Read ngando Enelo 13 Bible Online

Enelo 13 - ngando bible

Enelo 13

¹Ko aemalaki ena longewu lona lose l’okwa. Ko njenaki nyama emoi eyatefwa ena lose l’okwa. Eyaaki la baseki jo ko la bete nsambo; ko ayaaki la diademes jo ena baseki’anande, ko la baina bana besao ena bete’enande.

²Ko nyama eho eneki’m’oenaka eyaaki yoka nkoi, ko bakak’anande bayaaki nk’eyoka bakaka bana ours, ko bonyua bonande yoka bonyua bona longuli; ko dragon aofaki locili lonande ko l’ieko inande, ko la lifoka lin’okolo.

³Ko njenaki bote’onande’omoi nk’eyoka bomotala mpota en’ewedi; ko mpota enande en’ewedi eikaki, ko loko lohalotu lofefaki nyaina eho.

⁴Ko bakumyaki dragon, lacin’oka afaki nyama eho lifoka linande; ko bakumyaki nyama eho, iy’ate, Onokoli la nyama ene oka nai? ko oninya liyokany’ende bita oka nai?

⁵Ko bonyua bofamakieneyal’ende lacina atende baoyi ban’akolo l’ana besao; ko etelo eofam’ende lacina akambe bikambwa binande nsenza ntuk’inei la nsenza ife.

⁶Ko amumolaki bonyu’onande lacina asaiya Yakomba besao, ko lacina asaiya lina linande ko l’ilombe inande ko l’iy’anatonga ena loola.

⁷Ko etelo eofam’ende lacina aokanya ban’oeka bita, ko amalonga; ko lifoka lifamaki eneyal’ende eneyali bicimo bihitu, ko l’eneyali beloi ben’ato behetu, la mposo ihatu, la benyanga behetu.

⁸Ko bato bahatu banatonga ena loko bangokumy’ende: nko boto l’oto onotatengama lina en’okanda bona liiko bona Bon’ona mpate onoyakama ena limatsako mene lina loko.

⁹Yomb’oto ayali la litoi, aongyake lilofa.

¹⁰Yomb’oto akaf’akin’ato ena yombo, endamene angocoa ena yombo; yomb’oto ayak’akin’ato la lokula lon’ita, endamene angoyakama la lokula lon’ita. Locinji l’imeedyo bana ban’oeka, bah’ane.

¹¹Ko njenaki nyama ekina eyilele, eyafole ena loko. Ende ayaaki la nsea ife yoka bon’ona mpate, ko atendaki yoka dragon.

¹²Ko ende akamba la lifoka lihalitu lina nyama eneki’oso en’aiso’anande; ko aotoma loko ko l’iy’anatonga ena loko lotomo lacina bakumya nyama eneki’oso, nko nyama eho eneki mpota enande enande en’ewedi oikyamaka.

¹³Ko akamba bikambwa bina mpefa mene: aelela nkoi ecike loola ko ekite ena loko en’oso bon’ato.

¹⁴Ko afot’iy’anatonga ena loko lacin’ena bikambwa bina mpefa binifam’ende lacina akambe biho en’oso bona nyama eho; asumola bato banatonga ena loko, ate baile efoya ena nyama eho eneyaaki la mpota ena lokula lon’ita ko eikaki.

¹⁵Ko etelo efamaki eneyal’ende lacina afe efoya eho ena nyama eho lofofe, lacina efoya ena nyama etende baoyi, ko aile, ate iyatu banafakumya efoya ena nyama eho bayakame.

¹⁶Ko aila, ate, bato bahatu, le ban’asali le ban’akolo, le batuki le biinda, le nsomi le baombo, iyatu batambe ndembi ena likasa liniyo y’ome, yombo en’elongi eniyo.

¹⁷Ko efan’oto oninya lisomb’iyema, ko efan’oto oninya liteky’iyema, umola nk’ende onoyali la ndembi eho, nko lina lina nyama eho, yombo botuya bona lina linande.

¹⁸Bomwu boh’one. Ende onoyali la mpokola, aalake botuya bona nyama eho; lacina botuy’iho boyali nko botuya bon’oto; ko botuy’onande boyali nko bekam’otoa la ntuk’otoa l’otoa.