Read ngando Enelo 2 Bible Online

Enelo 2 - ngando bible

Enelo 2

¹Tengela ekima ena Ekelesia ena Efeso yok’one: Ende onosukita tooto nsambo ena likasa linande y’ome, ende onoselasela ena ntoto ena biilelo bina mwinda bina wolo nsambo, aila baoyi’ane, ate,

²Emi leya bikambw’ine ko la bosal’one ko la locinji lone, ko ley’oka ofakolana yitedya bato ban’owe, ko omomeka bato’aho banayotang’iyoamene bikima kuma bafayali bikima, ko omolasungya nko bafoci bana mpoci;

³ko omiitedya, ko omotola bolito lacin’ena lina linami, ko otalembwa tu.

⁴Ohonde njali la yoi limoi ena likambo line, lacina oumbelaki nganji ene ena lolango eneki’oso’ale.

⁵Lacin’eho, kanedya enek’okwaka, ko halingola botem’one, ko kamba bikambwa bin’oso mene. Yombo ofile’oho, nongoya eneyal’e; ko yombo ofayokanya, nongumola eilelo ene ena mwinda en’edye enande.

⁶Solosolo oyali la yoi line: noka, ooka bikambwa bina Ba-Nikolao bowe, ko emi loka biho bowe nkoho.

⁷Ende onoyali la litoi, alofake baoyi banatenda Bolimo eneyali bikelesia. Nongof’ende onolonga etelo lacina ale bemamo bena bote bona liiko bonoyali ena Paladiso ena Yakomba.

⁸Koko tengela ekima ena Ekelesia ena Semuluna yok’one: On’oso la Ona Mbusa, Onowaki ko Onoyike lakina, aila baoyi’ane, ate,

⁹Emi leya bino binen’e, ko la biinda bone (ohonde oyali la lituka), ko leya besao benakosaiy’iyo banila, iy’ate bayali Ba-Yuda kuma bafayali Ba-Yuda mene: bayali nko sunagoga ena Satana.

¹⁰Taangake baoyi’aho bana bino banang’oena efan’olingolingo. Lenda, Satana angofusa bamoi’anino en’otumba bon’enyolo lacina bomekame, ko bongen’ino bina jo. Yalaka la solosolo yengoko bewedi, ko nongokofa likuka lina liiko.

¹¹Ende onoyali la litoi, alofake baoyi banatenda Bolimo eneyali bikelesia. Ende onolonga afafomwaki bewedi ben’efe tu.

¹²Koko tengela ekima ena Ekelesia ena Pelungamona yok’one: Ende onise lokula lon’ita lonelofeta en’eselek’eh’efe aila baoyi’ane, ate,

¹³Emi leya litonga linatong’e, nko bili bonoyali ieko ina Satana. Ko omolundamela lina linami, ko otaangana imeedyo inami, nko l’ena bina beho beneki Antipa, temoin enami ena solosolo, oyakamaka enek’ino, nk’en’ili’oho bonatonga Satana.

¹⁴Ohonde njali la baoyi’amoi ena likambo line: oyali l’ato’amoi banundamela lilako lina Bilama, onolakaki Balaka lacina afuse ekumbelo en’oso bona Ba-Yisalaele, lacina bale nyama iniyakamelaki baidola, ko batate bakele.

¹⁵Ko oyali l’amoi banundamela lilako lina Ba-Nikolao nkoho.

¹⁶Lacin’eho, oyokanyaka. Nk’ofile’oho nongoya eneyal’e la mbango, ko nongokan’ita l’iyo la lokula lon’ita lona bonyu’onami.

¹⁷Ende onoyali la litoi, alofake baoyi banatenda Bolimo eneyali bikelesia. Nongof’ende onolonga mana eho enefisi, ko nongofa lufe lina telele, ko lina lina litoto lingotengama ena lufe liho linalifan’oto oneya lina liho, umola nk’ende onotamba liho.

¹⁸Koko tengela ekima ena Ekelesia ena Twatila yok’one: Bon’ona Yakomba onoyali l’aiso’anande yoka lombi lona nkoi, ko l’akak’anande yoka beango beneloloma, aila baoyi’ane, ate,

¹⁹Emi leya bikambwa bine, ko la nganji ene ena lolango, ko l’imeedyo ine la locinji lone, ko ley’oka bikambwa bine bina mbusa bileki biho biniki’oso bike.

²⁰Ohonde njali la yoi line ena likambo line: omofa boyoto’oho Yezebele, onoyotang’endamene bosumoli, etelo; ko ayalake baombo’anami, ko amaonga la longo, lacina batate bakele, ko bale nyama iniyakamelaki baidola.

²¹Njofaki esike ntutuma lacina ayokanya, koko atalanga liyokanya ena likambo lina lisamba linande.

²²Lenda, nongofus’ende ena ntange, ko nongafusa iy’anatata bakele l’ende ena bino biniseki bike, yombo bafayosume ena bikambwa binande.

²³Ko nongoyaka ban’anande nko l’ewedi; ko bikelesia bihitu bingey’oka Emi nde nde Ende onosisola beloko ben’ato ko l’etema; ko nongofa boto l’oto’onino yoka bosamb’onoyali bikambwa binino.

²⁴Koko lakosumol’ino banaciki ena Twatila, banafayali la lilako line, banafeye baoyi bana nginda bana Satana (bosamb’onatend’iyo)—lakosumol’ino, mpakofuedyaki bolito’omoi.

²⁵Ohonde bundamela baoyi’aho banat’ino yengoko enengi’m’oya.

²⁶Ko ende onolanga, onomonya bikambwa binami yengoko nsimbo, nongof’ende lifoka eneyali benyanga;

²⁷ko angatombanya la botondobon’efeko: bangolama yoka bosamb’onola bokengimpoke totatetotate; yok’onok’emamene otambaka etelo eneyali Bafango’onami;

²⁸ko nongof’ende ioto y’okulu.

²⁹Ende onoyali la litoi, alofake baoyi banatenda Bolimo eneyali bikelesia.