Read ngando Enelo 5 Bible Online

Enelo 5 - ngando bible

Enelo 5

¹Ko njenaki bokanda ena likasa y’ome linande onokisase en’ieko iho; boho botengamaki ena ntundulu l’ena mbiolo, ko boakama la biakelo nsambo.

²Ko njenaki ekima ena loola ena locili mene onololua, ate, Onokoli lacina aumbole bokanda ko aakole biakelo bina boho oka nai?

³Ko ena loola l’ena loko l’en’a-se’a loko etaat’oto oninyaki yumbola bokand’oho ko alende boho.

⁴Ko emi ndelaki bike enetasungyam’oto onokoli lacina aumbole bokand’oho ko alende boho.

⁵Koko omoi ona bingambe anjilaki, ate, Talelake; lenda, Longuli lon’onyanga bona Yuda, nko Boluo bona Dawidi, amolonga lacina aumbole bokanda ko aakole biakelo nsambo bina boho.

⁶Ko njenaki ena ntoto en’ieko ko l’ena ntoto ena nyama ih’inei iniyike ko l’ena ntoto ena bingambe, Bon’ona mpate aemali, nk’eyoka onoyakamaki; ayaaki la nsea nsambo ko l’aiso nsambo, banayali nko Belimo nsambo bena Yakomba benetomama ena loko lohalotu.

⁷Ende ayaki, ko atambaki bokand’oho ena likasa y’ome linande onokisase en’ieko.

⁸Ko eneki’nd’otambak’okanda, nyama ih’inei iniyike la bingambe ntuk’ife la binei bakwaki en’oso bona Bon’ona mpate, boto l’oto’oniyo nko nsuka bongele ko la bikala bina wolo binilola la toumba—toho toyali nko beondo bena ban’oeka.

⁹Ko baemba lembo lona lototo, iy’ate, E okoli lacina otambe bokanda boho, ko oakole biakelo bina boho; lacin’oka oyakamaki, ko osombelaki Yakomba l’akil’ane bato bana bicimo bihitu, ko l’ana mposo ihatu, ko l’ana beloi behetu ben’ato, ko l’ana benyanga behetu;

¹⁰ko oailak’iyo bayalame lifoka la nkanga eneyali Yakomba eniso, ko bayali l’etelo yoka bafoka ena loko.

¹¹Ko njenaki, ko njokaki lofoso lona bikima bina loola bike mene nsambanya ieko iho, ko la nyama iniyike ko la bingambe; ko botuya boniyo boyaaki nkese ina nkese, la nkoto ina nkoto;

¹²ko baila la lofoso lona lokolo, iy’ate, Bon’ona mpate onoyakamaki akoli lacina atambe mpamba, la lituka, la bomwu, la locili, la lokumo, la bokonde, la bosako.

¹³Ko njokaki bikambwa bihitu bininunolamaki biniyali ena loola l’ena loko, l’en’ase’a loko, l’ena lose l’okwa, ko la toma tohatotu tonatoyali meho, bailaki, iy’ate, Bosako, la lokumo, la bokonde, la mpamba bayalamake eneyali ende onokisase en’ieko, ko l’eneyali Bon’ona mpate, bisike la bisike.

¹⁴Ko nyama ih’inei iniyike bailaki Ndoho. Ko bingambe bakwaki mbosama ko bamokumya.