Read ngando 1 Petelo 4 Bible Online

1 Petelo 4 - ngando bible

1 Petelo 4

¹Lacin’eneki Masiya oenaka bino ena yonge, ino nkoho boyokikyak’inoamene la lokanyi loho loneloki’nd’oyalaka la loho; lacina ende onenaki bino ena yonge amoledya likamba bowe;

²lacin’eho en’esike eneciki eneyal’ino ena yonge bofakambaki lakina la mposa inileki ina bato, ohonde l’eango ena Yakomba.

³Lacina esike eneki’oso enek’in’okambaka baoyi banalanga Befenda emokoka, enek’in’okendaka l’aoyi bana likele, la mposa inay’owe inileki, la ndangwa l’aana, la bilambedya biniseki loyenge, la bimeelo bin’aana, la bikumedyo bina baidola bina nsefo.

⁴Ko iyo bafefa enefaco’ino la mbango oyila loyenge loho lonil’iyo, ko bakotang’ino bowe.

⁵Koko iyo bangolokola linga beloko’eniyo en’oso’onande onokolana lacina atende bakambo ban’ato banayaike ko la banawaki.

⁶La ncina ene bosimo bon’olotsi bosumolamaki nkoho eneyali banawaki, lacin’eho bakambo’aniyo batendame yoka bakambo ban’ato banayali ena yonge, ohonde baike bosamb’onoyali Yakomba en’olimo.

⁷Koko esimbelo en’aoyi bahatu eolama; lacin’eho, boyalamaka la lokanyi lona bomwu, ko boyoongy’inoamene lacina boonde beondo.

⁸Yoi linalileki baoyi bahatu, boongya yokamelana nganji, lacin’oka nganji eokunda baoyi bike ban’owe.

⁹Bosangelana l’olotsi, efana boningoningo.

¹⁰Yok’onoki boto l’oto’onino otambaka nganji, akambyake on’omoi l’eho, lacina boyalame batombanyi ban’olotsi ban’isei ina Yakomba inay’ekotua l’ekotua.

¹¹Yombo boto’omoi atenda atendake yoka bosamb’onoyali baoyi bana Yakomba, yomb’omoi akamby’ato, akoli lacina amakambya nko la mpamba enefama la Yakomba; lacin’eho Yakomba akumyame en’aoyi bahatu la Yesu Masiya, onokoli la lokumo la mpamba bisike la bisike. Ndoho.

¹²In’analangama, botafefake la lomeko lona nkoi loneloyali enek’ino lonoya lacin’eho lokomek’ino, nk’eyoka bokanedya in’ate yoi lina mpefa limoya enek’ino.

¹³Ef’eho; nde bonyangelaka lacin’oka bomolambana la Masiya ena bino binande, lacin’eho bonyangele l’enyanga bik’ike enengi bokonde’onande oenya.

¹⁴Yombo botangama lotango lacin’ena lina lina Masiya, bokik’ekiko; lacina Bolimo bon’okonde, nko Bolimo bona Yakomba, boyatonge eneyal’ino.

¹⁵Efakolana lacina boto’onino aenyame bino yoka boyaki bon’oto, yombo yoka liya, yombo bokambi bon’owe, yombo bondengi onosisola baoyi ban’ato’akina.

¹⁶Ohonde yombo boto aen’ino yoka bokili bona Masiya, atokake nsoi: akumyake Yakomba ena lina liho.

¹⁷Lacina esike emoyela lacina etendelo en’akambo ematsa en’otumba bona Yakomba; koko yomb’eho eomatsa en’oso eneyal’iso, nsimbo eniyo banafalange yimedya bosimo bon’olotsi bona Yakomba engoyal’oya?

¹⁸Ko yombo eikelo en’oto’ona mbongi eatamala locili, nd’ate boto onofakumya Yakomba, la boto on’owe, bangenya linga meya?

¹⁹Lacin’eho, akolieneyal’iyo banena bino bosamb’onoyali eango ena Yakomba, bacike belimo’eniyo eneyali Bonunoli’ona solosolo, nk’ena nkamba ena bikambwa bin’olotsi.