Read ngando 2 Petelo 1 Bible Online

2 Petelo 1 - ngando bible

2 Petelo 1

¹Simona Petelo, boombo l’ekima ena Yesu Masiya, eneyal’iyo banatambaki imeedyo in’otuya mene yok’iho ineyat’iso ena mbongi ena Yakomba eniso la Boiki Yesu Masiya:

²Isei la mwi ifudyamake eneyal’ino la njeya ena Yakomba ko l’ena Yesu Nkolo eniso.

³Lacin’oka mpamba enande ena Yakomba emotofa baoyi bahatu banakolana la liiko ko l’ekumedyo ena Yakomba, nko la njeya eney’iso ende onoteelelak’iso l’okonde’onande ko l’olotsi’onande.

⁴La baho amotofa bisemba biniseki’okolo ko biseki’olotsi; lacin’eho botambe baondo ban’okotua bona Yakomba l’isemb’iho, nk’in’analotaki nsefo eneyali ena loko lacin’ena mposa inay’owe inileki.

⁵La ncina ene, enem’inoamene oongya liyalama la mposa mene ena locinji, bokokya mbongi ena liko y’imeedyo inino; ko bokokya njeya ena liko ya mbongi;

⁶ko bokokya njofima ena liko ya njeya; ko bokokya mbitedya ena liko ya njofima; ko bokokya nkumya ena Yakomba ena liko ya mbitedya;

⁷ko bokokya nganji eneyali bifili ena liko ya nkumya ena Yakomba; ko bokokya nganji ena lolango ena liko ya nganji eneyali bifili.

⁸Lacina, yombo baoyi’ane bayali enek’ino, ko basokwa eneyal’ino nko nsokwa, bakiil’ino nk’eyoka bofayali bato bana mponya la bato baninda bemamo ena likambo lina njeya ena Nkolo eniso Yesu Masiya.

⁹Lacin’ende oninda baoyi’ane ayali nko yok’onody’aiso, onofene bosana, ko amolofela ekulelo eneki’nd’okulwak’ale en’aoyi’owe’anande.

¹⁰Lacin’eho, bifili, boyalamaka la mposa mene lacina bokikya elelo enek’in’oelelamaka ko l’esonelo enek’in’osonamaka; lacin’oka, yombo bokamba baoyi’ane, bofakumbaki tu.

¹¹Ko yok’oho etuelo ena lifoka lina bisike l’isike lina Nkolo eniso la Boiki Yesu Masiya engofama eneyal’ino la mpudya mene.

¹²Lacin’eho, mpaledya likoofody’ino baoyi’ane, kanga bomeya baho, ko bomokikyama locili ena solosolo eho eneyali eneyal’ino.

¹³Ko lakanela bolotsi, kuma njali ena lilombe line lina yonge, emite ekoli lacina nkeetol’ino la mbofodya.

¹⁴Lacin’emi ley’oka efan’olingolingo njumola ena lilombe linami eoya, yok’onoki Nkolo eniso Yesu Masiya onsumolaka.

¹⁵Ko nongongya likamba yok’one, lacina, enengi’m’ouma, ino binya likanedya baoyi’ane bina l’ina.

¹⁶Enek’is’okosumolak’ino mpamba ko l’eyelo ena Nkolo eniso Yesu Masiya, totakolaka la basai banaki bato onunolaka la bomwu boniyoamene: toyaaki nko temoins banenaki bokonde’onande l’aiso’anisoamene.

¹⁷Lacin’ende atambaki lokumo ko la bokonde eneyali Bafango, eneki lofoso oyaka ena bokonde bonoleki nko ndeka mene lonilaki baoyi yok’one, ate, One nko Bon’onami ona nganji, onanyangel’emi enyanga.

¹⁸Ko isoamene tokaki lofoso lone loneloyaki ena loola, enek’is’oyalaka l’ende ena lingonji lin’oeka.

¹⁹Ko toyali la yoi linaliki bosumoli otendaka, limokikyama locili loneloleki, ko ekoli lacina boongya likanedya yoi liho, yok’onoyali moinda eneyafete en’edye ena liucu, yengoko bina bokya, ko loto y’okulu yenya en’etem’enino.

²⁰Boongya linonganya yoi line en’oso, noka, efaate yoi limoko en’etengelo ena Yakomba linaliki basumoli otendaka linakolana lifoladyama l’esakitwelo ntutuma;

²¹lacin’oka baoyi ban’asumoli bataya l’eango en’oto; ohonde bato banatomamaki la Yakomba batendaki enek’iy’ocindamaka la Bolimo bon’olotsi.