Read ngando Enelo 22 Bible Online

Enelo 22 - ngando bible

Enelo 22

¹Ko antumaki lose lona basi bana liiko, kalikali yoka cristal, lonelofolaki en’leko ina Yakomba ko l’ina Bon’ona mpate,

²ena ntoto ena mboka en’onyang’oho. En’eseleka beh’efe bena lose bote bona liiko bomela, bonota bemamo beota jo l’efe, nsenza emoko boota bomoko; ko nkase ina bote’oho iyali lacin’ena eikedyo ena baise benyanga.

³Meho efaataki bomomo lakina; ko leko ina Yakomba l’ina Bon’ona mpate ingoyala nko meho; ko baombo’anande bangosael’ende;

⁴ko bangen’elongi enande; ko lina linande lingoyala ena bilongi biniyo.

⁵Ko meho efaataki boco lakina tu; bafalele mwinda, ko bafalele fololo ena bina, lacin’oka Yawe Yakomba angafoladya, ko bangoyala bafoka bisike la bisike.

⁶Ko ansumolaki, ate, Baoyi’ane bayali nko solosolo ko bakolana yimedyama; ko Yawe Yakomba ena belimo ban’asumoli atomaki ekima enande lacina atume baombo’anande baoyi banangilama linga.

⁷Lenda, loy’isanga, mpalingalinga, Ende onomonya baoyi ban’osimo bon’okand’one akik’ekiko.

⁸Emi Yoane njokaki ko njenaki baoyi’ane. Ko eneki’m’ookaka ko njenaki, nkwaki en’oso bon’akaka ban’ekima onontumaki baoyi’ane lacina njokumy’ende.

⁹Koko ansumolaki, ate, Tilake’oho, emi nk’osali yok’e, ko yoka bifili bine bika basumoli, ko l’iy’anamonya baoyi ban’okand’one. Kumya nko Yakomba.

¹⁰Ko ansumolaki, ate, Taumbake bokand’one la baoyi ban’osimo’one; lacina esike eolama.

¹¹Ende oninda mbongi, akusake likamba bikambwa bininda mbongi; ende ona nsefo, akusake liyalama boto’ona nsefo; ko ende onoyali la mbongi, akusake likamba bikambwa bina mbongi; ko ende on’oeka, akusake liyalama on’oeka.

¹²Lenda, emi loy’isanga, mpalingalinga; ko boluko’onami boyali nko l’emi, lacin’eho ndukole boto l’oto yoka bosamb’onoyali bikambwa binande.

¹³Emi nde nde Alpha la Omega, On’oso la Ona-mbusa, Limatsako la Nsimbo.

¹⁴Iy’anasonga bisenda biniyo, lacina baate etelo ena bote bona liiko, ko lacina batua en’efolo bena bonyang’oho, bakik’ekiko.

¹⁵Lacina mbwa, la banaseng’ato, la bato bana lisamba, la bayaki ban’ato, la bakumi bana baidola, l’iyatu banalanga mpoci ko bafota mpoci, bayali en’anza.

¹⁶Emi Yesu motoma ekima enami lacina akosumol’ino baoyi’ane ena bikelesia. Emi nko boluo la bon’ona Dawidi, emi nk’ioto ina kalikali ina bokulu.

¹⁷Ko Bolimo la Booli baila, Yaka. Ko akoli eneyal’ende onoka aile, ate, Yaka. Ko ende onoka mposa, ayake. Ko boto l’oto onolanga, atambake basi bana liiko nko nganji.

¹⁸Emi lasumola boto l’oto onoka baoyi ban’osimo bon’okand’one, emite, Yombo boto’on’etaketaka akokedya baoyi’aho yoi limoi, Yakomba angokokedy’ende njoci initengi en’okand’one;

¹⁹ko yombo boto’on’etaketaka aumola yoi limoi lin’aoyi ban’osimo bon’okand’one, Yakomba angumola liondo linande ena bote bona liiko, ko l’en’onyang’oho bon’oeka, nko baoyi banatengi en’okand’one.

²⁰Ende onila baoyi’ane, aila, ate, O, emi loy’isanga, mpalingalinga. Nkoho: yaka, Nkolo Yesu.

²¹Isei ina Nkolo Yesu iyalamake la ban’oeka Ndoho.