Read ngando Enelo 1 Bible Online

Enelo 1 - ngando bible

Enelo 1

¹Enelo ena Yesu Masiya eneki Yakomba ofak’ende, lacin’eho atume baombo’anande baoyi’aho banafalingalgaki yilama; ko atomaki ekima enande ena loola ko atumaki boombo’onande oka Yoane,

²onoyali temoin ena yoi lina Yakomba ko l’osimo bona Yesu Masiya, nk’aoyi bahatu banaki’nd’oenaka.

³Ende onanda ko l’iy’anoka baoyi ban’enelo ene, ko bamonya baoyi banatengi meho, bakik’ekiko; lacin’oka esike eolama.

⁴Yoane, eneyali bikelesia nsambo biniyali ena Asia: Isei eneyal’ino la mwi, nk’eneyal’ende onoyali, ko ayaaki’ale, ko angoyala linga; ko l’eneyali Belimo nsambo beneyali en’oso bon’ieko inande;

⁵ko l’eneyali Yesu Masiya, onoyali nko Temoin ena solosolo, Ngolo enek’anawaki, Lifoka lina Roi lina Bafoka bana Rois bana loko. Eneyal’ende onotokaki nganji, ko atotungolaki en’aoyi’owe’aniso l’esongelo ena bakil’anandamene;

⁶ko atilaki toyalame lifoka ko la nkanga eneyali Yakomba, Bafango’onande: Lokumo la mpamba eneyal’ende bisike la bisike. Ndoho.

⁷Lenda, aoya la bailo; baiso bahatu bangen’ende, ko l’iy’anookaki mpota nkoho; ko bicimo bihitu bina loko bingolela lacin’enande. O! Ndoho!

⁸Yawe Yakomba aila, ate, Emi nde nde Alpha la Omega, Ende onoyali, ko ayaaki’ale, ko angoyala linga, Yakomba onise mpamba ehatu.

⁹Emi Yoane, efili enino onambana l’ino ena bino ko l’ena lifoka l’ena locinji lona Yesu, njaaki en’ekolo enetangama Patemo, lacin’ena yoi lina Yakomba, ko lacin’ena bosimo bona Yesu.

¹⁰Emi njaaki ena Bolimo en’ina bona Nkolo, ko njokaki lofoso lona lokolo yoka bopate ena mbusa enami,

¹¹ko loho lilaki, ate, Tenga baoyi banen’e en’okanda, ko toma boho eneyali bikelesia nsambo biniyali ena Asia: ena Efeso, la Semuluna, la Pelungamona, la Twatila, la Saludi, la Filadelufiya, la Laodikiya.

¹²Ko nkengwaki lacina njene lofoso lonelotendaki l’emi; ko eneki’m’okengwaka njenaki biilelo bina mwinda bina wolo nsambo,

¹³ko ena ntoto ena biilelo bina mwinda nsambo njenaki Omoi onoyaaki yoka Bon’on’oto, onolotaki bokoto bonokitaki nk’en’akaka, ko la bokoli bona wolo bolici ena ntolo.

¹⁴Bote’onande la lifo linande bayaaki telele yoka besa bena mpate, yoka beelenge, ko baiso’a nande bayaaki yoka lombi lona nkoi;

¹⁵ko bakak’anande bayaaki yoka beango beneloloma kuma beotumbama en’etumbelo; ko efodya enande eyaaki yoka efodya ena basi bike.

¹⁶Aundaki tooto nsambo ena likasa linande y’ome, ko lokula lon’ita lonelofeta bik’ike en’eselek’eh’efe lofolaki en’onyu’onande; ko elongi enande eyaaki yoka bina bonoyafule bane bike la locili lona boho.

¹⁷Eneki’m’oenak’ende, nkwaki en’akak’anande nk’eyoka boto onowa tutu. Ko atadyaki likasa linande y’ome eneyal’emi, ko anjilaki, ate, Taangake, Emi nde nde On’oso l’Ona mbusa,

¹⁸la Onoyike; mbwaki, ko lenda, njaike bisike la bisike; ko mbundisi nsete ina Bewedi l’ina Adese.

¹⁹Lacin’eho, tenga baoyi banak’oenaka, baoyi banayali la baoyi banangilama ena mbusa;

²⁰yoi lin’ofisafisa lina tooto nsambo tonatoki oenaka ena likasa linami y’ome, ko la biilelo bina mwinda bina wolo nsambo. Tooto toho nsambo toyali nko bikima bina bikelesia nsambo, ko biilelo bina mwinda nsambo biyali nko bikelesia nsambo.