Read ngando Enelo 9 Bible Online

Enelo 9 - ngando bible

Enelo 9

¹Ko ekima en’itano afomaki bopate, ko njenaki ioto ina loola imokwa ena loko; ko losete lona lifoku lina Abuso lofamaki eneyal’ende.

²Ko akombolaki lifoku lina Abuso; ko bolinga bilelaki ena lifoku yoka bolinga bon’etumbelo ena nkolo mene; ko bina la efoefoe bayalamaki ficifici lacin’ena bolinga bona lifoku.

³Ko mpalika ifolaki en’olinga nk’ena loko; ko locili lofamaki eneyal’iyo, yoka bosamb’onata toandika tona loko locili.

⁴Ko iyo basumolamaki lacina bafehya tolenge tona loko ko la ndunda ko la bete tu: baehya nko bato banafan’eakelo ena Yakomba ena bilongi biniyo.

⁵Etelo etafam’iyo lacina bayake bato tutu, ohonde lacina bamaenya bino nsenza itano; ko bino biniyo biyaaki yoka bosamb’onoyali efafo enok’oto onokunama l’iyandika.

⁶En’ina beho bato bangofona bewedi, koko bafasungyaki beho tu; ko bangoyala la mposa mene lacina bawu, koko bewedi bengalota.

⁷Koko baonge bana mpalika iho bayaaki yoka mpunda inikolanyama lacin’ena bita; ko baataki bakuka en’ete’eniyo nk’eyoka bakuka ban’elonga bana wolo, ko bilongi biniyo biyaaki yoka bilongi bin’ato.

⁸Bayaaki la lifo yoka lifo lin’ayato, ko baino’aniyo bayaaki yoka baino bana nguli.

⁹Bayaaki la ngua ina ntolo, yoka ngua ina bifeko; ko lolingo lon’afafu’aniyo loyaaki yoka lolingo lona bitoelo binisumama la mpunda bike iniyindimwa en’ita.

¹⁰Ko bayaaki la nsolongondo yoka bosamb’onata toandika, ko la ngenge; ko locili loneny’iyo bato bino nsenza itano loyali nk’ena nsolongondo iniyo.

¹¹Bayaaki la lifoka liniyo, nk’ekima ena Abuso, onoyali la lina ena lofoso lona Ba-Ebele lika Abadona, ko ena lofoso lona Ba-Elene lina linande lika Apolona.

¹²Bino bin’oso bimeta; lenda, bino bimoi bife biyayi ena mbusa.

¹³Ko ekima en’otoa afomaki bopate, ko njokaki lofoso lonelofolaki ena ntoto ena baseki banei bana mesa ena mbeka ena wolo eneyali en’oso bona Yakomba.

¹⁴Loho losumolaki ekima en’otoa onoyaaki l’opate, ate, Tungola bikima binei binitungi ena lose lon’okolo lona Pelata.

¹⁵Ko bikima bih’inei batungwaki; biho bikodyamaki nko lacin’ena heure eho, ko la bin’oho, ko la nsenza eho, ko la mbula eho, lacin’eho bayake likafo limoko lin’akafo’asaso ban’ato.

¹⁶Ko botuya bona beloi ben’ato’aniyo banatalamaki ena mpunda boyaaki nko bekoka nkoto ife; emi njokaki botuy’oniyo.

¹⁷Bokotua bonoki’m’oenaka mpunda en’enelo nk’one; ko iy’anatalamaki ena mpunda bayaaki la ngua ina ntolo yoka ngua ina nkoi ko l’ina hyacinthe ko l’ina soufre; ko bete bena mpunda iho beyaaki yoka bete bena nguli; ko nkoi la bolinga la soufre bafolaki en’enyu’eniyo.

¹⁸La baoyi bah’asaso likafo limoko lin’akafo’asaso ban’ato bayakamaki, nko la nkoi la bolinga la soufre banafolaki en’enyu’eniyo.

¹⁹Lacin’oka locili lona mpunda iho loyali en’enyu’eniyo ko l’ena batito’aniyo; lacin’oka batito’aniyo bayali nk’eyoka njua, ko batito’aho bayali la bete, ko bakun’ato nko la beho.

²⁰Koko bato banacikalaki banatayakama la njoci ine, batayokanya ena likambo lina bikambwa bin’akas’aniyo, batumbela ekumedyo ena bademona, ko la baidola bana wolo, l’ana argent, l’ana beango, l’ana baufe, l’ana benganza: baidola banafenisa, ko bafokisa baoyi, ko bafakendisa;

²¹ko batumbela njaka inik’iy’oyakak’ato, ko la bakunda baniyo, ko la basamba baniyo, ko la liya liniyo.