Read ngando 2 Petelo 3 Bible Online

2 Petelo 3 - ngando bible

2 Petelo 3

¹Bokand’one nko bokanda bon’efe bonakotengel’emi, in’analangama; ko en’ekand’eh’efe emi letola nkanyi inino ina solosolo nko la mbofodya,

²lacina bokanedya baoyi banaki basumoli ban’oeka otendaka en’oso’ale, ko la lotomo lona Nkolo la Boiki lonofama la bikima binino.

³Yoi lin’oso, bey’oka basiseli bangoya en’ina bena nsimbo la nsisedya eniyo, nko bato banayakende la mposa iniyoamene inay’owe mene,

⁴ko bangufola, Mbo esemba en’eyelo enande eh’eya? lacin’oka, eneki banky’aniso’ale oetamaka en’ewedi yengoko esik’ene bikambwa bihitu biyali nko bokotua bonoki biho oyalak’ale ena limatsako lin’enunwelo’ale.

⁵Ko iyo bafalange linongany’oka loola loyalamaki’ale, ko loko lilamaki l’asi ko ena ntoto en’asi, nko la yoi lina Yakomba;

⁶koko la baoyi’ane, loko loneloyaaki esik’eho lehyamaki eneki basi okwelaka loho;

⁷ohonde loola loneloyali isanga ko la loko bamomonyama lacin’ena nkoi nko la yoi liho; bamomonyama yengoko bina bon’ekoiyelo ko l’eehedyo en’ato banafakumya Yakomba.

⁸Koko in’analangama, botungake, eneyali Nkolo bin’omoko boyali nk’eyoka mbula nkoto, ko mbula nkoto yoka bin’omoko.

⁹Nkolo afana lokuto ena likambo lina esemba eriande, yoka bosamb’onatanga bato’amoi lokuto; ohonde akookamel’ino isei ina locinji, ko afalange lacina boto’omoko aehyame: alanga lacina bato bahatu bayosume en’aoyi’owe.

¹⁰Koko bina bona Nkolo bongoya yoka liya; en’in’oho loola longuma la lolingo lona lokolo mene, ko bikambwa bina loola bingolangwa la nkoi iniseki’olema l’efefe, ko loko ko la bikambwa bihitu bina loho bingolika nko tu.

¹¹Yombo bikambwa bihitu bingolangwa yok’osamb’oho, akoli eneyal’ino boyalame bato ban’okotu’oya en’ekendelo en’oeka l’en’ekumedyo ena Yakomba?

¹²Boyalengedya ko boyakenza eyelo ena bina bona Yakomba, bina bonongi loola ofeta la nkoi, ko longolangwa, ko bikambwa bina loola bingolangwa la nkoi iniseki’olema l’efefe.

¹³Koko iso, yoka bosamb’onoyali esemba enande, iso tolengedya loola lona lototo ko la loko lona lototo, ko baoyi bana mbongi batonga litonga meho.

¹⁴Lacin’eho, in’analangama, enalengedy’ino baoyi’ane, boyalame la mposa mene lacina bosungyame l’ende ena mwi, efana lianda, ko efana yoi linakolana la lofeli en’oso’onande.

¹⁵Ko boongya litanga isei ina locinji ina Nkolo nk’eyoka liiko; yok’onoki Paulo, efili eniso onolangama, okotengelak’ino, nko la bomwu bonofama eneyal’ende;

¹⁶yoka bosamb’onatend’ende baoyi’ane en’ekand’enande behetu. Baoyi’amoi banayali en’ekand’enande baseki locili ena nnonganya, ko bato’amoi banafeye ko bafacile locili bakengola baoyi’aho, yoka bosamb’onil’iyo la bitengelo bimoi bina Yakomba, ko bayehy’iyoamene la baoyi’aho.

¹⁷Lacin’eho, in’analangama, eney’ino baoyi’ane en’oso, boongya litombanya, botongokungyama la baunga bana bafunzifunzi, ko bokwa ko bocika locili lonelok’in’ocilaka.

¹⁸Ohonde bofulaka en’isei ko l’ena njeya ena Nkolo eniso la Boiki’oniso Yesu Masiya. Lokumo eneyal’ende isanga ko la bisike bihitu yengoko nsimbo. Ndoho.