Read ngando Enelo 3 Bible Online

Enelo 3 - ngando bible

Enelo 3

¹Koko tengela ekima ena Ekelesia ena Saludi yok’one: Ende onoyali la Belimo nsambo bena Yakomba ko la tooto nsambo aila baoyi’ane, ate, Emi leya bikambwa bine—oyali la lina nk’eyoka onoyike, ohonde omowa.

²Tombanyaka, ko kikyaka baoyi’aho banaciki banoli la mbwaka, lacin’emi ntasungy’oka bikambwa bine bionga nko mbonga en’oso bona Yakomba enami.

³Lacin’eho, kanedyaka yoi linik’otambaka ko linik’ookaka, ko undamela liho, ko oyokanyaka. Nk’ofatombanya yok’oho, nongoya eneyal’e yoka liya, ko ofeyaki esike enengi’m’okofoela.

⁴Ohonde oyali la baina bamoi, nk’ena Saludi mene, bato banatehya bisenda biniyo la mbindo; ko iyo bangeta l’emi la bisenda bina telele, lacin’iyo bakoli.

⁵Ende onolonga angolotsama bisenda bina telele, ko mpalifolaki lina linande en’okanda bona liiko tu, ohonde nongimedya lina linande en’oso bona Bafango’onami, ko l’en’oso bona bikima binande.

⁶Ende onoyali la litoi, alofake baoyi banatenda Bolimo eneyali bikelesia.

⁷Koko tengela ekima ena Ekelesia ena Filadelufiya yok’one: Ende onoyali on’oeka, ende onoyali solosolo, ende onise losete lona Dawidi, onokombola ko efan’oto onokomba lakina, ko akomba ko efan’oto onokombola lakina: ende aila baoyi’ane, ate,

⁸Emi leya bikambwa bine. Lenda, mila lokombo lonelokombwa en’oso’one, ko efan’oto onokombisa loho; lacin’oka oyali la locili nk’isalisali kei, koko omomonya yoi linami, ko otaangana lina linami.

⁹Lenda, bamoi bana sunagoga ena Satana banila, iy’ate bayali Ba-Yuda, kuma bafayali Ba-Yuda mene, bafota nko mpota; noka, nongailel’iyo baye ko baosame en’akak’ane, ko baeye oka emi mokook’e nganji.

¹⁰Lacin’eho e omonyaki yoi lina locinji lonami, emi nkoho nongokomony’e en’esike ena lomeko enengoya isanga en’enyanga behetu lacin’iyatu banatonga ena loko bamekame.

¹¹Loya la mbango I undamela eho enat’e, lacina boto’omoi atokokumol’e likuka line lin’elonga.

¹²Nongil’ende onolonga likonji en’ilombe ina Yakomba enami, ko afafolaki lakina tu; ko nongotenga eneyal’ende lina lina Yakomba enami, ko la lina lin’onyanga bona Yakomba enami, nko Yelusalema ena ntoto, enekita ena loola eneyali Yakomba enami, ko la lina linamamene lina litoto.

¹³Onoyali la litoi, alofake baoyi banatenda Bolimo eneyali bikelesia.

¹⁴Koko tengela ekima ena Ekelesia ena Laodikiya yok’one: Ende onoyali Amen, Temoin ena solosolo l’en’i meedyo, Ngolo mene en’enunwelo ena Yakomba, aila baoyi’ane, ate,

¹⁵Emi leya bikambwa bine, ofayali ncici ko ofayali efefe: nsokolanga lacina oyalame yombo ncici yombo efefe.

¹⁶Koko lacin’oka oyali nko bolelo, ofana ncici ko ofan’efefe, nongokosela en’onyu’onami.

¹⁷Enil’e, Mbo emi nde nde ntuki ena toma, ko lituka linami limosokwa nde, ko mpind’iyema tu; koko ofey’oka oyali ena bino, ko l’ena lokeseli, ko oyali biinda, ko omolody’aiso, ko oyali bolumbulumbu,

¹⁸lakolak’e lacina osombe eneyal’emi wolo bonomekama l’etumbelo ena nkoi, lacina oyalame ntuki; ko l’isenda bina telele, lacina oyolots’eamene biho, lacina nsoi ena bolumbulumbu bone efenya; ko l’onganga bon’aiso lacina ohinya baiso’ane ko oene bolotsi.

¹⁹Bahatu banalang’eini lomafela lofeli, ko lomalaka la nsisodya; lacin’eho, ongya liyalama la mposa, ko oyokanyaka.

²⁰Lenda, emi njemali ena lokombo ko lafomela loho; yomb’oto’omoi aoka efodya enami, ko akombola lokombo, nongotua eneyal’ende, ko nongola toma l’ende, ko ende angola l’emi.

²¹Nongof’ende onolonga etelo lacina akisase l’emi en’ieko inami ina lifoka, yok’onok’emamene olongaka, ko mokisase la Bafango’onami en’ieko inande.

²²Ende onoyali la litoi, alofake baoyi banatenda Bolimo eneyali bikelesia.