Read ngando Enelo 17 Bible Online

Enelo 17 - ngando bible

Enelo 17

¹Ko ekima emoi ena bikima biho nsambo banayaaki la bikala nsambo ayaki, ko atendaki l’emi, ate, Yaka, mpokotuma etendelo ena likambo lin’oyoto’on’okolo ona lisamba, onokisase mmotama ena basi bike.

²Bafoka bana rois bana loko bamotata bakele l’ende, ko iy’anatonga ena loko bamolangwa la vina ena lisamba linande.

³Ko antolaki la Bolimo ena sengelenge emoi; ko njenaki boyoto onotalama ena nyama emoi ena écarlate, enelola la baina bana besao, eneyaaki l’ete nsambo ko l’aseki jo.

⁴Ko boyoto alotaki bisenda bina pourpre ko l’ina écarlate, ko akombyamaki bokombe la wolo ko la baufe ban’otuya mene ko la perles; asukaki ena likasa linande ekala ena wolo enelola la baoyi bana nsefo ko la bikambwa bina nsefo bina lisamba linande.

⁵Ko en’elongi enande lina lina litengamaki, lika yoi lin’ofisa, babela bon’okolo, nyango en’ayato bana lisamba, nyango en’aoyi bana nsefo bana loko.

⁶Ko njenaki boyoto’oho kum’ayalangwa l’akila bana ban’oeka, ko l’akila baniyo banawelaki Yesu. Ko eneki’m’oenak’ende mpefaki nko mpefa mene.

⁷Ko ekima ansumolaki, ate, Ofefa lacina nai? Nongokosakitwela bokotua bon’oyoto’oho, ko l’okotua bona nyama eho eneyatole boyoto, eneyali l’ete nsambo ko l’aseki jo.

⁸Nyama eho enem’oenaka eyalamaki’ale, koko efayali, koko engofol’isanga ena Abuso, ko engocoa isanga en’eehedyo. Ko iy’anatonga ena loko, nk’iy’anatatengi la baina en’okanda bona liiko nk’ena limatsako lina loko, bangofefa nko mpefa eneng’iy’oena nyama eho eneyalamaki’ale, ko efayali, koko engenya lakina.

⁹Lokanyi loneloyali la bomwu loho lone: Bete nsambo beyali bangonji nsambo banakisase boyoto’oho.

¹⁰Ko beyali nko bafoka bana rois nsambo: bamoi batano bamokwa, limoko ayali, koko likina ataye; ko enengi’nd’oya angokinda ilalela.

¹¹Ko nyama eho eneyalamaki’ale, ko efayali, ende ayali lifoka lina mwambi, koko lakina ayali omoi ona baho nsambo; ko ende angocoa en’eehedyo.

¹²Ko baseki jo banam’oenaka bayali nko bafoka bana rois jo, banatatambe lifoka lina rois, ohonde bangotamba lifoka liho lina rois, iyo la nyama eho, nk’eyoka heure emoko.

¹³Bane bayali nko la lokanyi lomoko, ko bangofa nyama eho locili loniyo ko la lifoka liniyo.

¹⁴Bane bangokanya Bon’ona mpate bita, ko Bon’ona mpate angalonga, lacina Ende ayali Nyangetuke ena Banyangetuke, ko ayali Lifoka lina Bafoka bana Rois; ko iy’anayali l’ende bangambana l’ende en’elonga eho, nk’iy’anelelama, banasonama, la bana solosolo.

¹⁵Ko ansumolaki, ate, Basi banam’oe naka, banakisase boyoto’oho ona lisamba, basi’aho nko bato, la beloi ben’ekolo ben’ato, la bicimo, la mposo.

¹⁶Ko baseki jo banam’oenaka—iyo la nyama eho—bangoka boyoto’oho bowe, ko bangeehy’ende, ko bangolotol’ende bisenda l’ayalame bolumbulumbu, ko bangola bonufo’onande, ko bangotumb’ende ena nkoi nko ntumba.

¹⁷Lacin’oka Yakomba ailaki lokanyi en’etem’eniyo lacina bakambe eango enandamene, ko baambane la lokanyi lomoko, lacina baofa nyama eho lifoka liniyo, yengoko baoyi bana Yakomba bailama.

¹⁸Ko boyoto’oho onom’oenaka ayali nko bonyang’oho bon’okolo bonoyali la lifoka eneyali bafoka bana rois bana loko.