Read ngando Yakobo 4 Bible Online

Yakobo 4 - ngando bible

Yakobo 4

¹Bita la basa banayali eneyal’ino baoya meya? Bafaye nde lacin’ena mposa inino inayokan’ita bina l’ina ena bilama binino?

²Ino boka mposa eneleki, ko bofaate; boyak’ato ko boka mposa bik’ike ena toma, koko bofaody’iyema; bosa basa ko bofomana; koko bofaate lacina enefaufol’ino.

³Bufola, koko bofatambe, lacina bufola l’okotuabonofakolana: bolanga lacina bokaf’eho lakina la mposa ininoamene.

⁴Ino bato bana likele I bofeya nd’oka efili ena loko eyali nko njoka ena Yakomba bowe? Lacin’eho, boto onolanga ate asimbane efili la loko, angoyala bookyi’owe bona Yakomba.

⁵Bokanela nd’oka etengelo ena Yakomba eotenda bototoloto, enil’eho, ate, Bolimo bonoki’nd’oilaka lacina boyale l’iso botook’iso mposa yoka luha mene?

⁶Ohonde Yakomba afudya iseinko mpudya. Lacin’eho, etengelo ena Yakomba eila, ate, Yakomba afeka la bato banayofefa, koko af’ato banayosonja isei.

⁷Lacin’eho, boongya lifika Yakomba; bookan’ita la Satana ko angokolota.

⁸Boolama la Yakomba, ko Ende angolama l’ino. Bokulak’akas’anino, ino bato ban’owe; ko bosonga betem’enino nko soto, ino bana nkanyi ife.

⁹Benaka bino, bofomaka befwi, ko bolelaka la mposoli; tolo tonino tohalingwake lilelo, ko enyanga enino ehalingwake bolito.

¹⁰Boyosonjak’inoamene en’oso bona Nkolo, ko angokiledy’ino.

¹¹Bifili, botatanganake lotango. Ende onotanga efili enande lotango, ko akoedya efili baoyi, ende aotanga basangya lotango, ko aokoedya basangya baoyi nkoho. Koko yomb’e okoedya basangya baoyi, ofayali bokambi bon’asangya: oyali nko bokodyi.

¹²Boekyi bona beeka la Ntenji en’akambo ayali nk’omoko kei, nk’ende onikyisa ko aehyisa; koko e fo, onokoedya on’omoi baoyi, e ond’oya?

¹³Koko ino, banila, Mbo bon’in’one yombo loi tongocoa en’onyang’one botutuma, ko tongokinda mbula emoko, ko tongosombya baongwa, ko tongata nkita.

¹⁴Ino bofeye yoi linalingilama loi. Liiko lonino loka nai? Noka, ino boyali nk’iyongonge inayenya isisali kei, ko nkwaho yosiela nko nsiela.

¹⁵Akoli eneyal’ino lacina bile, in’ate, Yombo Nkolo alanga, tongika, ko tongila yombo yoi line, yombo yoi liho.

¹⁶Ohonde isanga boyokuiny’inoamene ena njengodya enino: njokumya en’okotu’oho eyali nko bowe.

¹⁷Lacin’eho, ende oneya likamb’olotsi, ko afile’oho, yoi linakamb’ende liyali nko bowe.