Read ngando Enelo 16 Bible Online

Enelo 16 - ngando bible

Enelo 16

¹Ko njokaki lofoso lona lokolo en’ilombe ina Yakomba losumolaki bikima biho nsambo, ate, Bocoaka, boyutele bikala biho nsambo bina nkele ena Yakomba ena loko.

²Ko ekima en’oso acoaki, ko autelaki ekala enande ena loko; ko mpota en’owe l’en’efafo enyaki eneyali bato banayaaki la ndembi ena nyama eho, ko l’iy’anakumyaki efoya enande.

³Ko ekima en’ife autelaki ekala enande ena lose l’okwa; ko loho lohalingwaki bakila nk’eyoka bakila ban’oto onowaki; ko bolimo l’olimo onoyike awaki, nko bikambwa bihitu biniyaaki ena lose l’okwa.

⁴Ko ekima en’isaso autelaki ekala enande ena njose ko l’ena bitoko bin’asi; ko bahalingwaki bakila.

⁵Ko njokaki ekima ena basi aila, ate, E oyali Ona mbongi, onoyali ko oyaaki’ale, E on’oeka, lacina E omokesa likambo yok’one;

⁶lacin’oka iyo bautelaki bakila bana ban’oeka ko l’an’asumoli, ko E omolafa bakila, la bamele baho. Yoi liho likoli l’iyo nko nkolana.

⁷Ko njokaki yoi ena mesa ena mbeka, ate, O, Yawe Yakomba, bitendelo bine bin’akambo biyali nko bina solosolo l’ina mbongi.

⁸Ko ekima en’inei autelaki ekala enande ena bina; ko etelo efamaki eneyali boho lacina botumbe bato la nkoi.

⁹Ko bato balikaki l’efefe en’ane bon’olema mene; ko basaiyaki lina lina Yakomba onoyaaki la lifoka lina njoci iho, ko batayokanya, batof’ende lokumo tu.

¹⁰Ko ekima en’itano autelaki ekala enande en’ieko ina nyama eho; ko bilima bokwelaki lifoka linande; ko batomaki ndemi iniyo nko ntema lacin’en’efafo;

¹¹ko basaiyaki Yakomba ena loola lacin’ena bifafo biniyo la mpota iniyo, ko batayokanya lacina bacike bikambw’iniyo.

¹²Ko ekima en’otoa autelaki ekala enande ena lose lona lokolo loka Pelata; ko basi bana lose loho baomaki nko njoma, lacina mboka ena bafoka bana ngoya en’ili bona Est eongyame.

¹³Ko njenaki bafoi basaso bana nsefo, yoka bekeele, bafolaki en’onyua bona dragon, ko l’en’onyua bona nyama eho, ko l’en’onyua bon’osumoli’oho bona mpoci.

¹⁴Lacina baho bayali nko bafoi bana bademona banayakambe bikambwa bina mpefa, banacoa eneyali bafoka bana rois bana benyanga behetu, lacina basusany’iyo ena bita bina bin’oho bon’okolo bona Yakomba ona mpamba ehatu.

¹⁵(Lenda, emi loya nk’eyoka liya. Ende onotombanya, ko amonya bisenda binande, atorrgokenda bolumbulumbu, ko batongoyena nsoi enande, boto’oho akik’ekiko.)

¹⁶Ko basusanyak’iyo en’edye enetangama ena lofoso lona Ba-Ebele Ala-Mengido.

¹⁷Ko ekima ena nsambo autelaki ekala enande en’efoefoe; kolofoso lona lokolo lofolaki en’ilombe ina Yakomba iniyali ena loola, ko l’en’ieko iho, liilaki, ate, Yoi limilama.

¹⁸Ko bahalihali l’akungola la mposo bailamaki; ko loko Jolidyamaki elilelo ena nkolo; bisike bihitu biniki bato oyalaka ena loko, etaata elilelo ena locili mene l’en’okolo mene yok’oho.

¹⁹Ko bonyang’oho bon’okolo bokambwanaki bitenyi bisaso; ko bengili ben’enyanga bekwaki; ko Yakomba aofwaki Babela on’okolo, lacina aofe ekala ena vina ena bolema bona nkele enande.

²⁰Ko bikolo bihitu biolota, ko bangonji batasungyama lakina tu.

²¹Ko beelenge ben’ekolo mene, bomoko kei bolito bona kilos yoka talento emoko, beokwa ena loko ko beokwela bato; ko bato basaiyaki Yakomba lacin’ena loci lona beelenge, lacin’oka loci loho loyaaki lona lokolo mene loneloleki.