Read ngando 2 Petelo 2 Bible Online

2 Petelo 2 - ngando bible

2 Petelo 2

¹Koko basumoli bana mpoci bayaaki’ale ena ntoto en’ato; ko balaki bana mpoci bangoyala ena ntoto enino nkoho, ko bangotoya balako ban’eehedyo nko la longo loniyo, bangangana nko le Nkolo mene onasombaki, ko bangoyehy’iyoamene l’eehedyo ena sasimo.

²Ko bike bon’ato bongakila en’aoyi’aniyo ban’eehedyo; ko lacin’eniyo mboka ena solosolo engotangama lotango lon’owe.

³Bangokitanya nkita eniyo. enek’ino l’aoyi bana mpoci, nko lacin’ena mposa eniyo ena lituka bike. Ekoiyelo enek’iy’okoiyamak’ale efaate’osana lakina, ko eehedyo eniyo efetame.

⁴Yombo Yakomba atikya bikima bina loola banilaki’owe, ohonde afusak’iyo ena Talutalu, ko amatoma ena bafoku bana bilima oyomonyama meho yengoko etendelo en’akambo;

⁵ko yombo atikya loko loneloki’oso, ohonde amonyaki Noa, bosekodyi bon’aoyi bana mbongi, ende l’ato’amoi nsambo, eneki’nd’otomaka efela ena loko lon’ato banatokumy’ende;

⁶ko yombo ahalingolakibenyanga bena Sodomo la Amola betoko, eneki’nd’otumbaka beho, ko akoiyaki beho l’ekoiyelo mene, ko ailaki beho nk’eyoka ndembi ena lilako eneyali bato banafakumyaki Yakomba ena bisike bina mbusa;

⁷ohonde akambyaki Loto, boto’ona mbongi onokaki lokeseli bike lacin’ena bikambwa bina nsefo bin’ato ban’owe

⁸(lacin’oka, eneki boto’oho ona mbongi otongaka ena ntoto eniyo, botem’onande bona mbongi bokeswaki la lokeseli bina l’ina la njena ko la njoka ena bikambw’iniyo bin’owe mene):

⁹Nkolo aeyayelingitola bakumi bana Yakomba en’esike ena lomeko, ko aeya limonya iy’aninda mbongi nk’ena nsisodya yengoko bina bon’etendelo en’akambo;

¹⁰la ndeka mene nk’iy’analangamela bokotua bona yonge la mposa eneleki en’aoyi bana nsefo, ko bafalange lifik’afoka. Iyo baseki’ongeno ko la lopoko, ko enasaiy’iyo banampamba bafilima tu;

¹¹ohonde le bikima bina loola banalek’iyo la locili ko la mpamba bafaakol’iyo mbakola la besao en’oso bona Yawe.

¹²Koko bato’ane, nk’eyoka nyama inifana lokanyi inotwaki nko nyama kei lacina yundame ko yehyame, basaiya besao en’aoyi banafanongany’iyo, ko bangehyama en’eehedyo eniyoamene;

¹³ko yok’oho bangotamba bowe nko boluko bona nkamba ena bowe. Iyo batanga baoyi bana loyenge banakamb’iyo l’ane mene nk’ekiko. Bayali nko baanda la belema, enal’iyo bilambedya l’ino, baolola la loyenge lona mpoci.

¹⁴Baiso’aniyo baolola la likele, ko bafinya yumbela baoyi ban’owe. Baonga belimo ben’ato banafacile nko la longo loniyo; bayali l’otema bonekela mposa bike ena lituka nko njekela; bayali nko ban’ana bomomo.

¹⁵Bamumbela mboka ena cilili, ko bamotembwa, enek’iy’okilaka mboka ena Bilama, bon’ona Bola, onolangamelaki boluko bona baoyi’owe.

¹⁶Koko ende afelamaki lofeli lacin’ena ekambwa enande en’owe: mpunda enefan’etendeloetendaki l’efodya en’oto, ko efekyaki bokotua bon’okoko bonoki bosumoli olowaka l’oho.

¹⁷Bato’ane bayali bitoko binifan’asi, mbonge inatomama la lofongo; bilima mene bona kocukombe bomomonyama lacin’eniyo.

¹⁸Eneyatend’iyo baoyi ban’akolo banafana ncina ntutuma, bayonge la longo lona mposa ena yonge eneleki, ko la likele, iy’analotaki bato’aho banayakambe bina l’ina la liunga mene;

¹⁹bamasembedy’iyo esemba en’etungwelo kum’iyoamene bayali nko baombo bana bikambwa bina nsefo; lacina boto ayali boombo’o nande onokoiyaki en’ita.

²⁰Yombo bamolota baoyi bana nsefo bana loko nko la njeya ena Nkolo la Boiki Yesu Masiya, koko lakina baut’oyotungy’iyoamene l’aoyi’aho, ko baokoiyama, bokotu’oniyo bona mbusa boleki boho bonoki’oso la bowe.

²¹Enek’iy’ioeyaka mboka ena mbongi, koko lakina bait’oumbela lisangya lin’oeka linifamaki eneyal’iyo, tumbe bolotsi eneyal’iyo yombo batey’ale mbok’eho.

²²Koko yoi limilama eneyal’iyo yoka bosamb’onoyali lisai liho lina solosolo, ate, Mbwa emuta ena ndoi eneki’nd’oselaka, ko nsombo enekulwaki eut’oyokilimodya ena lomoto.