Read ngando 1 Yoane 5 Bible Online

1 Yoane 5 - ngando bible

1 Yoane 5

¹Boto l’oto onimedy’oka Yesu ayali Masiya, amolotwa la Yakomba; ko boto l’oto onok’ende onotaki nganji, aok’ende onoki’nd’ootaka nganji nkoho.

²Tey’oka toka ban’ana Yakomba nganji la yoi line: nk’enok’iso Yakomba nganji, ko tomonya beeka benande.

³Lacina nganji ena Yakomba eh’eho, lacina tomonya beeka benande; ko beeka benande befana locili bike.

⁴Lacina boto l’oto onotwa la Yakomba akoiya loko; ko elonga enekoiya loko eh’ene, nk’imeedyo iniso.

⁵Onokoiya loko oka nai? Efende nko boto onimedya, ate Yesu ayali Bon’ona Yakomba?

⁶One nk’ende onoyaki l’asi ko l’akila, nko Yesu Masiya; efa l’asi kei, ohonde l’asi ko l’akila.

⁷Onoyali temoin ena yoi line nko Bolimo, lacina Bolimo ayali nko solosolo.

⁸Lacina temoins iyali isaso—nko Bolimo, la basi la bakila; ko bah’asaso baambana ena yoi limoko.

⁹Yombo timedya yoi linatend’ato, yoi linatenda Yakomba lileki liho lin’ato; lacin’oka yoi liniki Yakomba otendaka nko liho liniki’nd’otendaka lacin’ena Bon’onande.

¹⁰Onimedya Bona ayali la temoin en’otem’onande; koko ende onofimedya Yakomba amila ate Yakomba ande mpoci, lacin’oka atimedya yoi liniki Yakomba otendaka lacin’ena Bon’onande.

¹¹Ko yoi liho liho line: Yakomba atofaki liiko lonelofakale, ko liiko loho loyali nk’eneyali Bon’onande.

¹²Ende onoyali la Bona, ayali la liiko loho; ende onofayali la Bon’ona Yakomba afana liiko loho.

¹³Mokotengel’ino baoyi’ane, in’animedya ena lina lina Bon’ona Yakomba, lacina beye oka boyali la liiko lonelofakale.

¹⁴Ko nkaso enat’iso eneyal’ende eh’ene, lacina, yombo tufola yoi yoka bosamb’onoyali eango enande, atoka;

¹⁵ko yombo tey’oka atoka en’aoyi bahatu banufol’iso, tey’oka toata baoyi’aho banak’is’oufolak’ende en’oondo.

¹⁶Yombo boto’omoi aen’efili enande kum’ayakambe yoi lin’owe linalifaatel’oto bewedi, angufola, ko Yakomba angof’ende liiko lacin’en’ato’aho banakamb’owe bonofayali yoka bowe bonatel’oto bewedi mene. Yoi limoi lin’owe liyali lina yatel’oto bewedi mene: mpile emite aonde lacin’ena yoi liho.

¹⁷Baoyi bahatu banafana mbongi bayali nko baoyi’owe; koko yoi limoi liyali linalifaatel’oto bewedi.

¹⁸Tey’oka boto l’oto onotwa la Yakomba afakambe baoyi’owe; koko ende onotwaki la Yakomba ayotombany’endamene, ko afafomwa la Boto’oho on’owe.

¹⁹Tey’ok’iso toyali bana-Yakomba, ko baise loko bahatu baeci ena likasa lina boto’oho on’owe.

²⁰Ko tey’oka Bon’ona Yakomba amoya, ko amotof’iso mpokola lacina teye ende ona solosolo, ko toyali eneyal’ende ona solosolo, nk’eneyali Bon’onande Yesu Masiya. One nko Yakomba ena solosolo, ko la liiko lonelofakale.

²¹Ban’anami bana tosalisali, boyotombany’inoamene ena likambo lina baidola.