Read ngando 1 Yoane 3 Bible Online

1 Yoane 3 - ngando bible

1 Yoane 3

¹Bolenda bokotua bona nganji ena lolango eneki Bafango otookamelaka, lacina totangame ban’ana Yakomba; ko toyali nko baho. La ncina ene, bato bana loko bafateya, lacin’oka iyo bateey’ende.

²In’anala ngama, isanga toyali ban’ana Yakomba, ko bokotua bonong’is’oyala linga boteyana esik’ene. Koko tey’oka enengi’nd’oya tongoyala yok’ende; lacina tongeen’ende nk’okotua bonoyal’ende.

³Ko boto l’oto onoyali la lolendedyo lone en’otema ayokul’endamene soto, yoka bosamb’onoyal’Ende soto.

⁴Boto l’oto onokamba baoyi’owe afunzafunza beeka, lacina baoyi’owe bayali nko mpunzafunza ena beeka.

⁵Ko ino bey’oka ende aenyaki lacina aumole baoyi’owe; ko eneyal’ende baoyi’owe bafayali nko tu.

⁶Boto onoyali eneyal’ende nko njalama afakambe baoyi’owe tu; boto onokamba baoyi’owe aten’ende ko ateeya.

⁷Ban’anami bana tosalisali, botalangake lacina boto akotembody’ino. Boto onila baoyi bana mbongi ayali nko boto’ona mbongi, yoka bosamb’onoyal’Ende ona mbongi.

⁸Boto onila baoyi’owe ayali nko boto ona Satana; lacin’oka Satana amokamba baoyi’owe nk’ena limatsako. La ncina ene Bon’ona Yakomba aenyaki, lacin’eho aehya bikambwa bina Satana.

⁹Boto onotwa eneyali Yakomba afakambe baoyi’owe, lacin’oka boona bonande boyali nk’eneyal’ende; ko afakambisa baoyi’owe, iacin’oka aotwaki eneyali Yakomba.

¹⁰Yok’osamb’one ban’ana Yakomba baenya ko la ban’ana Satana: boto l’oto onofakambe baoyi bana mbongi afayali bon’ona Yakomba, ko l’ende onofoke efili enande nganji nkoho.

¹¹Lacina boeka bonok’in’ookaka ena limatsako boh’one, lacina tookamelane nganji;

¹²efa yoka Kaina, onoyaaki bon’ona Boto’oho on’owe, ko ayakaki bakune’onande. Ko aoyakaki la ncina eka nai? Nko lacin’oka bikambwa binande biyaaki bowe, ko biho bin’akune’onande biyaaki bina mbongi.

¹³Bifili, botafefake yombo bato bana loko bakook’ino bowe.

¹⁴Iso tey’oka tomuma en’ewedi, ko tomoyela ena liiko, lacin’oka tokamela bifili nganji. Ende onofoke’ato nganji ayali nk’en’ewedi.

¹⁵Boto l’oto onoka efili enande bowe ayali boyaki bon’oto; ko ino bey’oka boyaki bon’oto afaate liiko lonelofakale eneyal’ende njalama.

¹⁶Nganji ena lolango eyana eneyal’iso yok’one, lacin’oka endamene aambyaki liiko lonande lacin’eniso; ko akoli eneyal’iso tambya liiko loniso lacin’ena bifili.

¹⁷Koko nk’en’oka boto aata toma tona loko, ko aena efili enande aelingitana la biinda bona toma, ko afokamel’ende isei en’otema, nganji ena Yakomba eyali eneyal’ende yok’osamb’oya?

¹⁸Ba-n’anami bana tosalisali, totokake nganji ena yoi ko la lolemi: toke nganji ena bikambwa ko la solosolo.

¹⁹Yok’oho tongey’oka toyali bana-solosolo eho, ko tongokikya betem’eniso en’oso’onande,

²⁰en’aoyi bahatu banatokoiya betem’eniso; lacin’oka Yakomba aleki betem’eniso, ko ameya baoyi bahatu.

²¹In’analangama, yombo betem’eniso befatokoiya, tokolana likits’etema eneyali Yakomba;

²²ko yoi lin’etaketaka linufol’iso totamba liho eneyal’ende, lacin’oka tomonya beeka benande, ko tokamb’ikambwa biniyali la lokumo en’aiso’anande.

²³Ko boeka bonande boh’one, lacina timedya ena lina lina Bon’onande Yesu Masiya, ko tokamelane nganji, yok’onoki’nd’otosumolaka.

²⁴Ko ende onomonya beeka benande ayali eneyal’Ende njalama, ko Ende ayali eneyali boto’oho nko njalama. Ko yok’one tey’oka ayali eneyal’iso. nko la Bolimo bonoki’nd’otofaka.