Read ngando 1 Yoane 4 Bible Online

1 Yoane 4 - ngando bible

1 Yoane 4

¹In’analangama, botimedyake belimo behetu, ohonde bomeka belimo, yombo beyali bena Yakomba; lacin’oka basumoli bike mene bana mpoci bamoya ena loko.

²Bongeya Bolimo bona Yakomba yok’one: bolimo l’olimo bonimedya, ate Yesu amoya ena yonge boya nk’eneyali Yakomba;

³koko bolimo l’olimo bonofimedya Yesu yok’oho bofayali eneyali Yakomba tu; bone nk’olimo bonande Onofeka-la-Masiya; ino bokaki’oka bolimo’one ayayi, ko boh’one ena loko nk’isanga.

⁴Ban’anami bana tosalisali, ino boyali bana-Yakomba, ko bomolakoiya; lacina ende onoyali eneyal’ino alek’ende onoyali ena loko.

⁵Iyo bayali bana loko, ko la ncin’eho batenda baoyi bana loko, ko baise loko bamalof’iyo.

⁶Iso toyali bana-Yakomba. Ende oneya Yakomba atolof’iso; koko ende onofayali boto’ona Yakomba afatok’iso. La yoi line teya bolimo bona solosolo ko la bolimo bona liunga.

⁷In’analangama, ekoli lacina tokamelane nganji, lacina nganji eoya nk’eneyali Yakomba; ko boto l’oto onoka nganji amolotwa la Yakomba, ko aeya Yakomba.

⁸Ende onofoke nganji afeye Yakomba, lacina Yakomba ayali nko nganji.

⁹Nganji ena Yakomba enyaki eneyal’iso la yoi line: Yakomba atomaki Bon’onande ona likinda ena loko lacin’iso tike l’ende.

¹⁰Nganji mene eh’ene: efa lacin’oka iso tokaki Yakomba nganji, ohonde lacin’ende atokak’iso nganji, ko atomaki Bon’onande yoka mbeka en’eambanyedyo lacin’ena baoyi’owe’aniso.

¹¹In’analangama, yombo Yakomba atokaki nganji yok’one, akoli eneyal’iso tokamelane nganji nkoho.

¹²Bisike bihitu efan’oto onenaki Yakomba. Yomb’iso tokamelana nganji, Yakomba ayali eneyal’iso nko njalama, ko nganji enande eonga eneyal’iso nko mbonga.

¹³Tey’oka toyali eneyal’ende ko ende ayali eneyal’iso njalama nko lacin’oka amotofa liondo lina Bolimo bon’olotsi.

¹⁴Iso tomena ko tolokola boloko’oniso, is’ate Bafango atomaki Bona lacina ayalame Boiki bona loko.

¹⁵Boto l’oto onimedya, ate Yesu ayali Bon’ona Yakomba, Yakomba ayali eneyal’ende njalama, ko ende eneyali Yakomba.

¹⁶Ko iso tomeya ko tomimedya nganji enatooka Yakomba. Yakomba ayali nganji; ko ende onoyali ena nganji njalama, ayali eneyali Yakomba nko njalama, ko Yakomba eneyal’ende.

¹⁷Yok’one nganji eongyama eneyal’iso nko mbonga, lacina tofaange en’ina bon’etendelo en’akambo; lacina yoka bosamb’onoyali endamene, iso toyali nkoho ena loko.

¹⁸Nganji ena lolango efaate mbanga tu; ohonde nganji enonga nko mbonga eumola mbanga, lacina mbanga eyali la nsisodya. Ende onanga mbanga, nganji enande etaonga mbonga mene.

¹⁹Iso toka nganji lacin’oka ende atokak’iso nganji en’oso.

²⁰Yombo boto aila, Mbo emi loka Yakomba nganji, koko aoka efili enande bowe, ayali nko mpoci; iya, ende onofoke efili enande onoki’nd’oenaka nganji, angoka Yakomba onoten’ende nganji yok’osamb’oya?

²¹Iso toata boeka bone eneyal’ende, ate akoli eneyali boto onoka Yakomba nganji aoke efili enande nganji nkoho.