Read ngando 1 Petelo 1 Bible Online

1 Petelo 1 - ngando bible

1 Petelo 1

¹Petelo, ekima ena Yesu Masiya, eneyal’iyo banasonama banayali yoka befenda en’efafandelo banayali ena Ponto la Ngalatia la Kapadokia la Bitunia,

²banasonama yoka bosambo bonoyali njeya en’oso eneki Yakomba Bafango oeyak’ale, en’eekedyo en’oeka ena Bolimo, lacin’ena imeedyo ina mpika ko la mpakisodya en’akila bana Yesu Masiya: Isei la mwi ifudyamake eneyal’ino.

³Lokumo eneyali Yakomba, Bafango’ona Nkolo eniso Yesu Masiya, onotootaki lakina l’isei inande inileki nko ndeka lacina toate lolendedyo lonoyaike nko l’eetwelo eneki Yesu Masiya oetwaka enek’anawaki;

⁴lacina tosangole lisango linalifawu, linalifana nsefo, ko lifayeha, koko yamonyama ena loola lacin’enino,

⁵nk’in’anamonyama la mpamba ena Yakomba nko l’imeedyo lacina boate liiko lonakolana yenya en’esike ena nsimbo.

⁶Ino bonyangela liiko loho l’enyanga mene, kanga ben’ino isanga ilalela la mmeko ina bekotua l’ekotua, yombo bino biho biyali;

⁷lucina mmeka en’imeedyo inino (inileki wolo l’otuya, nko wolo boneha kanga boho bomekama la nkoi) enya la lokumo, la bokonde ko l’ekumedyo enengi Yesu Masiya oenya.

⁸Kanga boteena, ino bok’ende nganji; kanga bofeene isanga, bimedya, ko boyonyangele enyanga mene enefakolana lisakitolama bokotua, ko eseki lokumo;

⁹ko boyatambe boluko bon’imeedyo inino, nko liiko lona belimo’enino.

¹⁰Ena likambo lina liiko loho, basumoli banatendaki’ale baoyi’an’isei iho iniyayi eneyal’ino, baufolaki ko basisolaki baoyi la locinji;

¹¹bakembaki lacina banonganya esike ko l’okotua bon’esike eneki Bolimo bona Masiya bonoyaaki en’etem’eniyo oatumaka, eneki Bolimo’oho ofisolaka en’oso bino bina Masiya, ko la bokonde bonoyayi ena mbusa ena bino.

¹²Iyo bamonongany’oka batakamba baoyi’ane lacin’eniyoamene: bakambaki nko lacin’enino, baoyi’ane banasekodyama eneyal’ino isanga l’ato’aho banakosumolak’ino Bosimo bon’olotsi la Bolimo bon’olotsi onotomamaki ena loola. Bikima bina loola balanga lacina basisole baoyi’ane.

¹³Lacin’eho, boongya likikya nkanyi inino, bokendaka la cilili, ko boongya lilengedya isei iningofama eneyal’ino l’enyedyo ena Yesu Masiya nko ndengedya mene.

¹⁴Yoka bosamb’onoyali bana banimedy’aoyi bolotsi, botakilake bokotua bona mposa may’owe inik’in’oyalaka l’iho en’oso’ale enetanongany’ino’ale.

¹⁵Koko yoka bosamb’onoyal’Ende boeka onokeelelak’ino, ino nkoho boyalamaka boeka ena bikambwa binakamb’ino bihitu;

¹⁶lacina yoi limotengama, ate, Ino bongoyala la boeka, lacin’emi njali on’oeka.

¹⁷Yomb’ino belel’Ende en’oondo yoka Bafango, Ende onotend’akambo yoka bosamb’onoyali ekambwa en’oto l’oto efana likai, boongya litonga litonga linino la mbanga;

¹⁸lacin’ino bomey’oka botungwaki en’okotua bon’aoyi banafana ncina ntutuma banaki bafango’anino’ale okocikelak’ino, botatungwa la toma tonateeha, nko wolo la francs:

¹⁹botungwaki nko l’akila ban’otuya mene yoka bakila bana bon’ona mpate onofan’eseko ko onofana lianda, nk’akila bana Masiya.

²⁰Ende aeyanaki solosolo en’oso’ale, kuma loko lotanunolama, koko amenya en’esimbelo ene ena bisike lacin’enino;

²¹ko lacin’enande ino bimedya Yakomba oneetolaki enek’anawaki, ko aofaki bokonde; lacin’eho imeedyo inino la lolendedyo lonino bayalamake nk’eneyal’Yakomba.

²²La ncina enek’in’okulaka belimo benino l’efikelo enek’in’oimedyaka solosolo eho la Bolimo bon’olotsi lacin’ena nganji eneyali bifili enefan’okotua bon’osimo, bokanaka nganji l’otema bonakolana ko la mposa mene.

²³Lacin’oka, ino bootwaki lakina, efa la boona bonongowa linga: bootwaki l’oona bonofawu tu, nko la yoi lina Yakomba lineyaike ko liyali nko njalama.

²⁴Lacina Bonufo bohotu boyali nko yoka tolenge, Ko bokoka bohotu bon’oto boyali yoka liyeya lina tolenge; Tolenge tonyelala, ko liyeya yokwa;

²⁵Ohonde yoi lina Yawe liyali nko njalama. Ko yoi liho nko yoi linalik’in’osumolamaka l’osimo bon’olotsi.