible Online

Yakobo 3 - ngando bible

Yakobo 3

¹Bifili binami, botayalamake balaki bike, lacin’ino bey’oka etendelo en’akambo’aniso engoleka locili.

²Lacin’isatu tokumba en’aoyi bike. Yomb’oto afakumbe ena yoi lina ntenda, ende ayali nko boto onongyama nko mbonga, oneya Mifekya yonge lihalitu nk’osamb’oho.

³Enil’iso bakama en’enyua bena mpunda lacina batofike mpika, tokengola yonge liniyo lihalitu nko yok’oho.

⁴Lenda, basua nkoho: kanga baseki’okolo ko baotolama la mpongo ina locili, bakengolama la yenda lin’isisali mene bili bon’etaketaka bonalanga boto’ona yenda.

⁵Nk’osamb’oho, lolemi loyali nk’elama en’isisali, koko loyokumya la baoyi ban’akolo. Lenda, nkoi bik’ik’ike nke’ane yofeta nko l’isasi kei.

⁶Ko lolemi loyali nko nkoi; loko loho lona baoyi’owe, loka lolemi, loyali ena ntoto ena bilama biniso, ko lehya yonge lihalitu la nsefo, ko lofetsa boto bohotu yoka nkoi, ko loho mene lofetsama la Ngena.

⁷Lacina bekotua behetu bena nyama la mpulu la towawa la nyama iniyali ena lose l’okwa imololama, ko yololamaki’ale, l’ato;

⁸ohonde efan’oto oninya yolola lolemi: loho loyali bowe mene bona loyenge; ko lomolola la ngenge en’ewedi nko to.

⁹La lolemi tokumya Nkolo, Bafango; koko la lolemi tomom’ato bananunolama en’efoya ena Yakomba bomomo.

¹⁰Nkumya la mmoma bafola en’onyua boh’omoko. Bifili binami, tumbe baoyi’ane bafilame yok’one.

¹¹Iya, etoko eofodya nde basi ban’olotsi la basi ban’ololo en’okole boh’omoko?

¹²Bifili binami, bote bonaliteli aota nde bilaya? bokoli bona vina aota nde bateli? Nk’osamb’oho etoko emoko efakolana lifodya le basi ban’okwa le basi ban’olotsi.

¹³Boto’onino ona bomwu l’ona nnonganya oka nai? Atumake bato bikambwa binande l’ekendelo enande en’olotsi, nko la bomwu ko la njofima.

¹⁴Koko yombo boyali l’ekuku ena locili ko l’okotua bona bikambwanelo en’etem’enino, botayokumyake, ko botafotake solosolo eho.

¹⁵Bomwu boho bofayali bomwu bonokita ena liko: boyali nko bona loko, bona yonge, bona Satana.

¹⁶Lacin’oka en’edye eneyali ekuku la bikambwanelo, loyenge la bikambwa bihitu bin’owe bayali nko meho.

¹⁷Bomwu bonoya ena liko boyali en’oso nko soto, koko boyali bona mwi, l’ona bongompolu, bofafedya boondo, bolola l’isei ko l’emamo ben’olotsi, bofana likai, ko bofan’osimo.

¹⁸Ko bemamo bena mbongi beofusama ena mwi l’iyo banafona mwi.