Read ngando Enelo 7 Bible Online

Enelo 7 - ngando bible

Enelo 7

¹Ena mbusa en’aoyi’ane njenaki bikima bina loola binei baemali en’akoka bana loko bah’anei, kuma bayasuke mpongo ina loko ih’inei lacina lofongo lofakumbe ena loko, l’ena lose l’okwa, ko lofakumbe en’ote’omoko tu.

²Ko njenaki ekima emoi ayilele en’ili bonokya bina, ko ayaaki l’eakelo ena Yakomba eneyike. Ko aloluaki la lofoso lona lokolo eneyali bikima bih’inei biniki etelo ofamaka lacina behya loko ko la lose l’okwa,

³ate, Botehyake loko ko la lose l’okwa ko la bete, yengoko kuma toaka biakelo ena bilongi bina baombo bana Yakomba eniso.

⁴Ko njokaki botuya boniyo banakamaki la biakelo bana bicimo bihitu bina Yisalaele: iyatu nko bato nkese jo l’inei la nkoto inei.

⁵Banakamaki en’ecimo ena Yuda nko bato nkeseemoko la nkoto ife; Ban’ecimo ena Lubena nkese emoko la nkoto ife; Ban’ecimo ena Ngada nkese emoko la nkoto ife;

⁶Ban’ecimo ena Asela nkese emoko la nkoto ife; Ban’ecimo ena Napatali nkese emoko la nkotoife; Ban’ecimo ena Manase nkese emoko la nkoto ife;

⁷Ban’ecimo ena Simona nkese emoko la nkoto ife; Ban’ecimo ena Lewi nkese emoko la nkoto ife; Ban’ecimo ena Yisasakala nkese emoko la nkotoife;

⁸Ban’ecimo ena Zebuluna nkese emoko la nkoto ife; Ban’ecimo ena Yosefa nkese emoko la nkoto ife; Ban’ecimo ena Benyamina baakamaki nko bato nkese emoko la nkoto ife.

⁹Ena mbusa en’aoyi’ane njenaki, noka, bik’ike mene bon’ato bonofan’oto onalisa botuya, bato ban’enyanga behetu, la bana bicimo bihitu, la beloi behetu ben’ato, la mposo ihatu, iyatu baemali en’oso bon’ieko l’en’oso bona Bon’ona mpate, kuma bayalote bisenda bina telele, ko bayasuke baanga en’akas’aniyo;

¹⁰ko bayile la lofoso lona lokolo, iy’ate, Liiko eneyali Yakomba eniso onokisase en’ieko, ko l’eneyali Bon’ona mpate.

¹¹Ko bikima bina loola bihitu baemali nko nsambanya ieko iho, la bingambe ko la nyama ih’inei iniyike; ko bakwaki ena bilongi biniyo en’oso bon’ieko iho, ko bakumyaki Yakomba,

¹²iy’ate, Nkoho! Bosako, la bokonde, la bomwu, la lokango, la lokumo, la mpamba, la locili bayalamake eneyali Yakomba eniso bisike la bisike. Ndoho.

¹³Ko omoi ona bingambe aambaki, anjilaki, ate, Bato’ane banalotsama bisenda bina telele bayali nai? ko bayayi meya?

¹⁴Ko emi lomoutodya, emite, Nkolo, eamene kongoeya. Ko ansumolaki, ate, Bane nk’iyo banayayi ena bino biho bin’okolo, ko bamosonga bisenda biniyo, ko bamila biho telele en’akila bana Bon’ona mpate.

¹⁵Lacin’eho, iyo bayali en’oso bon’ieko ina Yakomba, ko bamosaela l’ane l’oco en’ilombe inande, ko ende onokisase en’ieko angakunda la lilombe linande.

¹⁶Iyo bafokaki lakina njala la mposa en’asi tu; ko bafafomwaki bane lakina, ko bafafomwaki efefe bike nkoho.

¹⁷Lacina Bon’ona mpate onoyali ena ntoto en’ieko iho angoyala Botombanyi’oniyo, ko angalonda ena bitoko bin’asi bana liiko; ko Yakomba angolifola mposoli ihatu en’aiso’aniyo.