Read ngando 1 Yoane 2 Bible Online

1 Yoane 2 - ngando bible

1 Yoane 2

¹Ban’anami bana tosalisali, lakotengel’ino baoyi’ane lacina bofakambe baoyi’owe. Koko yombo boto’omoi akamba baoyi’owe, toyali la Bolekya eneka Bafango, nko Yesu Masiya ona mbongi.

²Ko ende ayali mbeka en’eambanyedyo lacin’ena baoyi’owe’aniso; ko efa lacin’ena baoyi’owe’aniso kei: nko lacin’en’ato bana loko lohalotu.

³Ko yok’one tey’oka tomey’ende, yombo tomonya beeka benande.

⁴Boto onila, Mbo omi momeeya, ko afamonya beeka benande, ayali nko mpoci, ko solosolo efayali eneyal’ende.

⁵Koko boto onomonya yoi linande, solosolo nganji ena Yakomba emolonga eneyal’ende nko mbonga. La yoi line tey’oka toyali eneyal’ende.

⁶Onila, ate ayali eneyal’ende nko njalama, akoli eneyali boto’oho akende yok’onok’endamene okendaka.

⁷In’analangama, mpakotengel’ino boeka bon’ototo: lakotengela nko boeka bon’alale bonok’in’oataka ena limatsako’ale; boeka bon’alale boyali nko yoi linik’in’ookaka.

⁸Koko lakina, lakotengel’ino boeka bon’ototo, bonoyali solosolo l’eneyal’ende l’eneyal’ino, lacin’oka liucu liyasile ko fololo eyalolome isanga.

⁹Boto onila, ate ayali ena fololo, ko aok’efili enande bowe, ende ayali nk’en’ilima.

¹⁰Koko ende onokamela efili enande nganji, ayali ena fololo nko njalama, ko eneyal’ende efaate ekumbelo.

¹¹Koko ende onoka efili enande bowe ayali nk’en’ilima, ko ayakende en’ilima, ko afanonganya mboka enaco’ende, lacin’oka bilima bomolifa baiso’anande.

¹²Lakotengel’ino, ban’anami bana tosalisali, lacin’ino bomotungwa en’aoyi’owe’anino lacin’ena lina linande.

¹³Lakotengel’ino, bafango, lacin’ino bomey’ende onoyaaki ena limatsako’ale. Lakotengel’ino, befenga, lacin’ino bomokoiya Boto’oho on we. Mokotengel’ino, ban’ana tosalisali, lacin’ino bomeya Bafango.

¹⁴Mokotengel’ino, bafango, lacin’ino bomey’ende onoyaaki ena limatsako’ale. Mokotengel’ino, befenga, lacin’ino boyali locili, ko yoi lina Yakomba liyali eneyal’ino njalama, ko bomokoiya Boto’oho on’owe.

¹⁵Botokake loko ko la toma tonatoyali ena loko nganji. Yombo boto’omoi aoka loko nganji, nganji ena Bafango efayali eneyal’ende.

¹⁶Lacina baoyi bahatu banayali ena loko, mposa ena yonge, la mposa en’aiso, la njengodya en’ekendelo ena loko, baoyi’aho bafayali bana Bafango: bayali nko bana loko.

¹⁷Ko loko loyasile, ko mposa ena loho eyasile; koko ende onokamba eango ena Yakomba ayali bisike l’isike nko njalama.

¹⁸Ban’ana tosalisali, ene nk’esike en’esimbelo; ko yok’onok’in’ookaka, Mbo Onofeka-la-Masiya ayayi, isanga Banafeka-la-Masiya bike bamemala: la yoi liho tey’oka esik’ene nk’esike en’esimbelo.

¹⁹Iyo baumaki eneyal’iso, koko batayala baniso; yombo bayaaki baniso, tumbe bamoyala l’iso locela; ohonde baumaki eneyal’iso lacin’eho baenyany’oka iyatu bafayali baniso.

²⁰Koko ino boyali l’ehinyedyo eneyal’ende on’oeka, ko bomeya baoyi bahatu.

²¹Ntakotengel’ino lacina enefey’ino solosolo eho: mokotengel’ino lacin’oka bomeya solosolo eho, ko lacina yoi lina mpoci lifakolana la solosolo eho tu.

²²Onoyali bofoci bona mpoci oka nai? Ef’ende onangana, ate, Yesu afayali Masiya? One nk’ende Onofeka-la-Masiya, nk’ende onangana Bafango ko la Bona.

²³Boto onangana Bona, afayali la Bafango; koko ende onimedya Bona, ayali la Bafango nkoho.

²⁴Koko inoamene, akoli eneyal’ino lacina yoi linik’in’ookaka ena limatsako liyale eneyal’ino nko njalama. Yombo yoi linik’in’ookaka ena limatsako liyali eneyal’ino njalama, ino bongoyala eneyali Bona l’eneyali Bafango nko njalama.

²⁵Ko esemba eneki’nd’otosembedyaka eh’ene, nko liiko lonelofakale.

²⁶Mokotengel’ino baoyi’ane ena likambo liniyo banalanga lacina bakotembody’ino.

²⁷Koko ehinyedyo enek’in’otambaka eneyal’ende eyali l’ino nko njalama, ko bofinde lilako lacina omoi akolak’ino; koko yoka bosamb’onakolaka ehinyedyo enande en’aoyi bahatu, ko eho eyali nko solosolo ko efaate mpoci, yok’onoki eho okolakak’ino, bomboyala nk’eneyal’ende.

²⁸Ko isanga, ban’anami bana tosalisali, bomboyala eneyal’ende, lacin’eho, enengi’nd’oenya, toyalame la nkaso, ko tofoke nsoi en’oso’onande en’eyelo enande.

²⁹Yombo bey’oka ende ayali la mbongi, bey’oka boto l’oto onokamba baoyi bana mbongi amolotwa eneyal’ende nkoho.