Read ngando Enelo 21 Bible Online

Enelo 21 - ngando bible

Enelo 21

¹Ko njenaki loola lona lototo ko la loko lona lototo; lacina loola lonoki’oso ko la loko lonoki’oso bamuma; ko lose l’okwa lofana lakina.

²Ko njenaki bonyanga bon’oeka, nko Yelusalema ena ntoto, kuma boyakite ena loola eneyali Yakomba, bomokodyama yok’oyoto bon’ikuke onokombyama bokombe lacin’ena bome’onande.

³Ko njokaki lofoso lona lokolo en’ieko, liilaki, ate, Lenda, eyaelo ena Yakomba eyali l’ato, ko angotonga l’iyo, ko bangoyala bato’anande, ko Yakomba mene angoyala l’iyo, nko Yakomba eniyo;

⁴ko angolifola mposoli ihatu en’aiso’aniyo, ko efaataki bewedi lakina tu, efana lokeseli, efana lilelo, efan’efafo lakina tu; lacina baoyi banaki’oso bamuma.

⁵Ko Ende onokisak’ase en’ieko ailaki, ate, Lenda, lanunola toma tohatotu l’enunwelo ena ntoto. Ko anjilaki, ate, Tenga, lacina baoyi’ane bayali nko solosolo ko bakolana yimedyama.

⁶Ko ansumolaki, ate, Bamilama. Emi nde nde Alpha la Omega, limatsako la nsimbo. Nongof’ende onoka mposa basi ban’etoko en’asi bana liiko nko nganji.

⁷Ende onolonga angosangola baoyi’ane; ko emi nongoyala Yakomba enande, ko ende angoyala bon’onami.

⁸Ohonde iy’ananga, l’iy’anafimedya, l’iy’anehyama la nsefo, la bayaki ban’ato, l’ato bana lisamba, l’iy’anaseng’ato, la bakumi bana baidola, la bafoci bana mpoci bahatu: liondo liniyo lingoyala ena lose lonelofeta la nkoi ko la soufre; loho nko bewedi bena befe.

⁹Ko emoi ena bikima biho nsambo banayaaki la bikala nsambo binilola la njoci nsambo ina mbusa mene ayaki, ko atendaki l’emi, ate, Yaka, mpokotuma ikuke, nko booli’ona Bon’ona mpate.

¹⁰Ko antolaki ena Bolimo ena lingonji lina likolo ko lina litale, ko antumaki bonyanga bon’oeka boka Yelusalema bonoyakite ena loola eneyali Yakomba;

¹¹ko boyaaki la bokonde bona Yakomba. Fololo enande eyaaki yoka lufe linaliseki’otuya, nk’eyoka lufe lina jaspe, sengelele yoka cristal.

¹²Bonyang’oho boyaaki la bokako bon’okolo l’on’otale, ko boyaaki la befolo jo l’efe; ko bikima jo l’ife baemali en’efolo; ko baina batengi ena befolo beho, nko baina bana bicimo bina ban’ana Yisalaele jo l’ife;

¹³en’ili bona Est befolo besaso; en’ili bona Nord befolo besaso; en’ili bona Sud befolo besaso; ko en’ili bona Ouest befolo besaso.

¹⁴Ko bokako bon’onyang’oho boyaaki la biango jo l’ife, ko baina batengi ena biho, nko baina bana bikima bina Bon’ona mpate jo l’ife.

¹⁵Ko ende onotendaki l’emi ayaaki la lelelo, nko bokombi bona wolo, oyeledya bonyanga ko la befolo benande ko la bokako’onande la loho.

¹⁶Ko bonyang’oho boyaaki la bakoka banei, botale l’okolo nk’okotua bon’omoko, nko kocu. Ko aeledyaki bonyanga la bokombi, ko asungyaki kilometres nkoto ife l’ekam’enei: botale l’okolo la lisango bayaaki nko kocu.

¹⁷Ko aeledyaki bokako bon’onyang oho, nko metres ntuku nsambo, yoka bosambo bonoyali lelelo lon’oto, nko lelelo lon’ekima.

¹⁸Bokako boho bofakamaki la jaspe; ko bonyang’oho boyaaki nko wolo bona soto, nk’eyoka talatala ena soto.

¹⁹Ko baufe bana biango bin’okako bon’onyang’oho bayaaki bokoka, nk’eyoka baufe ban’otuya mene ban’ekotua l’ekotua: eango en’oso eyaaki nko jaspe, en’ife nko saphir, en’isaso nko calcédoine, en’inei nko émeraude,

²⁰en’itano nko sardonyx, en’otoa nko sardoine, ena nsambo nko chrysolithe, ena mwambi nko béryl, en’ibwa nko topaze, ena jo nko chrysoprase, ena jo l’emoko nko hyacinthe, ena jo l’ife nko amethyste.

²¹Ko befolo beho jo l’efe beyaaki nko perles jo l’ife, bofolo’oinoko perle emoko, bofolo’omoko perle emoko; ko mboka ena ntoto en’onyang’oho eyaaki nko wolo bona soto, sengelele yoka talatala.

²²Ko ntena ilombe ina Yakomba meho, lacin’oka Nkolo Yakomba onise mpamba ehatu, ende la Bon’ona mpate, bayali nk’ilombe in’onyang’oho iyoamene.

²³Ko bonyang’oho bofalele bina ko la ngondo lacin’eho boate fololo; lacin’oka bokoka bona Yakomba bofoladya boho, ko Bon’ona mpate ayali nko mwinda en’onyang’oho.

²⁴Ko baise benyanga bangokenda ena fololo ena boho, ko bafoka bana rois bana loko bangoyela boho lokumo loniyo.

²⁵Koko befolo ben’onyang’oho befakombamaki l’ane tu (ko meho efaate nko le boco);

²⁶ko bangoya l’okonde ko la lokumo lona benyanga ena boho.

²⁷Koko iyema ina nsefo, l’ende onila yoi lina nsefo, l’ende onofota mpoci, bafatuaki meho tutu; yengoko iyo kei banatengi baina en’okanda bona liiko bona Bon’ona mpate.