Read ngando Enelo 20 Bible Online

Enelo 20 - ngando bible

Enelo 20

¹Ko njenaki ekima emoi eyakite ena loola, kum’ayasuke losete lona Abuso, ko ayaaki l’onyolo bon’okolo ena likasa linande.

²Ko aundaki dragon, nko njua eho en’alale, onoyali nko Oiabolo la Satana, ko aokakelaki mbula nkoto,

³ko aofusaki ena Abuso, ko aokombaki meho, ko aakaki eho la ndembi ena liko linande, lacina afafote baise benyanga lakina tu, yengoko mbula nkoto yosila. Ena mbus’eho angotungwa ilalela.

⁴Ko njenaki toeko, ko bamoi baokisase ena toho, ko etendelo en’akambo efamaki eneyal’iyo. Ko njenaki belimo ben’ato banayakamaki la nkesa ena bete lacin’en’osimo bona Yesu, ko lacin’ena yoi lina Yakomba, ko njenaki belimo beniyo banatakumya nyama eho ko l’efoya enande, ko batatamba ndembi enande ena bilongi biniyo ko l’ena likasa liniyo; iyo baikaki, ko baambanaki la Masiya ena lifoka mbula nkoto.

⁵Oho nde bawei banacikalaki batika lakina yengoko mbula nkoto yosila. Ene nk’eetwelo en’ewedi en’oso.

⁶Ende onoyali la liondo linande en’eetwelo en’oso akik’ekiko ko ayali on’oeka. Bewedi bena befe befana locili eneyal’iyo tu; ohonde iyo bangoyala nkanga ina Yakomba l’ina Masiya, ko bangambana l’ende ena lifoka linande mbula nkoto.

⁷Ko enengi mbula nkoto osila, Satana angotungwa en’onyolo’onande.

⁸ko angofola lacina afote baise benyanga beneyali ena bakoka bah’enei bana loko, Ngongo la Mangongo, lacina asusany’iyo en’ita; ko laali loniyo loyali yoka longewu lona lose l’okwa.

⁹Ko bacoaki ena loko lohalotu, ko basambanyaki esusanelo ena ban’oeka, ko la bonyanga bonolangama; ko nkoi ikitaki ena loola, ko baehyamaki l’iho nko tu.

¹⁰Ko Diabolo onafotaki afusamaki ena lose lona nkoi la soufre, nk’en’ili bonoyali nyama eho la bosumoli’oho bona mpoci; ko bangenyama bino lane l’oco bisike la bisike.

¹¹Ko njenaki ieko in’okolo ina telele, ko l’ende onokisak’ase en’ieko iho, onoki loko la loola olotaka elongi enande, ko edye etasungyama lakina lacin’eniyo tu.

¹²Ko bato banawaki, le ban’akolo le ban’asali, baemali en’oso bon’ieko. Ko bekanda beumbolamaki; ko bokanda bomoi bumbolamaki, nko bokanda bona liiko. Ko bakambo ban’ato banawaki batendamaki yoka bosamb’onoki baoyi otengamaka en’ekanda, nko yok’onoki bikambwa biniyo oyalaka.

¹³Ko lose l’okwa lofodyaki bawei banayaaki meho; ko bewedi la Adese bafodyaki bawei banayaaki eneyal’iyo; ko bakambo ban’oto l’oto batendamaki yoka bosamb’onoki bikambwa biniyo oyalaka.

¹⁴Ko bewedi la Adese bafusamaki ena lose lona nkoi. Bene nko bewedi bena befe, nko lose lona nkoi.

¹⁵Ko yombo lina lin’oto litasungyama litengi en’okanda bona liiko, ende afusamaki ena lose lona nkoi.