Read ngando Enelo 6 Bible Online

Enelo 6 - ngando bible

Enelo 6

¹Ko njenaki eneki Bon’ona mpate oakolaka eakelo emoi ena biakelo biho nsambo, ko njokaki emoi ena nyama ih’inei iniyike ailaki la lofoso lona lokolo yoka likungola, ate, Yaka.

²Njenaki, ko lenda, mpunda ena telele, koko ende onotalamel’eho ayaaki la likomo; ko baofaki likuka lin’elonga; ko afolaki kum’ayalonge elonga ko aokusa lilonga.

³Ko eneki’nd’oakolaka eakelo en’ife, njokaki nyama en’ife eneyike ailaki, ate, Yaka.

⁴Ko mpunda emoi, nk’ena ngola, efolaki; ko etelo eofam’ende onotalamel’eho lacina aumole mwi ena loko, lacina bato bayakane nko tu; ko lokula lon’ita lona lokolo lofamaki eneyal’ende.

⁵Ko eneki’nd’oakolaka eakelo en’isaso, njokaki nyama en’isaso eneyike ailaki, ate, Yaka. Njenaki, ko noka, mpunda ena fici; ko ende onotalamel’eho ayaaki la lelelo lona kilos ena likasa linande.

⁶Ko njokaki nk’eyoka lofoso lomoi ena ntoto ena nyama ih’inei iniyike, loho liilaki, ate, Lelelo lona farine, denier emoko; ko njelelo isaso ina bepunga, denier emoko; koko tehyake bauta ko la vina.

⁷Koko eneki’nd’oakolaka eakelo en’inei, njokaki lofoso lona nyama en’inei eneyike liilaki, ate, Yaka.

⁸Njenaki, ko noka, mpunda eneyaaki la yonge yok’etoko; ko ende onotalamel’eho ayaaki la lina linande lika Bewedi; ko Adese aokilaki ena mbusa. Ko etelo efamaki eneyal’iyo ena likafo limoko fina bakafo’anei bana loko lacina bayake bato la lokula lon’ita, ko la loci lona njala, ko l’ewedi, ko la nyama ina loko inay’olema.

⁹Ko eneki’nd’oakolaka eakelo en’itano, njenaki en’ase’a mesa ena mbeka belimo ben’ato banayakamaki lacin’ena yoi lina Yakomba, ko lacin’ena boloko bonok’iy’oundamelaka.

¹⁰Ko baloluaki la lofoso lona lokolo, iy’ate, O Nkolo on’oeka l’ona solosolo, olingalinga litenda likambo ko ofutodya nkele lacin’ena bakil’aniso eneyal’iy’anatonga ena loko bolingolingo’oya?

¹¹Ko esenda ena telele efamaki eneyali botol’oto’oniyo; ko yoi yosumolama eneyal’iyo lacina bafomya isisali, yengoko laali lona baombo’amoi banambana l’iyo ko bifili biniyo lokoka, nko bifili biniyo banangoyakama linga yok’onok’iy’oyakamaka.

¹²Ko eneki’nd’oakolaka eakelo en’otoa, njenaki elilelo ena loko ena nkolo mene, ko bina boyalamaki fici mene yoka bonuko bona besa, ko ngondo eyalamaki yok’akila;

¹³ko tooto tona loola tokwaki ena loko, yoka bosamb’onakatodya bote bona liteli bemamo benande bena fici benetele, enalidyama boho la lofongo lona lokolo.

¹⁴Ko loola lumaki yoka lokase lon’okanda lonelofutama; ko bangonji bahatu la bikolo bihitu baumaki ena bisanga binik’iy’oyalaka.

¹⁵Ko bafoka bana rois bana loko, la bato bana lifoka, la batuki bana toma, la commandants, la bato bana mpamba, la boto l’oto onoyali boombo, la boto l’oto onofayali boombo, iyatu bayofisaki ena bekolo ko l’ena baufe bana bangonji ban’atale;

¹⁶ko basumolaki bangonji ko la baufe, iy’ate, Botokwele, ko botofise, totongoyenya eneyal’ende onokisase en’ieko, totongofomwa nkele ena Bon’ona mpate;

¹⁷lacina bina bon’okolo bona nkele enande bomoyela, ko oninya yemalisa oka nai?