Read ngando 1 Petelo 5 Bible Online

1 Petelo 5 - ngando bible

1 Petelo 5

¹Laonda bingambe biniyali enek’ino, emi onoyail engambe nkoho, ko njali temoin ena bino biniki Masiya oenaka, ko lambana l’iyo en’okonde bonongenya linga:

²emite, Botombanyaka botonga bona Yakomba bonoyali enek’ino; bolendana l’oho, efa nk’eyoka bocindama, ohonde la ndokodya eninoamene, yoka bosamb’onoyali eango ena Yakomba; ko efa lacin’ena nkita ena nsefo, ohonde la mposa mene en’otema;

³ko eneki etelo ofamaka eneyal’ino, botakambake yoka banyangetuke, ohonde boyalamaka yoka ndembi ina lilako eneyali botonga.

⁴Ko enengi Botombanyi bon’iyome oenya, bongotamba likuka lina bokonde bonofasile.

⁵Nk’osamb’oho ino befenga boongya lifika bingambe. O, inatu boyolots’inoamene la njofima, lacina bofikane lifiko; lacina Yakomba afeka la bato banayofefa, koko af’ato banayofima isei.

⁶Lacin’eho, boyosonjak’inoamene en’ase’a likasa lina Yakomba lina locili, lacina akiledy’ino en’esike enakolana.

⁷Bofusel’ende bokandokando bonino bohotu, lacin’oka akokanedy’ino nko nkanedya.

⁸Bokamba bokokya, botombanyaka; lacina bookyi’owe’onino oka Satana ayaselasela yoka longuli lonelolungola, ayafone boto onongi’nd’ola.

⁹Bofeky’ende la locili lon’imeedyo, lacin’ino bey’oka bifili binino banayali ena loko baena nko bino biho binen’ino.

¹⁰Ko Yakomba en’isei ihatu onokeelelak’ino lacina botambe bokonde bonande bona bisike l’isike eneyali Masiya, kuma ben’ino ilalela, Endamene angokoongy’ino nko mbonga, angokokiky’ino, ko angokof’ino locili.

¹¹Lifoka la mpamba eneyal’ende bisike la bisike! Ndoho.

¹²Mokotengel’ino bokand’one bon’isisali la likasa lina Siliwano, onakanedy’emi yoka efili eniso ena solosolo; lakoond’ino ko lakosumol’ino, emite, ine nk’isei ina Yakomba ina solosolo: bemala locili en’isei iho.

¹³Ekelesia eneyali ena Babela, enesonama iyo l’ino, bakees’ino; ko Malako, bon’onami, akees’ino nkoho.

¹⁴Besana inoamene l’olumba bona nganji ena lolango. Mwi eneyal’inatu banayali eneyali Masiya.