Read ngando Enelo 14 Bible Online

Enelo 14 - ngando bible

Enelo 14

¹Ko njenaki, ko lenda, Bon’ona mpate aemali ena lingonji lina Siona, ko bato bayaaki l’ende bokoka bomoko la nkese inei la nkoto inei, banayaaki la lina linande ko la lina lina Bafango’onande ntengama ena bilongi biniyo.

²Ko njokaki lofoso ena loola, yoka lofoso lona basi bike, ko yoka lofoso lona likungola lina likolo mene; ko lofoso loneloki’m’ookaka loyaaki nk’eyoka lofoso lona bafomi bana bengele banayafome bengele’eniyo;

³ko baembaki yoka lembo lona lototo en’oso bon’ieko iho, l’en’oso bona nyama ih’inei iniyike, l’en’oso bona bingambe biho; ko efan’oto oninyaki yekela lembo loho, umola nk’iyo, bato bokoka bomoko la nkese inei la nkoto inei, banasombamaki ena loko.

⁴Bane nk’iyo banatayehy’iyoamene l’ayato, lacin’oka iyo bayali benjemba mene. Bane nk’iy’anakila Bon’ona mpate bili l’ili bonaco’ende. Bane basombamaki eneyali bato, lacin’eho bayalame bemamo ben’oso eneyali Yakomba l’eneyali Bon’ona mpate.

⁵Ko mpoci itasungyama en’onyu’oniyo tu: bafana lianda tu.

⁶Ko njenaki ekima emoi ayafumbwa ena ntoto ena loola; ayaaki la bosimo bon’olotsi bona bisike bihitu lacina asekodya boho eneyal’iy’anatonga ena loko, ko l’eneyali benyanga behetu, la bicimo bihitu, la mposo ihatu, la beloi behetu ben’ato.

⁷Ko atendaki la lofoso lona lokolo, ate, Boangaka Yakomba, ko bokumyake lokumo, lacina esike en’etendelo enande en’akambo emoyela; ko bokumyak’ende ononunolaki loola, ko la loko, ko la lose l’okwa, ko la bitoko bin’asi.

⁸Ko ekima emoi en’ife aokilaki ena mbusa, ailaki, ate, Amokwa! Babela, bonyanga bon’okolo bonomedyaki benyanga behetu vina ena nkele ena lisamba linande, amokwa!

⁹Ko ekima emoi en’isaso akilaki iy’afe ena mbusa, ailaki la lofoso lona lokolo, ate, Yombo boto’omoi akumya nyama eho ko l’efoya enande, ko atamba ndembi en’elongi enande yombo ena likasa linande,

¹⁰ende nkoho angomela vina ena nkele ena Yakomba, enekodyama efana nsanganya en’ekala ena nkele enande; ko angenyama bino la nkoi ko la soufre en’oso bona bikima bin’oeka, ko l’en’oso bona Bon’ona mpate;

¹¹ko bolinga bona bino biniyo bilela bisike la bisike; ko iy’anakumya nyama eho ko l’efoya enande, ko boto l’oto onotamba ndembi ena lina linande, bafana lifomya l’ane l’oco tu.

¹²Locinji lona ban’oeka loho lone: nk’iy anamonya beeka bena Yakomba ko l’imeedyo ina Yesu.

¹³Ko njokaki lofoso ena loola, lotendaki l’emi, ate, Tenga: bawei banawa eneyali Nkolo en’isik’ine baosakelama bosako mene. Bolimo aila, ate, O, ekoli lacina bafomya ena bikambwa biniyo; lacina bikambw’iniyo bimakila.

¹⁴Ko njenaki, ko noka, lilo lina telele; ko boto’omoi aokisase ena lilo nk’eyoka Bon’on’oto; ayaaki la likuka lina wolo en’ote’onande, ko asukaki bongwangwa bonofeta ena likasa linande.

¹⁵Ko ekima emoi afolaki en’ilombe ina Yakomba, asumolak’ende onokisase ena lilo la lofoso lona lokolo, ate, Toma bongwangw’one ko nuka, lacina esike en’enukelo emoyela, ko loko lomokolana l’enukelo nko nkolana.

¹⁶Ko ende onokisak’ase ena lilo afusaki bongwangw’onande ena loko; ko loko lonukamaki.

¹⁷Ko ekima ekina afolaki en’ilombe ina Yakomba iniyali ina loola, ko ende nkoho ayaaki la bongwangwa bonofeta.

¹⁸Ko ekima emoi afolaki ena mesa ena mbeka, nk’end’e onise lifoka lina nkoi; ko aelelaki ende onise bongwangwa bonofeta la lofoso lona lokolo, ate, Toma bongwangw’one bonofeta, ko nukola bikatamba bina bokoli bona vina bona loko, lacina bemamo’enande bemeela nde.

¹⁹Ko ekima afusaki bongwangw’onande ena loko, ko anukolaki bemamo bena bokoli bona vina bona loko, ko afusaki beho en’eminyedyo ena vina, nk’eminyedyo eho ena nkolo mene ena nkele ena Yakomba.

²⁰Ko baikamelaki eminyedyo eho ena mbiolo en’onyanga, ko bakila bafolaki en’eminyedyo, yengoko baho bayelaki ena bakama bana mpunda, bosana yoka kilometres bekam’esaso la ntuk’ife.