Read ngando Enelo 19 Bible Online

Enelo 19 - ngando bible

Enelo 19

¹Ko ena mbusa en’aoyi’ane njokaki lofoso lona lokolo mene nk’eyoka lofoso lona bato bik’ike ena loola, liilaki, ate, Aleluya; liiko la lokumo la mpamba nk’eneyali Yakomba eniso;

²lacina bitendelo binande bin’akambo biyali bina solosolo l’ina mbongi, lacin’oka amokoiya boyoto’oho on’okolo ona lisamba onehyaki loko la lisamba linande likambo, ko amolutodya nkele lacin’ena bakila ban’asali’anande banaki boyoto’oho outelaka.

³Ko bailaki bila bon’efe, iy’ate, Aleluya. Ko bolinga bonande boyilele bisike la bisike.

⁴Ko bingambe ntuk’ife l’inei, la nyama ih’inei iniyike, bakwaki mbosama, ko bakumyaki Yakomba onokisase en’ieko, iy’ate, Nkoho; Aleluya.

⁵Ko lofoso lomoi lofolaki en’ieko, ate, Bokumya Yakomba eniso, ino baombo’anande bahatu, l’in’anang’ende, le ban’asali le ban’akolo.

⁶Ko njokaki yoka lofoso lona bik’ike bon’ato, yoka lofoso lona basi bike, yoka lofoso lona bakungola bana locili mene, liilaki, ate, Aleluya; lacina Yawe Yakomba eniso onise mpamba ehatu ayali Lifoka lina Roi.

⁷Akoli eneyal’iso tokike ekiko ko tonyangele, ko tokumya nk’ende; lacina liala lina bolongai lina Bon’ona mpate limoyela, ko booli’onande amoyokolany’endamene.

⁸Ko etelo efamaki eneval’ende lacina ayolots’endamene mbenza en’olotsi ena soto l’ena kalikali; lacina mbenza en’olotsi eyali nko bikambwa bina mbongi bina ban’oeka.

⁹Ko ansumolaki, ate, Tenga: iy’anelelama en’elambedya ena nsongana ena bolongai ena Bon’ona mpate bakik’ekiko. Ko ansumolaki, ate, Bane nko baoyi bana Yakomba bana solosolo.

¹⁰Ko nkwaki en’akak’anande oyokumya. Ohonde ansumolaki, ate, Tilake’oho, emi nk’osali yok’e, ko yoka bifili bine banundamela bosimo bona Yesu. Kumya nko Yakomba; lacina bosimo bona Yesu boyali bolimo bon’esumwelo en’aoyi.

¹¹Ko njenaki loola lokombwa, ko lenda, mpunda ena telele; ko ende onotalamel’eho aotangama la lina lika On’imeedyo la Ona-solosolo; ko ende ayatende bakambo ko ayokane bita nko la mbongi.

¹²Baiso’anande bayali yoka lombi lona nkoi, ko diademes bike iyali en’ote’onande; ko ayali la lina ntengama linalifan’oto oneya liho, umola nk’endamene kei.

¹³Ko aolota esenda eninamaki en’akila; ko lina linande limotangama nko Yoi lina Yakomba.

¹⁴Ko beloi bena soldats beneyali ena loola bemokila nk’ende, nko ntalama ena mpunda ina telele, ko balotaki mbenza en’olotsi ena telele l’ena soto.

¹⁵Ko lokula lon’ita lonelofeta lofola en’onyu’onande, lacina aoke baise benyanga la loho; ko angatombanya la botondo bon’efeko; ko angikamela eamwedyo ena vina ena bolema bona nkele ena Yakomba onise mpamba ehatu.

¹⁶En’esenda enande l’ena efelo enande lina limotengama, lika lifoka lina roi lina bafoka bana rois, KO NYANGETUKE ENA BANYANGETUKE.

¹⁷Ko njenaki ekima emoi aemali ena bina; ko aloluaki la lofoso lona lokolo, asumolaki mpulu ihatu ineyafumbwa ena ntoto ena loola, ate, Boyaka, bosusane en’elambedya ena nkolo ena Yakomba;

¹⁸lacina boyole bonufo bona bafoka bana rois, ko l’onufo bona capitaines, ko l’onufo bon’ato bana locili, ko l’onufo bona mpunda, ko l’onufo’oniyo banatalama ena mpunda, ko l’onufo bon’ato bahatu, le nsomi le baombo, le ban’asali le ban’akolo.

¹⁹Ko njenaki nyama eho, la bafoka bana rois bana loko la beloi’eniyo bena soldats, basolonganaki oyokany’ende onotalama ena mpunda bita, ende l’oloi’onande bona soldats.

²⁰Ko nyama eho aundamaki, ende l’osumoli’oho bona mpoci onokambaki bikambwa bina mpefa en’oso’onande, bikambwa biniki’nd’ofotaka bato’aho banatambaki ndembi ena nyama eho ko bakumyaki efoya ena nyaina eho. Iy’afe, kuma bayaike batawu, bafusamaki ena lose lona nkoi lonelofeta la soufre.

²¹Ko iyatu banacikalaki bayakamaki la lokula lon’ita lonande onotalamaki ena mpunda, nko lokula lonelofolaki en’onyu’onande. Ko mpulu ihatu ikindaki la bonufo’oniyo.