Read ngando Enelo 18 Bible Online

Enelo 18 - ngando bible

Enelo 18

¹Ko ena mbusa en’aoyi’ane njenaki ekima ekina eyakite ena loola. Ayaaki la lifoka mene lin’okolo, ko loko lofolala la bokonde’onande.

²Ko aloluaki la lofoso lona locili mene, ate, Amokwa I Babela bon’okolo amokwa! ko bomoyalama eyaelo ena bademona, ko l’eyaelo en’enyolo ena bafoi bana nsefo bahatu, ko l’eyaelo en’enyolo ena mpulu ihatu ina nsefo initangama nko bowe.

³Lacin’oka baise benyanga behetu bamomela vina ena nkele ena lisamba linande; ko bafoka bana rois bana loko bamotata bakele l’ende; ko bateki bana baongwa bana loko bamoyalama batuki bana toma la locili lona bikambwa binande bina bikiko binande.

⁴Ko njokaki lofoso lokina ena loola liilaki, ate, Ino bato’anami, bum’eneyal’ende, botongoyambana l’ende en’aoyi’owe’anande, botongofomwa njoci inande.

⁵Lacina baoyi’owe’anande bamoyela ena loola mene, ko Yakomba amolofwa baoyi’anande ban’owe.

⁶Butodya eneyal’ende nko bokotua bonoki’nd’okofaka; butodya eneyal’ende beutodya befe lacin’ena bikambwa binande; en’ekala eneki’nd’osanganyaka, bosanganyedya besanganya befe.

⁷Yoka bosamb’onoki’nd’oyokumyak’endamene, ko akambaki nko la bikiko binandamene, beeny’ende bino ko la lilelo nko la lelelo loho; lacin’ende aila en’otem’onande, Mbo emi nkisase yoka lifoka lina reine, mpayali boweli, ko mpenaki lokeseli tu.

⁸Lacin’eho, en’in’omoko kei bino binande bingoya eneyal’ende, nko bewedi, la lilelo, la loci lona njala; ko angotumbama la nkoi nko ntumba; lacina Yawe Yakomba onomokoiya likambo aseki mpamba.

⁹Ko bafoka bana rois bana loko, iy’anatataki bakele l’ende ko bakendaki l’ende ena bikambwa binande bina bikiko binande, bangolela ko bangofoma befwi lacin’enande, eneng’iy’oena bolinga bon’etumbelo enande;

¹⁰bangemala en’osana lacin’ena losomo lona bino binande, ko bangila, iy’ate, Bino, Bino, bonyanga bon’okolo, Babela, bonyanga bon’okolo! lacina etendelo ena likambo line emoya nk’ena heure emoko.

¹¹Ko bateki bana baongwa bana loko bangolela ko bangofoma befwi lacin’enande, lacin’oka efan’oto onosomba baongw’aniyo lakina tu:

¹²baongw’aniyo nko wolo, la argent, la baufe ban’otuya, la perles, la mbenza en’olotsi, la pourpre, la soie, la écarlate, la bambaya bana mpimbo en’olotsi, la bikala bihitu bina bepate bena njou, la bikala bin’ekotua l’ekotua binisengama en’ambaya banaseki’otuya, la bikala bina beango, la bikala bina bifeko, la bikala bina marbre,

¹³la cinnamome, la toumba, la parfums, la myrrhe, la encens, la vina, la bauta, la farine en’olotsi, la blé, la ngombo, la mpate, la mpunda, la bitoelo, la baombo, ko la belimo ben’ato.

¹⁴Ko bemamo beneki bolimo’one ookaka mposa bemuma eneyal’e; ko toma tohatotu ton’olotsi la ton’ekiko tomoleha eneyal’e, ko ofenaki toho lakina tu.

¹⁵Bateki bana baongw’ane, banayalamaki batuki bana toma l’ende, bangemala en’osana lacin’ena losomo lona bino binande, kuma bayalele ko bayafome befwi,

¹⁶iy’ate, Bino, bino, bonyanga bon’okolo, onolotaki mbenza en’olotsi, ko la pourpre, ko la écarlate, onokombyamaki bokombe la wolo, ko la baufe ban’otuya ko la perles!

¹⁷Lacina lituka liho bik’ike limolehyama ena heure emoko. Ko capitaines ina basua bahatu, la bato bahatu banetaki l’asua, l’asali ban’asua, l’iyatu banakemba nkita l’osala bona lose l’okwa, baemalaki en’osana,

¹⁸ko, eneki’oy’oenaka bolinga bon’etumbelo enande, baloluaki, iy’ate, Bonyanga bonokoli l’onyang’oho bon’okolo boka nai?

¹⁹Ko bafusaki bekongo en’ete’eniyo, ko balelaki, ko bafomaki befwi, ko bailaki, iy’ate, Bino, bino, bonyanga bon’okolo, bonyanga bonok’iyatu banayaaki l’asua ena lose l’okwa oyalamaka batuki bana toma lacin’ena lituka linande! Ende amolehyama nk’ena heure emoko!

²⁰E loola, l’inoban’oeka, l’ino bikima, l’ino basumoli, bonyangelaka lacin’enande; lacina Yakomba amolokoiya l’etendelo enino.

²¹Ko ekima ena locili aambolaki lufe nk’eyoka lufe lina likolo mene lin’eminyedyo ena blé, ko afusaki liho ena lose l’okwa, ko ailaki, ate, Nk’osamb’oho Babela, bonyang’oho bon’okolo, bongofusama en’ase l’ekwelo ena nkolo mene, ko bofasungyamaki lakina tu.

²²Ko mposo ina bafomi bana bengele, l’ina baembi bana njembo, l’ina bafomi bana tofonge la bepate, ifokanaki lakina eneyal’e tu; ko efaataki bosali’omoko ona bomwu onongosungyama lakina ena ntoto ene tu; ko lolingo lon’eminyedyo en’asongu lofokanaki lakina ena ntoto ene tu;

²³ko fololo ena mwinda efafetaki lakina eneyal’e tu; ko lofoso lona nsongi la lofoso lona ikuke ifokanaki lakina ena ntoto ene tu; lacin’oka bateki bane bana baongwa bayaaki nko bana-lifoka bana loko, ko benyanga behetu bafotamaki la baloka bane.

²⁴Ko bakila ban’asumoli l’ana ban’oeka, l’akila ban’iyatu banayakamaki ena loko, basungyamaki ena ntoto enande.