Read ngando 1 Petelo 2 Bible Online

1 Petelo 2 - ngando bible

1 Petelo 2

¹Lacin’eho, bumola bowe bohotu, ko la longo lohalotu, ko la besimo la bikuku la ntango ihatu inay’owe.

²Koko yoka belenge benotwaki nko kekeke, boongya lilangamela baele ban’olimo bana solosolo, lacina bofule la baho ko boate liiko;

³yombo bomonongany’oka Nkolo and’isei;

⁴boya eneyal’ende, nko lufe lineyike, linaliki bato ofengolaka solosolo, ohonde lisonamaki la Yakomba, lufe linaliseki’otuya.

⁵Ko l’inoamene nkoho, yoka baufe banayaike, bofakama botumba bona Bolimo, lacina boyalame boloi bona nkanga bon’oeka, lacina bolekya mbeka ina bolimo iningimedyama la Yakomba lacin’ena Yesu Masiya.

⁶Lacin’oka yoi limilama en’etengelo ena Yakomba, Lenda, laambya ena Siona lufe lin’oso lina likoka, lufe linalisonamaki, linaliseki’otuya; Ko boto onomimedya afokaki nsoi.

⁷Lacin’eho, ende aseki likumyama bike l’ino banimedya; onde eneyal’iyo banafimedya, Lufe linaliki bafaki okilaka Limoyalama lin’oso lina likoka.

⁸ko la Lufe lin’ekumbelo ko la lufe liniyali yoka lofoka lon’ilonga; iyo bakumba la liho, lacina enapok’iyo lopoko la yoi linande: nko bokotua bonokodyamaki’ale lacin’eniyo.

⁹Ohonde ino boyali boloi bonosonama, nkanga ina mpifo en’afoka, botonga bona boeka, bato bana Yakomba mene, lacin’eho benyanya baoyi bana mbongi enande onokeelelak’ino lacina bume en’ilima ko bofole ena fololo enande ena mpefa.

¹⁰En’oso’ale botayal’ale bato mene, ohonde isanga boyali bato bana Yakomba; efan’onokookaki’ale isei, ohonde isanga bomosungy’isei.

¹¹In’analangama l’emi, lakoond’ino, nk’eyoka bakenji la befenda, bofengolaka mposa ina yonge, lacina iho yokan’ita la bolimo.

¹²Boongya likamba l’okotua bonakolana cilili ena ntoto ena Befenda; lacin’eho, en’aoyi banakotang’iyo bakambi ban’owe, iyo bakumya Yakomba en’ina bona njengya, nko lacin’ena bikambw’inino bin’olotsi binen’iyo.

¹³Lacin’ena Nkolo, boongya lifika bafoka bahatu banilama l’ato. Bofika Lifoka lina Roi, nk’eyoka boto onilama ena lifoka lin’iyome;

¹⁴ko la gouverneurs, nk’eyoka bato banatomama l’ende lacina basisodya bakambi ban’owe ko bakumya bakambi ban’olotsi.

¹⁵Lacin’oka eango ena Yakomba eyali yok’osamb’one, lacina bofekya biinda bona nnonganya bona tolemeleme nko la nkamba ena bikambwa bin’olotsi.

¹⁶Boyalamaka yoka bato banatungwa, ohonde botilake etungwelo enino yoka ekundelo ena bowe: boyalamaka nk’eyoka baombo bana Yakomba.

¹⁷Bokumya bato bahatu. Boka bifili nganji. Boanga Yakomba. Bokumya Lifoka lina Roi.

¹⁸Basali, bofika banyangetuke banino la mbanga ehatu; ef’iyo ban’olotsi la ban’ongompolu kei: boafik’iyo banaseki itungya nkoho.

¹⁹Yombo boto aen’ino, ko aonyomama kum’atakamb’owe, nko lacina enafik’ende Yakomba la lokanyi lon’otema, bokotu’oho botangam’olotsi.

²⁰Lacina yombo bil’owe ko bofomama nsoola lacin’ena bowe’oho, kanga bitedya nsoola, lokumo lonat’ino loka nai? Ohonde yombo bil’olotsi, ko bonyomama lacin’ena boho, ko bitedya nyoma, bokotu’oho botangam’olotsi la Yakomba.

²¹Ncina enek’in’oelelamaka eh’eho; lacina Masiya nkoho akeenelak’ino bino, ko akocikelak’ino ndembi ena lilako, lacina bokile en’aina banaki’nd’ocoaka.

²²Ende atila yoi lin’owe tu, ko longo lotasungyama en’onyu’onande.

²³Eneki’nd’otangamaka lotango, atut’otanga on’omoi lotango tu; eneki’nd’oenyamaka bino, ataan’oto njaana: acikaki likambo linande eneyal’ende onotend’akambo bahatu l’etendelo enonga nko mbonga.

²⁴Endamene atolaki baoyi’owe’aniso ena yonge linande en’ote, lacin’eho is’anawaki eneyali baoyi’owe, tike eneyali mbongi. Ino bikyamaki la mpota iniki’nd’ofomamaka.

²⁵Lacin’oka ino bungaki yoka mpate; ohonde isanga bomuta eneyali Botombanyi la Bomonyi bon’elimo’enino.