Read ngando 1 Yoane 1 Bible Online

1 Yoane 1 - ngando bible

1 Yoane 1

¹Yoi liniyaaki ena limatsako, linik’is’ookaka, linik’is’oenaka l’aiso’aniso, linik’is’olendaka, liniki bakas’aniso oundaka, ena likambo lina Yoi lina liiko;

²(liiko loho lenyaki, ko iso tomena, ko tolokola boloko’oniso, ko tokosumol’ino liiko loho, liiko lonelofakale, loneloyaaki la Bafango ko lenyaki eneyal’iso):

³tokosumol’ino yoi liho linik’is’oenaka ko la linik’is’ookaka, lacin’ino bambane l’iso en’eambanelo; ko eambanelo eniso eyali la Bafango ko la Bon’onande Yesu Masiya.

⁴Ko totenga baoyi’ane lacin’eho enyanga eniso efule.

⁵Bosimo bonok’is’ookaka eneyal’ende, ko bonakosumol’iso, boh’one: Yakomba ayali fololo, ko eneyal’Ende efana bilima tu.

⁶Yombo tila, is’ate, Tambana l’ende en’eambanelo, koko lakina tokenda en’ilima, tofota nko mpoci, ko tofakambe solosolo.

⁷Koko yombo tokenda ena fololo, yoka bosamb’onoyali Ende ena fololo, tambana boto l’oto en’eambanelo, ko bakila bana Yesu Bon’onande batokul’iso en’aoyi’owe bahatu.

⁸Yombo tila, Mbo iso tofana baoyi’owe, toyofot’isoamene, ko solosolo eho efayali eneyal’iso.

⁹Yombo tofisola baoyi’owe’aniso, ende ayali solosolo ko ayali la mbongi lacina atotungole en’aoyi’owe’aniso, ko atokule en’aoyi bahatu baninda mbongi.

¹⁰Yombo tila, Mbo iso totila baoyi’owe, tomiil’ende bofoci bona mpoci, ko yoi linande lifayali eneyal’iso.