Read ngando Enelo 11 Bible Online

Enelo 11 - ngando bible

Enelo 11

¹Ko bokombi bofamaki eneyal’emi, bonoyaaki yoka bonganza bona lelelo; ko omoi ailaki, ate, Emala, oyeledya botumba bona Yakomba, ko la mesa ena mbeka, ko l’iy’anakumya Yakomba meho.

²Ohonde etenyi eneyali ena mbiolo en’otumba, cik’eho, teledyake eho; lacina etenyi eho emofama Befenda; ko bangikamela bonyanga bon’oeka nsenza ntuk’inei la nsenza ife.

³Ko nongofa temoins inami ife etelo lacina batende baoyi bina nkoto l’ekam’efe la ntuku botoa, kuma bayalote benuko.

⁴Bane nko bete bena bilaya befe, la biilelo bina mwinda bife, banemali en’oso bona Nkolo ena loko.

⁵Ko yomb’oto’omoi asokolanga oyilel’iyo yoi lin’owe, nkoi yofola en’enyu’eniyo, ko iho yokadya baokyi’owe’aniyo nko kali; ko yomb’oto alanga oyilel’iyo yoi lin’owe angoyakama yok’osamb’oho.

⁶Bane bayali l’etelo lacina bakombe loola, lacina mbula efalwa en’ina benatend’iyo baoyi’aniyo; ko bayali l’etelo lacina bahalingole basi bakila, ko lacina baehya loko la njoci ihatu, nk’en’esike en’etaketaka enalang’iyo.

⁷Ko eneng’iy’okadya baoyi’aniyo bana temoin, nyama eho enefola ena lifoku lina Abuso angaokanya bita, ko angakoiya, ko angayaka tu.

⁸Ko beduo beniyo bengoyala ena mboka ina bonyanga bon’okolo, bonotangama l’ekolanya en’olimo Sodomo la Ejipeto, nk’onyanga bonoki Nkolo eniyo oakamaka en’ekulusu.

⁹Ko bato bana bicimo bihitu, la beloi behetu bena loko, la mposo ihatu, la benyanga behetu, bangolenda beduo beniyo bekolo besaso l’etenyi en’okolo, ko bafimedyaki’oka beduo’eniyo bekunjame ena nketa.

¹⁰Ko bato banatonga ena loko bangonyangela lacin’eniyo, ko bangokik’ekiko, ko bangotomelana nganji; lacin’oka basumoli bane bafe baenyaki baise loko bino.

¹¹Koko eneki bekol’esaso l’etenyi okalaka, lofofe lona liiko loneloyaki eneyali Yakomba lotuaki eneyal’iyo, ko baemalaki en’akak’aniyo, ko losomo mene lokwelaki bato bahatu banalendaki.

¹²Ko baokaki lofoso lona lokolo ena loola, lonasumolaki, ate, Boanda mendo ena liko. Ko iyo bailelaki ena loola ena lilo; ko baokyi’owe’aniyo balendaki.

¹³Ko ena heure eho loko lolidyamaki elilelo ena nkolo mene, ko likafo limoko lin’akafo jo ban’onyang’oho likwaki; ko bato nkoto nsambo bayakamaki l’elilo eho ena loko; ko iy’anacikalaki baangaki nko mbanga, ko bakumyaki Yakomba ena loola.

¹⁴Bino bin’ife bimeta; lenda, bin’isaso bioli nko mbolimboli.

¹⁵Ko ekima ena nsambo afomaki bopate; ko mposo ina nkolo mene yokanaki ena loola, ko iho yilaki, iy’ate, Lifoka lina loko limoyalama lifoka lina Nkolo eniso, ko la lina Masiya enande; ko angoyala ena lifoka liho bisike la bisike.

¹⁶Ko bingambe ntuk’ife la binei banakisak’ase ena toeko toniyo en’oso bona Yakomba, bakwaki ena bilongi biniyo, ko bakumyaki Yakomba,

¹⁷iy’ate, Tokokang’e lokango, O Yawe Yakomba, Onise mpamba ehatu, Onoyaaki’ale ko Oyali, lacin’e omotamba mpamba ene ena nkolo mene, ko omotamba lifoka line.

¹⁸Baise benyanga baokaki nkele, koko nkele ene emoya, ko esike en’etendelo en’akambo ban’ato banawaki emoyela, ko l’esike enengof’e baombo’ane, nko basumoli, beluko beniyo, ko la ban’oeka ko l’iy’ananga lina line, le bana tosalisali le ban’akolo; ko l’esike enengehy’e iy’anehya loko.

¹⁹Ko ilombe ina Yakomba iniyali ena loola ikombwaki; ko sanduka en’eteelo enande ena lisangya enyaki en’ilombe inande; ko bahalihali, la mposo, la bakungola, l’elilelo ena loko, la beelenge ben’okolo mene bailamaki.