Read ngando 2 Yoane 1 Bible Online

2 Yoane 1 - ngando bible

2 Yoane 1

¹Engambe, eneyali Kulia onosonama, ko l’eneyali ban’anande banok’emi nganji ena solosolo, ko ef’emi kei: nk’iyatu baneya solosolo eho;

²lacin’ena solosolo eho eneyali eneyal’iso, ko engoyala eneyal’iso bisike bihitu:

³Isei la nganji la mwi bangoyala l’iso eneyali Yakomba Bafango, l’eneyali Yesu Masiya Bon’ona Bafango, nk’ena solosolo l’ena nganji.

⁴Monyangela bike eneki’m’osungyaka ban’ane bamoi bayakende ena solosolo, yok’onok’is’otambaka boeka eneyali Bafango.

⁵Koko isanga lakoond’e, Kulia (efa nk’eyoka lakotengela yoi lina litoto: lakotengela nko liho linik’is’oataka ena limatsako), emite, tokamelane nganji.

⁶Nganji ena lolango eh’ene, lacina tokende yoka bosamb’onoyali beeka benande. Bone nko boeka boho bonok’in’ookaka ena limatsako, lacina bokende l’oho.

⁷Lacina bafoci bike bamenya ena loko, banafimedy’oka Yesu Masiya amoya ena yonge. One nk’ofoci’oho l’ende Onofeka-la-Masiya.

⁸Boyolendak’inoamene, botongoyungya bikambwa binik’is’okambaka, ohonde la cina botambe boluko la mpula.

⁹Boto onolekanya lilako lina Masiya, ko afayali ena lilako liho njalama, ende afaate Yakomba; ohonde ende onoyali ena lilako liho nko njalama, boto’oho aata le Bafango le Bona.

¹⁰Yombo boto aoya eneyal’ino ko afaye la lilako line, botasangelake boto’oho en’otumb’onino, ko boteesake.

¹¹Lacin’oka boto onomeesa aambana l’ende en’ikambw’inande bin’owe.

¹²Kanga baoyi bike bayali lacina nkotengele, ntalanga lacina nkotengele baho la papier ko la encre; ohonde lalengedya, emite nje eneyal’ino, la totendane bonyua l’onyua, lacina ekiko enino ekolane nko nkolana.

¹³Bana ban’oyoto onosonama onotwa l’e bakeesa.