Read ngando 1 Petelo 3 Bible Online

1 Petelo 3 - ngando bible

1 Petelo 3

¹Yok’osamb’oho, ino baali bofika baome’aninoamene; lacina, kanga bamoi batembola yoi, bangatama en’imeedyo, efa la yoi, ohonde l’okotua bona bikambwa bina baali’aniyo,

²enen’iyo bokotua bonakamb’ino la mbongi ko la mbanga.

³Bokombe bona baali botayalamake boho bona yonge, nko ndoha ena lifo, la ndota ena wolo ko la bisenda:

⁴bokombe’oniyo boyalamake nko boto onofisi en’otema, bokombe bonofeha, boka bolimo bona njofima l’ona mwi, bonoyali bon’otuya mene en’aiso bana Yakomba.

⁵Lacina bayato ban’oeka ban’alale banataki’ale lolendedyo loniyo eneyali Yakomba, bayokombyak’iyoamene yok’osamb’one, ko bafikaki baome’aniyoamene;

⁶yok’onoki Sala ofikaka Abalayama, ko amotanga nko nyangetuke. Ko yomb’ino bil’olotsi, ko bofaange ko bofoke losomo, ino boyali nko ban’anande.

⁷Nk’osamb’oho ino baome bokisak’ase l’aali’anino l’okotua bona nnonganya, bokumya booli la lokumo lonakolana l’oto onokolek’ino la bolu, lacin’oka l’ino l’iyo bomolambana ena lisango lin’isei ina liiko; nko lacin’eho beondo’enino betongofekyama.

⁸Yoi lin’esimbelo, inatu boyalamaka la lokanyi lomoko, bokamelana nganji, bolangana yoka bakune l’otoolo, bokamelan’isei, boyofima ena nkanyi inino;

⁹botacindanyake bowe l’owe, ko lotango la lotango: butodya nko bosako; ncina enek’in’oelelamaka eh’eho, lacina bosangole bosako bona nsakama.

¹⁰Lacina Ende onoka liiko mposa Ko alanga lacina aene bina ben’olotsi, Asukake lolemi lonande ena likambo lin’owe, Ko la nkefu inande, itongotenda la longo;

¹¹Aumbelake bowe, ko akambe bolotsi, Afone mwi, ko aitane l’eho la locinji.

¹²Lacina baiso bana Yawe balenda bato banambongi, Ko batoi’anande balofamela beondo’eniyo; Ohonde elongi ena Yawe eotakamela bakambi ban’owe.

¹³Yomb’ino boka mposa mene en’aoyi ban’olotsi, boto onongokiilel’ino yoi lin’owe oka nai?

¹⁴Kangaben’ino lacin’ena mbongi, bokik’ekiko. Botaangake la mbanga eniyo, ko botakandakandake.

¹⁵Koko bomonya Masiya en’etem’enino yoka Nkolo l’emonyedyo en’oeka. Boongya likolana bisike bihitu lacina bokutwele boto l’oto onokufol’ino ncina ena lolendedyo loneloyali eneyal’ino, nko la njofima ko la mbanga;

¹⁶ko boyalamaka la lokanyi lon’otema lon’olotsi; lacina iy’anakotang’ino lotango lon’owe, ko bakofot’ino lacin’ena bikambwa bin’olotsi binakamb’ino, baoke nsoi mene en’aoyi’aho.

¹⁷Yombo Yakomba amolanga yok’oho, yoi linalileki’olotsi nko lacina bene bino lacin’ena nkamba en’olotsi, efa lacin’ena nkamba en’owe.

¹⁸Lacin’oka Masiya mene aenaki bino bena bomoko lacin’en’aoyi’owe, boto’on’olotsi lacin’ena bamoi ban’owe, lacin’eho atoyedya eneka Yakomba. Ayakamaki ena yonge, koko aikyamaki en’olimo;

¹⁹koko acoaki en’olimo oyolaka belimo benetungi en’enyoio,

²⁰nk’iy’anapokaki’ale lopoko, eneki isei ina Yakomba ina locinji olengedyaka ena bina beneki Noa ofakak’asua, nko basu’aho banaki bato banataat’ale bike, nko mwambi kei, oikyamaka l’asi.

²¹Ko baho bakiiky’ino isanga lon’olotsi eneyali Yakomba, nko l’eetwelo eneki Yesu Masiya oetwaka en’ewedi.

²²Ende amocoa ena loola, ko ayali en’ili bona likasa y’ome lina Yakomba; bikima bina loola la bafoka la baise-mpamba bamilama ena lifoka linande lacina baofike.