Read ngando Enelo 4 Bible Online

Enelo 4 - ngando bible

Enelo 4

¹Ena mbusa en’aoyi’ane, ndendaki, ko lenda, lokombo lokombwa ena loola. Ko lofoso loneloki’m’ookak’oso, loneloyali nk’eyoka etendelo en’opate, lotendaki l’emi lakina, ate, Anda mendo ena liko, ko nongokotuma baoyi banangilama ena mbusa.

²Isasanga njaaki ena Bolimo; ko lenda, ieko ilamaki ena loola, ko omoi aokisase en’ieko;

³ko ende onokisak’ase aenyaki yoka lufe lina jaspe ko la sardoine; ko ngolo ena bokotua bona emeraude eosambanya ieko iho.

⁴Ko tokina toeko ntuk’ife la tonei tosambanya ieko iho; ko ena toeko toho njenaki bingambe ntuk’ife la binei bayakisase, bayalotsame bisenda bina telele, ko bayaaki la bakuka ban’elonga bana wolo en’ete’eniyo.

⁵Bahalihali l’akungola la mposo bafolaki en’ieko; ko mwinda nsambo ina nkoi mene iyafete en’oso bon’ieko: mwinda iho nko Belimo nsambo bena Yakomba.

⁶Ko lose lon’okolo lona talatala yoka cristal loyaaki en’oso bon’ieko; ko ena ntoto en’ieko, ko nsambanya iho, nyama inei iniyike; ko nyama iho yolola l’aiso l’en’oso l’ena mbusa.

⁷Nyama en’oso eyaaki yoka longuli, ko nyama en’ife eyaaki yoka bon’ona ngombo, ko nyama en’isaso eyaaki l’elongi yok’elongi en’oto’ola, ko nyama en’inei eyaaki yoka mponongoli eneyafumbwa.

⁸Nyama ih’inei iniyike iyaaki nyama la nyama l’afafu botoa; ko yolola l’aiso bili l’ili ena yonge l’ena ntundulu. Ko ifafomya l’ane l’oco; ohonde baila, iy’ate, Boeka, Boeka, Boeka, Yawe Yakomba ona Mpamba ehatu, onoyaaki’ale, ko onoyali, ko onongoyala nko njalama.

⁹Ko enengi nyama iho iniyike okumy’ende onokisase en’ieko lokumo, la mpamba la lokango, nk’ende onoyali bisike la bisike,

¹⁰bingambe biho ntuk’ife la binei bangokwa en’oso’onande onokisase en’ieko, ko bangokumy’ende onoyike bisike la bisike, ko bangofusa bakuka baniyo ban’elonga en’oso bon’ieko iho, ko bangila, iy’ate,

¹¹E Yawe eniso la Yakomba eniso, okoli lacina otambe bokonde ko la lokumo ko la mpamba; lacin’oka onunolaki toma tohatotu, ko toho toyalamaki ko tonunolamaki nko l’eango ene.